Быд сикт-грездын олӧны сэтшӧм йӧз, кодъясӧн верман помтӧг нимкодясьны да примерӧ босьтны. Удора районса Кӧдж сиктысь буретш татшӧмнас позьӧ шуны Зоринъяслысь семьясӧ. Михаил Анатольевич да Валентина Васильевна Зорина кужӧны мичмӧдны ас грездсалысь олӧмсӧ.
Михаил Анатольевич Зорин – уджач морт, пыр кужӧ мыйӧнкӧ шензьӧдны.
Чужлӧма сійӧ Луздор районса Пӧруб сиктын. Ичӧтдырйиыс семьянас вуджӧмаӧсь овны Ухта районса Лайква грездӧ. Быдмӧма да велӧдчӧма сэні жӧ. Школа помалӧм бӧрас нёль во босьтӧма тӧдӧмлун Воркутаын, босьтӧма «электрослесарь-наладчик шахтных автоматических устройств» специальносьт. Сэсся недыр уджалыштӧма шахтаын, но дзоньвидзалун торксьӧм понда ковмӧма локны Лайкваӧ. Тані нин Михаил Анатольевич тӧдмасьӧма гӧтырпуыскӧд, и 1974 воын найӧ ӧтлаасьӧмаӧсь. Чужтӧмаӧсь-быдтӧмаӧсь куим пи – Алексейӧс, Вадимӧс да Максимӧс.
Буретш сійӧ кадас Михаил Анатольевич уджалӧма грездса культура керкаын. Некымын во мысти мӧвпыштӧмаӧсь вуджны овны гӧтырыслӧн чужанінӧ – Кӧдж грездӧ. Выльлаын мужичӧй бара на яра босьтчӧма культура керкаса уджӧ. Кодсюрӧ ӧнӧдз казьтывлӧ сійӧ вояссӧ. Олӧмыс бергӧдчӧма да, Михаил Анатольевичлы ковмӧма кутчысьны тат-чӧс совхозса скӧт карта уджӧ, бригадиралӧма животноводство юкӧнын, уджалӧма лысьтысьысьӧн. Уджач мортӧс пасйӧма уна сикас грамотаӧн. Совхоз тупкысьӧм понда пенсия вылӧ петтӧдзыс уна во на мужичӧй уджалӧма и асшӧра зільысь дорын.
Гырысь челядьыс быдмисны нин, кор семьяын лоины Филипп пи да Маша ныв. Найӧ пыртісны семьяӧ дзик выль ру.
Грездсаяс мужичӧйӧс пыр пыдди пуктӧны – Михаил Анатольевич некор оз ӧткажит сы дорӧ шыӧдчысьяслы, уджалӧ бура да сьӧлӧмсяньыс. Сійӧс тӧдӧны и кыдзи бур пач тэчысьӧс, код йылысь юӧрыс паськалӧма ёна ылӧдз нин. Выль пачьястӧ тэчны пыр сійӧс корӧны. Михаил Анатольевич жӧ отсасьӧ дзоньтавны и сиктса часовня.
Нӧшта мужичӧйлӧн шензьӧдана мича гӧлӧсыс. Кор заводитас сьывны – сьӧлӧмыд вӧрзьылӧ. Кужӧ и гитараӧн ворсны. Сылысь петкӧдчӧмъяссӧ видзӧдысь-кывзысьяс пыр шоныда вочаалӧны.
Валентина Вячеславовна Зорина – Кӧдж грездын ветеранъяслӧн сӧветӧн веськӧдлысь. Быд гаж котыртӧмын сійӧ нырщикъяс лыдын. Сӧмын звӧнитасны да корасны отсавны – котӧрӧн нин локтӧ. Сылӧн син улысь оз вош некутшӧм юӧр: вундӧ да видзӧ газетын гижӧмторъяс, альбомъяс, снимокъяс. Сійӧ уна во нин чукӧртӧ кӧджса йӧз йылысь юӧръяс. Альбомыс уна сикас жӧ: войнаса ветеранъяс, тылса уджалысьяс, Параскева Пекнича часовня, Кӧджса олысьяс йылысь да уна мукӧдтор. Уна во нин ань водзмӧстчӧ Параскева Пекнича нима часовня дзоньталӧмын да видзӧдӧ-кывкутӧ сы бӧрся.
Валентина Вячеславовнакӧд пыр эм мый йылысь сёрнитны. И кор дырджык он аддзысьлы, весиг гажтӧмтчан сыысь.
Верӧсыс моз жӧ радейтӧ сцена вылын петкӧдчыны. Шензьӧдана бура ворсӧ рольясын. Ӧнӧдз на став видзӧдысьыс казьтывлӧны «Тыл-фронту» районса смотр-конкурсын «Письма памяти» композицияын «мамлысь» роль ворсӧмсӧ.
* * *
Зоринъяс озырӧсь внукъясӧн. Налӧн 13 внук да кык правнук нин. Ассьыныс челядьнысӧ да внук-внучкаяссӧ Михаил Анатольевич да Валентина Вячеславовна лыддьӧны медыджыд шудӧн.
Мария ЗориналӦн юӧр серти дасьтіс Надежда ПУНЕГОВА.
Снимокъясыс ЗоринъяслӦн гортса архивысь.