Выль во водзын Изьва районса администрациялӧн культура юкӧн йӧзӧдӧма сиктса клуб медся мичаа баситӧм кузя конкурс.
Тайӧ вежонӧ вӧчӧмаӧсь кывкӧртӧд. Вермысьнас лоӧма Щельяюрса культура керка. Сылы вичмас кызь сюрс шайт.
Медводдза вермӧм
–Таво вылӧ миян клублӧн тайӧ медводдза вермӧм. Дерт, зэв нимкодь, – висьталӧ Щельяюрса клубӧн веськӧдлысь Виктория Чистякова. – Ми быд во мичмӧдам, мед жырйын да клуб йӧрын тыдаліс выльвося руыс. И таво, дерт жӧ, баситім. Но эг конкурсӧ пырӧдчӧм ради. Та йылысь районса культура юкӧн юӧртіс, кор миян ставыс нин вӧлі дась. Сэсся снимайтім да ыстім донъялысьясыслы. Сертификатыс «Пера» вузасян шӧринлӧн, сьӧм вылас ньӧбам улӧсъяс.
–Коді тіян уджалысьяс пӧвстысь кужӧ лымйысь мыгӧръяс вӧчны, али бокысь мастерӧс корланныд?
–Ми ставным ӧтув зілям. Мыгӧръяссӧ уна во нин вӧчалам. Александр Владимирович Рочев, коді клубын уджалӧ плӧтникӧн да веськӧдлӧ кӧзяйственнӧй юкӧнӧн, мастеритліс ящикъяс. Сэтчӧ чукӧртам лым, виччысям, кор топалас-чорзяс, сэсся ящиксӧ идралам да заводитам вундавны скульптураяс. Краситам найӧс. Таво со миян йӧрын сулалӧны Кӧдзыд пӧль, Лымныв да 2022 волӧн пас – тигр, – вочавидзис Виктория Ивановна.
Енбиа йӧзлӧн енбиа удж
Щельяюрса культура керкаын зільӧны енбиа да ассьыныс уджсӧ радейтысь йӧз. Кыдзи висьталіс Виктория Чистякова, кодлӧнкӧ кӧ чужас кутшӧмкӧ мӧвп, уджъёртъясыскӧд ӧтув збыль-мӧдасны, да клублӧн творческӧй кудйӧ содас интереснӧй постановка, концерт, проект да с.в.
Тані нуӧдӧны уна сикас кружок, кытчӧ волывлӧны и верстьӧ, и челядь, и олӧма йӧз, матӧ 250 морт. Шуам, «Мастерилка» студияын ки помысь вӧчасьӧны челядь. Эм налы и сьылан да йӧктан, а сідзжӧ театральнӧй кружокъяс.
Гынысь вӧчасьны велӧдӧ Лариса Павловна Сметанина. Сійӧ котыртлӧ и мастер-классъяс. Эм аканьяса театр, кодӧн веськӧдлӧ Татьяна Фёдоровна Филиппова. Верстьӧ и челядь дасьтӧны сэні аканьяса мойд. Уджалӧ миниатюраяс театр, кодӧн веськӧдлӧ зэв енбиа ань Наталья Николаевна Иринёва. Кольӧм во сылӧн водзмӧстчӧмӧн комиӧдӧмаӧсь «Трям, здравствуйте!» мультфильм. Отсасьӧма посёлокса школаын коми кыв велӧдысь.
Щельяюрын унаӧн радейтӧны йӧктыны. И, дерт, клубын эмӧсь жӧ налы кружокъяс. Быдсикас йӧктӧмас велӧдӧ хореограф, балетмейстер Снежана Николаевна Филиппова. Сылӧн квайт йӧктан котыр, кӧні и верстьӧ, и челядь.
«Созвездие» вокальнӧй группаӧн веськӧдлӧ Алексей Тарабукин, «Реченька» фольклор котырӧ волысьясӧс мичаа сьывны велӧдӧ Таисия Чаплыгина. Кино радейтысьяслы эм жӧ мый видзӧдны. Дерт, абу 3D, но век жӧ уна мича мультфильм да кино вайлывлӧны посёлокса культура керкаӧ.
–Миян специалистъяс сьӧлӧмсяньыс зільӧны. Медшӧр могыс – видзны да сӧвмӧдны коми
кыв да культура, Изьва районса традицияяс. Щельяюрса ныв-зон, позьӧ шуны, быдмӧны клубын и унаӧн бӧрйӧны культураын удж. Шуам, Валериан Канев первой тані петкӧдчис, сэсся Москваын велӧдчӧм бӧрын ворсӧ Коми Республикаса вужвойтырлӧн шылада-драмаа театрын, – висьталӧ Виктория Ивановна.
Мам кок туйӧд
Щельяюрса клубын уджыс пуӧ. Но эм ӧти гӧрӧд, кодӧс разьны оз вермыны уна во. Стрӧйбаыс 1928 вося. Капитальнӧя дзоньтасьӧм вылӧ сьӧмсӧ оз вичмӧдны, сы вӧсна мый тӧлкыс оз ло. Дерт, культура керкаын уджалысьяс быд ногыс «пыкӧны» стрӧйбасӧ. Найӧ оз сӧмын гажъяс дасьтыны, тшӧтш и асланыс зептысь сьӧм вылӧ дзоньтасьӧны. Ӧтилаті тувйыштасны, мӧдлаті мавтыштасны. А кольӧм во подувсӧ дзоньталӧмаӧсь.
–Гортысь вайим та могысь став коланасӧ, кодлӧн мый вӧлі, и дзоньтасим. Мыйдыракӧ кутчысьыштас, но… Кӧдзыд дырйиыд и пытшкас ыркыд. Киссьӧ и киссьӧ стрӧйбаыс. Унаысь нин кӧсйысьлісны выльӧс кыпӧдны, но пыр, тыдалӧ, мыйкӧ падмӧдӧ. Районса чинаяс висьталӧны, мый проектсӧ ӧтарӧ вежӧны-лӧсьӧдӧны. Ӧні бара эскӧдісны, мый тавося мартӧдз «корректировкасӧ» эштӧдасны, сэсся дасьтасны колана кабалаяс, и локтан воӧ кыпӧдасны сідз шусяна модульнӧйӧс. Щельяюрын пӧшти куим сюрс олысь, и быдӧн виччысьӧ выль клубсӧ, – висьталіс Виктория Ивановна.
Виктория Чистякова веськӧдлӧ Щельяюрса культура керкаӧн кык во. Таӧдз зільӧма Изьваса ёрдын. Клубса уджӧ босьтчӧма мамыслӧн кувсьӧм бӧрын. «Коми му» газетын гижлім жӧ сылӧн мам Ольга Викторовна Сметанина йылысь, коді вӧлі зэв енбиа да сьӧлӧмсяньыс кӧсйис, мед посёлокын кыпӧдасны выль культура керка.
–Кор мам заводитіс висьӧдчыны, шуліс, мед ме сы пыдди босьтча, ачыс кӧсйис гортын овны да серпасасьны. А ме некор эг мӧвпавлы уджавны культура юкӧнын, сьӧлӧм серти вӧлі юриспруденция. Кӧть эськӧ концертъясын сьывлі жӧ. Бӧръя кык вежонсӧ, кор мамлы вӧлі зэв нин сьӧкыд, и ме эг тӧд, кыдзи да мыйӧн сылы отсавны, шуи, мися, кӧсъян кӧ, ме босьтча тэ пыдди клубын уджавны, а тэ гортын серпасась, сӧмын бурдӧдчы. Мам сэки видзӧдліс ме вылӧ да дзик нинӧм эз шу…
–И тэ мам вӧснаыд вежин уджтӧ?
–Да, и ог каитчы. Дерт, вӧлі сьӧкыд. Но ме кыла, мый мам меным отсалӧ. Мыйкӧ кӧ оз кут артмыны, думышта, кыдзи эськӧ мам вӧчис, и артмӧ ӧд. Клубын уджалысьяс меным ёна отсалісны шогӧс пальӧдны. И найӧ тшӧтш шогалісны, мамӧй кадысь водз кувсис да. Ӧні веськыда верма шуны, мый клуб – тайӧ менам мӧд горт, тані уджалысьяс – семья. Окота, мед мамлӧн зільӧмыс эз кус, мед ставыс, мый вӧчис, водзӧ сӧвмис. Сійӧ став вынсӧ сетіс клублы, мыйта водзмӧстчис, майшасис, мед кыпӧдасны выльӧс. И зэв окота, мед сылӧн кӧсйӧмыс збыльмис. Казявны нин куті, мый ачым мам кодь лои. Гортысь кӧ, шмонитам нин, мыйкӧ вошӧ, сідзкӧ, клубын. Ӧні став коланасӧ жӧ сэтчӧ нуа.
Виктория Чистяковалы мамсяньыс енбиыс вуджӧма жӧ. Сійӧ мичаа серпасасьӧ, сьылӧ, петкӧдчӧ сценкаясын.
–Зэв ёна эска, мый та пӧрйӧ ставыс артмас: мамлӧн кӧсйӧмыс збыльмас – кыпӧдасны выль клуб, – нӧшта ӧтчыд тӧдчӧдіс Виктория Ивановна.
Екатерина МАКАРОВА.
Снимокъясыс Щельяюрса культура керкаысь.