Выль воӧн да выль шудӧн! Со и листыштіс кадыс миян олӧмысь нӧшта ӧти лист бок. Помасьӧ 2021 во. Матыстчӧ Выль во, вайӧ аскӧдыс надеяяс, позянлунъяс. Та йылысь позьӧ лыддьыны журнал лыддьысьясӧс Выль воӧн чолӧмалан гижӧдын. Сійӧ и восьтӧ номерсӧ. Кутам ыджыд надея, мый став сиӧмыс збыльмас.
Эм на ёрт-мӧд.
Сідзкӧ, олӧм мунӧ.
Видзӧдлы со: кутшӧм гажа луныс!
Ӧтнам пукала
Да лыддя часъяс.
Гашкӧ, кадыс коляс, воас аски.
Аски вылас кута
Ыджыд лача.
Коркӧ-й ми на петлам еджыд гачӧн.
Сӧстӧм синмӧн
Видзӧдлам йӧз синмӧ…
Аттӧ! Кыдзи морттӧ лёкыс синлӧ!
Тайӧ поэзия радейтысьяс вермасны тӧдмасьны Олег Уляшевлӧн «Лов да сьӧлӧм» кывбур чукӧрӧн.
А тайӧ нин Анна Кучевалӧн «Шева чуман» повесьтысь юкӧн:
«Васа дзебис ньӧввужа—пуртасӧ кильчӧ улӧ, дзуркнитіс выльӧн краситӧм поскӧд керкаӧ. Ыджыд мам, Поляа—Зинаа чожиньясыскӧд, юисны момпасьеӧн слӧна тшай, чышкалісны пӧсьнысӧ. Ляз тасьті вӧлі тыртӧм нин.
— Лязйыс эз али мый коль?
— Эз коль, зарни ныв, кор нин корлім да, пырны коліс.
Васа дузгӧдчис. Мый нин пӧчьясыслы юмовсьыс, юмолыс челядьлы колӧ, а тайӧяс кушӧдз сёйӧмаӧсь.
— Вассушка, энлы. Вай петав Турьев Аннаясӧ, ме сылы кодкӧлун чугун гугӧданӧс сетлі. Ми чугун гугӧданнас тайӧ ляз пӧртсӧ гугӧдам да, бара пӧрт тыр ляз лоӧ.
— Кутшӧм чугун гугӧдан? Ылӧдчан!
— Ог бара—й ылӧдчы. Сё збыль. Быд лун рок пӧртъястӧ гугӧдла да, эн али мый казяв? Ветлы—ветлы, ыджыд мам, шу, бӧр чугун гугӧдансӧ корис.
Васа куртіс буссӧ Турьев керкалань. Кысь коран абусӧ мортыслысь? Али эмсӧ? Кутшӧмджык чугун гугӧданыс? А сетас кӧ Аннаыс сы пыдди мыйкӧ мӧдтор?
Турьевъяс ӧшинь улас эз тыдавны, ковмис Васалы пырны керкаӧдзыс. Пырис, пуксис лӧниника пач костас. Пукалӧ. Чӧв олӧ.
— Мыйкӧ, Вассук, мога али мый?— шыасис жӧ сэсся дырӧн Аннаыс.
— Ыджыд мам мӧдӧдіс чугун гугӧданла.— Ӧдва шӧпнитіс Васа.— Шуис, кодкӧлун пӧ тэд сетлӧма.
— Чугун гугӧданла? Чугун гугӧданла? Босьтлі эськӧ чугун гугӧданнытӧ да. Сэсся Карман Лизалы водзӧсалі. Карман Лизаясӧ котӧртлы, сы ордын чугун гугӧданыд, ыджыд мамӧ, шу, бӧр корис…»
Повесьтыс юкӧнъясӧн пондас петны некымын номер.
Тавося декабрӧ 75 арӧс тырис эськӧ Александра Петровна Мишариналы. Бур кывйӧн сійӧс казьтылӧны Алёна Ельцова да Лидия Логинова. Со тадзи пансьӧ Е. Ельцовалӧн «Олӧм дорас муслунӧн ме тыр…» гижӧдыс:
«1921 вося декабр 19 лунӧ коми гижысь, поэт Александра Мишариналы тырис эськӧ 75 арӧс. Асьсӧ сійӧ шуліс сиктса ногӧн Петыр Саньӧӧн, весиг ӧткымын гижӧд кырымавліс тайӧ нимнас, а рӧдвужыс да тӧдсаясыс шулісны сійӧс радейтӧмӧн, меліа — Сандраӧн либӧ Саняӧн… Висервожысь петавлӧм морт, сійӧ, кӧть и дыр кад чӧж томдырсяньыс оліс да уджаліс карын, кар дорас, буракӧ, сідз эз и велав, эз сибав — сьӧлӧмыс тай пыр вӧзйысис—нетшкысис сиктӧ-а, чужан Ыджыдвиддзас…»
«Челядьлы» рубрикаын кывбуръяснас мыччысьӧ Анастасия Сукгоева. Весиг серпасаліс кывбуръяссӧ ачыс. Со, ӧти кывбур:
Ывла вылӧ колӧ
Талун Толя
Пырысь—пыр
Кынтас ассьыс
Ичӧт ныр:
Кӧдзыд вӧсна
Школа пӧдса.
Сӧмын гортас
Дзик оз овсьы,
Ывла вылӧ колӧ —
Быттьӧ кодкӧ корӧ.
Бӧрйис Толя
Джуджыд тола.
Сунiс Толя —
Кынмис голя.
Паськӧм пытшкас
Лым чир пырис,
Гын сапӧгыс
Лымнас тырис.
Корсис кепысьяссӧ дыр,
Со и кынмис сылӧн ныр!
Тайӧ, дерт, абу ставыс. Чайтам, быдӧн аддзас аслыс вылӧ лыддянтор. Весиг верманныд тӧдмасьны лист бок номертӧм юриндалысьнас.
Олег УЛЯШЕВ. Лов да сьӧлӧм. Кывбуръяс
Анна КУЧЕВА. Шева чуман. Повесьт
Антонина ГОРДЕЕВА. Дженьыдик висьтъяс
Уильям ШЕКСПИР. Бушков. Пьеса
Юрий ВАСЮТОВ. Сиктӧй — шудӧй, сиктӧй — шогӧй. Поэма
Елена ЕЛЬЦОВА. Олӧм дорас муслунӧн ме тыр…
Лидия ЛОГИНОВА. Казьтывлам бур кывйӧн…
Йӧлгинь ЦЫПАНОВ. Кӧсйыліс дыр овны-уджавны…
Анастасия СУКГОЕВА. Сьыліс-мойдіс мамӧ. Кывбуръяс
«Эзысь борд» конкурслы кывкӧртӧд
Йӧзӧдӧма «Войвыв кодзув» журналын 2021 воын — татӧг номерыс и збыль эськӧ гӧль вӧлі.
Аддзысьлытӧдз, муса лыддьысьысь! Выль воӧн да выль шудӧн!