Ӧнія кадӧ студентъяслӧн уна позянлуныс петкӧдлыны асьнысӧ. Позьӧ пырӧдчыны быдсикас гажӧ, котырӧ, ветлыны и Россияса каръясӧ, и суйӧр сайӧ. Коми Республикаысь вузъяс торйӧн нин топыд йитӧд кутӧны финн-йӧгра регионъяскӧд. Финн-йӧгра университетъяслӧн быдса ассоциация эм, код отсӧгӧн ӧтув нуӧдӧны вузъяскостса конференцияяс, форумъяс, конкурсъяс…
Татшӧм конкурсъясысь ӧти – «Мисс студенчества Финно-Угрии» гаж. Быд во енбиа, мича нывъяс петкӧдлӧны тані ассьыныс сям-кужӧмсӧ, чужан му тӧдӧмсӧ, йӧзкостса паськӧмлысь югыдлунсӧ. Бытьӧ колӧ сёрнитны финн-йӧгра кывйӧн, медым татшӧм гажас пырӧдчыны? Али тырмымӧн велӧдчыны финн-йӧгра регионса вузын? Та йылысь сёрнитім Анастасия Шкондинакӧд.
Кольӧмвося декабрын сійӧ, Сыктывкарса госуниверситетын велӧдчысь, ветліс Ханты-Мансийскӧ, кӧні ордйысис «Мисс студенчества Финно-Угрии» ним вӧсна.
–Жюри бӧрйис, кодлы усяс шудыс петкӧдчыны СГУ-сянь тайӧ конкурсас, – висьтасис Анастасия. – Бӧрйысьӧм вылас вайи портфолио, висьтаси ас йылысь, петкӧдчи жюри водзын. Сэсся экспертъяс донъялісны мукӧд нылӧс. Эг тӧд, бӧръясны-ӧ менӧ. Но кад мысти юӧртісны, мый Ханты-Мансийскӧ муна ме. Мыйла бӧрйисны менӧ? Чайта, донъялысьяслы кажитчис, мый ансамбльын сьыла, и сьыланкывйӧй сьӧлӧм выланыс воис. Ачым пырӧдча «Сигудӧк» котырӧ, кӧні и комиӧн, и рочӧн петкӧдчам. Ансамбльыс – томуловлӧн, кызвыннас сэні 13-25 арӧсаяс.
Анастасиялӧн семьяыс роч, ёртъясыс комиӧн оз жӧ сёрнитны.
–Комиӧн ачым этша варовита, – водзӧ нуӧдіс сёрнисӧ ныв. – Ветлывла Ношуль сиктӧ бабӧ дорӧ да сэні коми сёрнисӧ тшӧкыда кыла. Мукӧд кывъяссӧ ансамбльын сьылігӧн тӧдмалі-велӧді. Тайӧ конкурсас, чайта, чужан кывтӧ да традицияястӧ быть колӧ тӧдны. Ӧд чужанін йылысь колӧ кужны висьтасьны стӧча, лӧсьыда, ыззьӧдана. Конкурс дырйи пырӧдчим и телевидение пресс-конференцияӧ, кӧні тшӧтш тӧдӧмлуннымӧс донъялісны.
Конкурс кежлӧ Анастасия заводитӧма дасьтысьны водзвыв. Гожӧмнас на Паджгаса мичаинъясын снимайтӧма видеоролик.
Сідзжӧ ордйысьӧм дырйи быдӧнлы колӧма нуӧдны мастер-класс.
Ассьыс петкӧдчӧмсӧ Анастасия сиӧма коми вӧралан календарлы: висьталӧма историясӧ да кутшӧм чусі-сикӧтш вӧчалӧмаӧсь сылӧн подув вылын.
–Гала-концерт дырйи вӧлі сідз шусяна дефиле, кӧні коліс петкӧдлыны йӧзкостса паськӧмлысь мичлунсӧ. А сэсся нимкодьӧдім видзӧдысьясӧс творчествоа сям-кужӧмӧн. Ме петкӧдчи «Сьылан» сьыланкывйӧн, – казьтыліс Анастасия.
«Мисс студенчества Финно-Угрии» конкурсын Анастасия Шкондина шедӧдӧма мӧд места да вице-мисс ним.
Вермӧма ордйысьӧмас Глазовса педагогика институтысь Ксения Богданова.
–Ордйысян руыс миян эз вӧв, – тӧдчӧдіс Сыктывкарса канму университетысь студентка. – Ставӧн тӧдмасим, ёртасим. Шемӧсми, кутшӧм сьӧлӧмкылӧмъясӧн быдӧн висьтасис аслас войтырлӧн обычай-традицияяс йылысь! Тыдалӧ, мый нывъяс ёна радейтӧны чужаніннысӧ. Насянь уна выльтор тӧдмалі финн-йӧгра войтыръяс йылысь. Эска, и аслам чужанінӧн найӧс тӧдмӧдны артмис. Чайта, Коми Республикаӧс петкӧдлі бура!
Прӧст кадыс вӧлі этша. И зэв жаль, мый эг удит тӧдмасьны Ханты-Мансийскнас, тайӧ зэв мича карнас.
Ыджыд аттьӧ менам командалы: СГУ-ын уджалысь Анна Махотиналы да ёртъяслы.
Анастасия ачыс Сыктывкарысь. Велӧдчӧ нёльӧд курсын. Университет помалӧм бӧрын лоас математика да информатика велӧдысьӧн.
–Ёна радейта и кипом удж: вурся, вышивайтча. Велӧдчи музыкальнӧй школаын. Сійӧс помалӧм бӧрын и веськалі ансамбльӧ. Сідзжӧ ворса шылада инструментъясӧн, – висьтасис ныв. – Кӧть велӧдчӧмӧй и йитчӧма стӧч наукакӧд, но олӧмам творчестволӧн пайыс зэв жӧ ыджыд.
Ирина Терентьева.
Снимокъясыс Анастасия Шкондиналӧн гортса архивысь да
«ВКонтактеын» «Мисс студенчества Финно-Угрии» котырысь.