Таво октябрын Зеленечса культура керка бердын «Ас йӧз» театр студиялы тыри 10 во. Юбилейсӧ артистъяс пасйисны «Роза рӧма кымӧръяс» пьеса серти дасьтӧм спектакльӧн, кодӧс видзӧдысь донъяліс декабрь 11 лунӧ Коми Республикаса войтырлӧн Ёртасян керка сцена вылын, кытчӧ воліс тшӧтш тайӧ гижӧдыслӧн авторныс Андрей Власов.
«Ас йӧз» котырӧн веськӧдлысь да режиссёр Ольга Рогожникова висьталӧ, артистъяс пӧ сьӧлӧмсяньыс ворсісны трагикомедияысь геройясӧс, быттьӧ олісны сцена вылын. Видзӧдысьыс эз вӧв уна, но зэв бура вочаалісны, сералісны, а кодсюрӧ весиг синвасӧ чышкалісны.
«Роза рӧма кымӧръяс» пьесаын петкӧдлӧма сиктса олысьясӧс, налысь радейтчӧм да вежӧгтӧм, важ да выль муслун. Видзӧдысьяс вель ёна сералісны мужичӧйяслӧн гӧтыръяснас вежласьӧм вылӧ, а спектакль помын сцена вылын лои трагедия – тшук эз кув некымын морт. Но ставыс помасис бура.
Юркарса сцена вылӧ петавтӧдз тайӧ пьесасӧ медводз петкӧдлісны Зеленеч, Час да Паль сиктъясын.
–Быд во миян театр студия пуктӧ ӧти спектакль. Чукӧрмис нин 10 петкӧдчӧм, и ставыс коми кыв вылын. Медводз босьтім тӧд вылӧ нималана авторъясӧс – Николай Дьяконовӧс, Николай Щукинӧс, Геннадий Юшковӧс, а сэсся нин кутім корсявны тӧдтӧмджыкъяслысь гижӧдъяс. Весиг роч авторъяслысь куимӧс вуджӧдім коми кыв вылӧ. Пьесасӧ корсяла быдлаысь – небӧгъясысь, ӧтуввезйысь, юася библиотекаръяслысь, коми литература велӧдысьяслысь, режиссёръяслысь. Долыд, мый таво миянлы сюри татшӧмыс. Сійӧс оз на унаӧн тӧдны Коми Республикаын. Вӧлӧмкӧ, Андрей Власов Сыктывдін районса Выльгортысь, а уджалӧ Сыктывкарын, – висьталӧ Ольга Рогожникова.
Дас воӧн «Ас йӧз» котыр ёна нин нимкодьӧдіс видзӧдысьӧс. Репертуарас унджыкыс комедия, но эмӧсь и мӧд жанра спектакльяс. Айму вӧсна Ыджыд тышлӧн тшупӧда пас кежлӧ пуктылісны Борис Васильевлӧн повесьт серти «Кыа петігӧн тані лӧнь» драма. Сыысь шедӧдісны грант да мойвиис уналаӧ ветлыны гастрольӧн. Зэв серамбана комедия артмис Ухта карысь Эвелина Пиженколӧн пьеса серти. Ольга Рогожникова аддзис сылысь гижӧдсӧ ӧтуввезйысь да комиӧдіс. Буретш Коми Республикаын Театрлы сиӧм воӧ сетісны автобус, да тайӧ пьесанас кӧкъямысысь петкӧдчисны некымын сцена вылын. Мукӧд кар-сиктын кындзи «Ас йӧз» пырджык петкӧдчӧ Зеленечын, Часын да Пальын.
–Дас воӧн уна спектакльын ворслісны быдпӧлӧс йӧз. Ӧткымын артист некымынлаын петкӧдчис. Театр студиялӧн «Свадьба приданӧйӧн» медводдза пьесаын вӧлі 12 ворсысь, тшӧтш и сьылысь-йӧктысьяс да отсасьысьяс. Ӧні миян студияын 32 морт. «Роза рӧма кымӧръяс» пьесаын ворсісны дас кыкӧн, а миян выль артист Владимир Трошевлы весиг кык роль вичмис. Эмӧсь и сэтшӧмъяс, кодъяс студияын медводдза спектакльсяньыс – Олег Лажанев, Александра Гудырева, Екатерина Киселеёва. Зэв бура тӧдӧны Зеленечын да пыр пӧся вочаалӧны и Галина Туголуковаӧс, Наталья Моисееваӧс, Зинаида Дьяконоваӧс, Валентин Старцевӧс, Татьяна Чертковаӧс, Сергей Раевскийӧс, – висьталӧ ань.
Ольга Рогожниковалӧн юрнуӧдӧм улын Выль во бӧрын енбиа артистъяс кӧсйӧны дасьтыны выль спектакль – Эвелина Пиженколӧн гижӧд серти комедия. Авторыс гижӧ рочӧн да, та вӧсна пьесасӧ бара на вуджӧдасны коми кыв вылӧ. Сюжетыс зэв аслыспӧлӧс, сэтшӧмсӧ абу на пуктывлӧмаӧсь сцена вылӧ, но ковмас пӧ мыйкӧ вежыштны миян сиктса олӧм йылысь комедияяс бӧрын. А мый йылысь лоӧ выль спектакльыс, видзӧдысь тӧдмалас, гашкӧ, тулыснас нин.
Чолӧмалам Зеленечса «Ас йӧз» театр студияысь артистъясӧс да сэтчӧс режиссёрӧс тшупӧда пасӧн! Мед налӧн творческӧй уджын став дум-кӧсйӧмныс збыльмас.
Екатерина Микушева.
Снимокъясыс «Ас йӧз» театр студиялӧн архивысь.