Кольӧм во Сыктывкарса Эжва районысь Рочевъяслысь уна челядя семьясӧ пасйисны республикаса правительстволӧн премияӧн. Ирина Геннадьевналӧн да Андрей Владимировичлӧн видзӧдлас серти, семьяыд – медтӧдчанаыс, мый вермас лоны олӧмас. Мый колӧ вӧчны, медым семья пытшкын пыр ӧзйис радейтчӧмлӧн би? Чайта, налысь вӧзйӧмсӧ унаӧн сюркняласны пель саяныс.
Неважӧн Ирина Геннадьевна да Андрей Владимирович пасйисны кӧлысь лунсяньыс 15 во. Кадыс тай зэв ӧдйӧ лэбӧ. Налӧн быдмӧны куим челядь – Матвей, Маргарита да Устинья, и дзик на неважӧн нёльӧд на чужис.
Рочевъяс пыр дасьӧсь!
Ирина Геннадьевна – Луздор районса Сернӧсысь. Уджалӧ Сыктывкарса 74-ӧд номера детсадйын физкультураысь воспитательӧн. Сэтчӧс челядьӧс, кыдзи и ассьыныс ныв-писӧ, ышӧдӧ пырӧдчыны спортӧ, кытӧн эз ӧтчыдысь вӧвны вермысьясӧн. Воӧ кӧ сьӧлӧм вылад уджыд, и вермӧмыд лоӧ.
Андрей Владимирович – Изьва районса Сизяб сиктысь. Гӧтыр мозыс жӧ помалӧма И.А.Куратов нима педколледж, кӧні найӧ и тӧдмасьӧмаӧсь, да Сыктывкарса университетын босьтӧма физическӧй культура кузя специальносьт. Уджалӧ физкультура велӧдысьӧн Сыктывкарса 28-ӧд номера школаын, юрнуӧдӧ «Турисята», «Юный спасатель» секцияясӧн, «Движение» спортклубӧн. Педколледжын на велӧдчигас пырӧдчӧма уна сикас спортӧ. Ӧні ныв-пиыслӧн вермӧмъясӧн нин нимкодясьӧ.
Матвей пиныс велӧдчӧ Сыктывкарса 28-ӧд школаын 8 классын. Видлӧма вынсӧ тхэквондоын, вольнӧя вермасьӧмын, спортивнӧй акробатикаын, футболын, кокни атлетикаын, варччӧмын, спортивнӧй ориентированиеын. Ӧні унджык кадсӧ лызьӧн котралӧ да спортивнӧй туризмын вын-эбӧссӧ песӧ. Бӧръяас некымынысь лоӧма Коми Республикаса чемпионӧн, пырӧ регионса сборнӧйӧ. Сійӧс да Маргарита чойсӧ пыртӧмаӧсь республикаса енбиа челядьлӧн сідз шусяна реестрӧ. Матвей школаас пырӧдчӧ и конкурс-олимпиадаӧ, а сідзжӧ волонтёралӧ.
Маргарита велӧдчӧ сизимӧд классын. Спортивнӧй акробатика, художественнӧй гимнастика, кокни атлетика, спортивнӧй йӧктӧм – быдлаын нин петкӧдчӧма. Ӧнія кадӧ вокыс моз жӧ котралӧ лызьӧн, радейтӧ спортивнӧй туризм, кӧні унаысь нин лоӧма вермысьӧн. Та кындзи шедӧдлӧма мӧд места ставроссияса йӧктан ордйысьӧмын да коймӧд места чир спорт кузя Коми Республикаса чемпионатын. Вӧлӧма вермысьяс лыдын и кокни атлетикаын.
Устинья ветлӧдлӧ детсадйӧ, но оз жӧ кольччы чой-воксьыс. Кык арӧссянь пырӧдчӧ «Лыжня России», «Кросс нации», «Российский азимут» ордйысьӧмъясӧ. Радейтӧ конькиӧн фигурнӧя исласьны, серпасасьны, йӧктыны, вӧчасьны ки помысь. Кык во сайын шедӧдӧма «Новый дорожный знак глазами детей» ставроссияса конкурсын медводдза места.
Рочевъяс ставныс радейтӧны спорт. Ныв-пиныс бать-мамыс моз жӧ радпырысь пырӧдчӧны быдсикас спортивнӧй гажӧ. Да и мукӧд аддзысьлӧмысь оз ӧтдортчыны – кӧть тайӧ квест, кутшӧмкӧ ворсӧм либӧ шылада да йӧктан гаж. Мед сӧмын ӧтлаын вӧліны. Весиг девиз налӧн эм: «Рочевъяс пыр дасьӧсь!».
Тайӧ кывъясыс и збыльысь лӧсялӧны налы. Кутшӧм сӧмын ордйысьӧм-конкурсын абу петкӧдчылӧмаӧсь – и кар, и республика тшупӧдын. «Кросс нации», «Лыжня России», «Лыжня здоровья», «Супер мама», «Супер папа», «Российский азимут», а сідзжӧ «Выходной с папой в этностиле» районъяскостса библиофестивальын. И тайӧ абу на ставыс. Вермылӧмаӧсь семейнӧй фотографиялӧн «Счастливая семья-2016» конкурсын, «Мама, папа, я – здоровая семья» карса спартакиадаын. А нӧшта пырӧдчӧмаӧсь «Пешком к Деду Морозу» конкурсӧ да шедӧдӧмаӧсь Кӧдзыд пӧльлӧн резиденцияӧ путёвка. Бать-мамыслӧн да верстьӧджык челядьыслӧн, Матвейлӧн да Маргариталӧн, эм ГТО-ысь зарни пасъяс. 2019 воын Рочевъяс вермӧмаӧсь ГТО-лӧн республикаса семейнӧй фестивальын, а сэсся петкӧдчӧмаӧсь Сочиын ставроссияса тшупӧдын нин. Быдӧнлӧн эм уна сикас грамота да аттьӧалана гижӧд.
Кытшӧ пуксьӧмӧн
Быдлунъя тӧжд-могыд вермасны ылыстны бать-мамсьыс челядьтӧ. Та понда быд прӧст здук колӧ вичмӧдны быдтасъясыдлы, кыдзи вӧчӧны Ирина Геннадьевна да Андрей Владимирович.
–Шойччан лунъясӧ челядьлӧн тшӧкыда овлӧ тренировка либӧ кутшӧмкӧ ордйысьӧм. Та понда зілям накӧд жӧ лызьӧн иславны. А сэсся кытчӧкӧ ӧтлаын ветлам либӧ гортын пызанвывса ворсӧмӧн кад коллялам. Челядьыд ӧд кымын верстьӧджыкӧсь, сымын унджык накӧд йитчӧм тӧжд-могыс, и нимкодь, кор ми ставӧн ӧтлаынӧсь, – висьталӧны найӧ.
Рочевъяслӧн семьяын эм традиция – нуӧдны семьяпытшса сӧвет, кӧні быдӧн висьталӧ сійӧ либӧ мӧдтор вылӧ ассьыс видзӧдлассӧ. Шуам, кагалы ним бӧрйӧм. А лои нин кӧ кутшӧмкӧ мытшӧд, ставӧн пуксьӧны ӧти кытшӧ да ӧзтӧны сись. Медбӧрын кина ки кутчысьӧмӧн сьылӧны «Разговоры еле слышны…».
* * *
Сьӧкыд-ӧ лоны уна челядя мамӧн? Ирина Геннадьевна шуӧ, велӧдан кӧ пӧ быдтасъястӧ лоны асшӧрӧн да кор эм насянь да, дерт жӧ, верӧссяньыд отсӧг – некутшӧм сьӧкыдлун абу.
Ми пӧ шудаӧсь, кор ставным ӧтлаынӧсь, кор рӧдвуж да матыссаяс волӧны. Рочевъяслӧн гортас ӧдзӧсныс гӧсьтъяслы пыр восьса. И гажыс ылькйӧ, кор чужан лунас – кӧть ичӧтлы, кӧть верстьӧлы – сьылӧны «Каравай».
–Некор эн вунӧдӧй, мый семьяыд – меддонаыс олӧмас! – эскӧдӧны Ирина Геннадьевна да Андрей Владимирович. – Сиам, мед быдӧнлӧн гортас вӧлі шоныд да югыд, радейтӧй ӧта-мӧднытӧ да видзӧй муслуннытӧ!
Екатерина Микушева.
Снимокъясыс Рочевъяслӧн гортса архивысь.