Кольӧм пекничаӧ Сыктывкарса администрациялӧн концертасян залын ок и гажа вӧлі! Ӧд юркарын дасӧдысь нин котыртчыліс республикаса Коми КВН, кодӧс сиисны миян чужан мулӧн тшупӧда паслы. «Сё арӧсыд ӧтчыд нэмнас овлӧ!» – буретш татшӧм ним улын сійӧ юргис таво. Ставыс КВН-ын ордйысис 8 котыр.
Донъялісны шмонитны радейтысьясӧс Коми Республикаысь национальнӧй политикаса министр Роман Носков, Комиын Роскомнадзор управлениеӧн веськӧдлысь Виктория Пименова, финн-йӧгра этнопаркӧн веськӧдлысь Елена Иванова, республикаса миннацысь специалист Андрей Терентьев да вужвойтырлӧн шылада-драмаа театрысь артистка Алёна Сметанина. Кыдзи и пыр, гажсӧ нуӧдіс «Чушканзі» журналса главнӧй редактор Анжелика Елфимова.
Унджык котырыс тавося петкӧдчӧмын шмонитісны коронавирус да куар-код, чинаяслӧн йӧз вӧсна «майшасьӧм», сентябрын бӧрйысьӧм да неважӧн йӧзӧс арталӧм (перепись) вылын, эз бокӧ коль и сиктса олӧм.
Дерт, быдӧнлӧн вӧлі мукӧд командаысь торъялана теш, но вермысьяслы местасӧ да торъя нимпассӧ вӧлі урчитӧма сӧмын квайтӧс.
Медводдзаысь республикаса КВН-ӧ пырӧдчысьяслы – Печораса «Рӧмпӧштан» да коми томуловлӧн «МИ» котырса «Комод» командаяслы – тавося фестивальын эз вичмы некутшӧм места, но налӧн, чайтӧм серти, ставыс на водзын.
«Пӧшти рака пиян» нимпас сетісны перым-коми кытшысь воӧм «Ёгвуси» котырлы. Республикаса да карса КВН-ъясын унаысь нин петкӧдчысь «Одыбса репас» команда босьтіс «Ныриса рака пиян» ним.
Нималана «Скӧрӧдумсаяс» котыр шедӧдіс «Вылын юра рака пиян» нимпасын вермӧм. Колӧ пасйыны, мый Кулӧмдін районса команда таво пасйис котыртчӧмсяньыс 27 во.
Коймӧд места босьтісны «Эжвайывса бабаяс», мӧд места шедӧдісны Изьва районысь уналӧн радейтана «Бандерлогъяс».
А республикаса 10-ӧд Коми КВН-ын вермысьясӧн лоины «КилоМетръяс» (Коми йӧзӧдчан керкалӧн да коми культура шӧринлӧн ӧтувъя котыр). Буретш тайӧ жӧ командаӧ пырысь, «Коми му» газетса журналист Павел Симпелев лои медбур ворсысьӧн.
Миян корр.
Снимокъясыс коми культура шӧринлӧн.