Октябрь 20 лунӧ филармонияын нимӧдісны Комиын паськыда тӧдса гижысь Николай Тюрнинӧс. Юбилярӧс чолӧмавны сцена вылӧ сылӧн сьыланкывъясӧн петалісны Альфия Коротаева, Вера Булышева, Виктория Пыстина, Игорь Маткаримов, Валентина Ковальчук, Наталья Траилина да мукӧд артист.
Николай Тюрнин таво воськовтіс олӧмас кык тшупӧд. Мартын сылы тыри 65 арӧс, а творческӧй уджӧ босьтчӧмсяньыс – 45 во. Кыпыд рытсӧ Николай Алексеевич нимтӧма сьыланкывйысь кывъясӧн – «Стих к тебе любовью напоён». Кыдзи висьталӧны ёртъясыс, сылӧн сьыланкывъясын воссьӧ вӧр-валӧн, Войвывлӧн мичлуныс, эмӧсь радейтчӧм йылысь да мамлы сиӧмыс. И быд сьыланкыв йиджӧма авторлӧн муслунӧн.
Медводдза композиторыс, кодкӧд уджалӧма гижысь, – Борис Тюрнин. Шылад тэчӧмаӧсь и Гелий Кочанов, Владислав Можайкин, Гений Горчаков. Уна во нин топыда ёртасьӧ Койгортысь самодеятельнӧй композитор Марк Новосёловкӧд.
Николай Алексеевич йӧзӧдӧма сьыланкывъяса некымын петас. Енбиа мортлӧн водзмӧстчӧмӧн миян регионын кык вонас ӧтчыд нуӧдӧны «Сьыланкывкӧд коля» республикаса фестиваль. Пырӧдчӧны сэтчӧ и том авторъяс да композиторъяс.
Николай Тюрнин, кыдзи гижысь, тӧдса и рӧдвуж войтырлы. Сылысь кывбуръяссӧ вуджӧдӧма финн, мари да удмурт кывъяс вылӧ.
Екатерина МАКАРОВА.