Прицепа мотоблок, ытшкан техника да бур пӧрӧдаа 12 кролик. Ставсӧ тайӧс Зимстанысь Станислав Эдуардович Анискович ньӧбис таво тулыснас «Социальнӧй контракт» уджтас серти государствосянь вичмӧдӧм сьӧм вылӧ. Буретш 2021 во заводитчӧмсянь тадзи отсалӧны ас овмӧсъяслы. Сетӧны 100 сюрс шайт.
Станислав Эдуардович ассьыс шудсӧ аддзис кык во сайын. Ӧтлаасисны том велӧдысь Елена Витальевна Носовакӧд, кодлӧн овмӧсас вӧлі дас гӧгӧр кролик.
Станислав дас сайӧ во зілис ломтысянінын, сэсся асшӧр уджалысь дорын пилорамаын, кӧні вӧрыс кӧ эз вӧв, эз вӧв и уджыс да удждоныс. Сэсся ӧти тӧдса висьталіс сылы соцконтракт йылысь, чуйдіс, видлы пӧ.
Со и шыӧдчис Станислав Эдуардович йӧзлы социальнӧй отсӧг сетан шӧринӧ. Та дырйи колӧ вӧлӧм, мед ас овмӧсын вӧдитісны кутшӧмкӧ да пемӧс.
Станислав Эдуардович чукӧртіс колана кабала-документъяс, найӧс видлалісны да и сетісны водзмӧстчысь мортыдлы сьӧм.
Талун сылӧн овмӧсын «кузь пеляыд» 60 сайӧ нин. Станислав Эдуардович водзвыв вӧчис кролик видзны 20 сайӧ клетка.
–Гожӧмнас посёлокын унаӧн шыӧдчылісны, тэ пӧ кролик видзан да, ытшкы менсьым йӧрӧс. Абу этша и эновтӧм да турунзьӧм нин муыс. Тӧв кежлӧ запті кроликъяслы тырмымӧн кӧрым. Тулыснас, кор веж турун петіс, пыр и заводиті номсӧдлыны найӧс коснас сорлалӧмӧн. Радейтӧны и пипу корӧсь, тшӧтш дасьті тӧв кежлӧ. Чӧсмӧдлам град выв пуктасӧн, ньӧбам торъя сёян. Пыртлі и пелысь вожъяс. Гидӧ пыра да, сӧмын гудж-гадж и кылӧ. Пыр сёрнита кроликъяскӧд, коркӧ вомгорулын, а коркӧ и гораа, сьылыштла на весиг. Вайсясны да, коймӧд тӧлысяс, кор ичӧт пемӧсъясыс бура нин сёйӧны, надзӧникӧн торйӧда мам дорсьыныс, – окотапырысь висьтасис Станислав Эдуардович.
Техникаӧн сійӧ отсалӧ и посёлокса ас овмӧсъяслы. Яйсӧ бура босьтӧны тані олысьяс.
Быд тӧлысь Станислав Эдуардович юӧртӧ йӧзлы социальнӧй отсӧг сетан шӧринӧ кроликъяслы кӧрым ньӧбӧм йылысь, уна-ӧ сьӧм нажӧвитіс яй вузалӧмысь, мукӧд овмӧслы гӧрӧм-ытшкӧмысь да с.в.
Тайӧ пӧ ас нянь вылӧ петны панас. Мӧвпалӧ локтан воын лӧсьӧдны крестьянин овмӧс, водзвыв кыпӧдны гидъяс да босьтчыны вӧдитны гортса пӧтка. Зіль мортыдлӧн уджыс юр выв тырыс.
Марина Дадашова.
Снимокыс Елена НосовалӦн.