—Ме сиктса зон, коді кӧсйӧ бур вӧчны аслас республикалы, ышӧдӧ томуловӧс сёрнитны да сьывны комиӧн, — висьталіс ас йывсьыс Владимир Трошев. — Кӧсъя, медым некод оз шу, мый Удмуртияысь либӧ мӧд финн-йӧгра регионысь ныв-зон миян дорысь бурджыкӧсь да зільджыкӧсь. Кӧсъя, мед коми ныв-зон нималісны асланыс творчествоӧн.
Владимирӧс бура тӧдӧны Коми Республикаын олысьяс. Том морт тшӧкыда петкӧдчӧ сцена вылын. Сямыс, майбыр, быдтор вылӧ тырмӧ — и сьылӧ, и гудӧкасьӧ, и гаж нуӧдӧ, и ӧтуввезйын акцияяс котыртлӧ, и проектъясын водзмӧстчӧ.
Татшӧм морт йывсьыс гижнысӧ сьӧкыд, ӧд сылӧн уджын да творчествоын быд нырвизь — зэв тӧдчана, и статьяад окота шымыртны ставсӧ.
Кывны да гӧгӧрвоны
Важгортысь зонлӧн культураын водзмӧстчӧмыс — радейтана удж. Том морт Кӧрткерӧсса коми культура шӧринын веськӧдлӧ «Исерга» да «Мича гудӧк» котыръясӧн, а Зеленечса клубын — театр студияӧн.
Со неважӧн корӧмаӧсь сійӧс уджавны нӧшта и культура колледжӧ, кӧні Владимир велӧдчылӧма.
—Гудӧксӧ ачым бӧрйи. Велӧдысьӧй гудӧкасис, и меным окота жӧ лои. Тайӧ йӧзкостса инструментыс быттьӧ ловъя: сійӧ тэкӧд, а тэ сыкӧд сёрнитан. Ачыд кӧ шогӧ усян, гудӧкыд тшӧтш падмӧ, — мӧвпаліс Владимир. — Сыкӧд быттьӧ радейтана нывкӧд — колӧ кывны да гӧгӧрвоны ӧта-мӧдтӧ.
Автобусын юргӧ «Маръямоль»
Таво тулыснас ӧтуввезйын тшӧкыда юргис видеоролик, кӧні том йӧз автобусын гудӧк улӧ сьылӧны «Маръямоль». Тайӧ акциясӧ панысьнас, дерт жӧ, вӧлі Владимир Трошев.
—Гортын «кытшлалі» интернетті, видзӧді сідз шусяна челленджъяс (кор кодкӧ мыйкӧ думыштӧ, йӧзӧдӧ ӧтуввезйын, а мукӧдыс сы бӧрся тайӧс вӧчӧны). Думышті, мися, а мыйла комилӧн татшӧмыс абу? Вӧчам! — казьтыліс том морт. — Звӧниті Генрих Немчинов ёртӧйлы, вай, мися, мыйкӧ сьылам. Сійӧ и вӧзйис автобусын «Маръямольтӧ» ливкйӧдлыны. Мӧд лунас и сьылім. Рытнас гортӧ локті да аддзи, мый ме, вӧлӧм, телевизорын нин.
Тайӧ акцияыслӧн шӧр могыс — петкӧдлыны, мый оз ков яндысьны да ӧтдортчыны чужан кывйӧн сёрнитӧмсьыд. Сӧвет кадӧ кедзовтӧмаӧсь мам кывйӧн вӧдитчысьяссӧ, тешитчӧмаӧсь коми йӧз вылас. Тасянь, буракӧ, яндысьӧмыс и кыссьӧ. Окота нин, мед ылӧ бӧрӧ коляс тайӧ кадыс.
Та ради и петім ывла вылӧ. Ышӧдім йӧзсӧ, мед оз яндысьны, медым сьыласны мукӧдыслы, а оз сӧмын вомгорулас мургыны. Да, сьӧкыд, ас пырыд быттьӧ колӧ вуджны, но тайӧ отсалӧ мортлы быдмыны-сӧвмыны.
«Гажа вой»
«Коми му» газетын гижлім нин и Владимирлӧн «Гажа вой» клип йылысь. Тайӧ видеоас синмӧ шыбитчана паськӧмӧ вӧччӧмӧн да тешкодь ӧчки пысалӧмӧн томулов сьыліс-йӧктіс Адзорӧмса уличаяс вылын да скӧт картаын. Клипсӧ видзӧдӧмаӧсь нин 180 сюрсысь унджыкӧн. Кызвыннас ошкӧмаӧсь да бура донъялӧмаӧсь видеосӧ, но кодсюрӧ абу гӧгӧрвоӧмаӧсь шӧр мӧвпсӧ.
—Тайӧ сьыланкывнас медводз кӧсйим инмыны ныв-зонлы, ӧд интернетын зэв этша томуловлы сиӧм коми кывъя сідз шусяна контентыс, — гӧгӧрвоӧдіс гудӧкасьысь. — Ме ветлі Удмуртияӧ. Казялі, мый сэні та боксянь ставыс бурджыка сӧвмӧ. Том йӧз сёрнитӧны да сьылӧны удмурт кывйӧн. Тайӧ менӧ ыззьӧдіс! Гортӧ воӧм бӧрын мӧд лунас гижи «Гажа вой» сьыланкыв. Артмис и зэв ӧдйӧ аддзыны клипсӧ снимайтӧм вылӧ сьӧм.
Гӧгӧрвои, мый видзӧдысьсӧ колӧ мыйӧнкӧ вӧрзьӧдны. Трактор-мотоблокнад сиктад вӧдитчӧны, таӧн ӧдвакӧ кодӧскӧ шензьӧдан. Миянлы вӧлі окота петкӧдлыны сэтшӧмтор, мый некод на эз аддзыв. «МИ» котырӧн веськӧдлысь Светлана Макарова вӧзйис синмӧ шыбитчана паськӧм.
И тайӧ вӧрзьӧдіс йӧзсӧ — кодкӧ ошкис, кодлыкӧ эз кажитчы, но некод эз коль веськодьӧн. И тайӧ зэв бур!
Унаӧн меным гижисны, кӧсъям пӧ велӧдны сьыланкывсӧ. Кывъяссӧ, дерт, налы мӧдӧді.
Бать-мам керкаын – сьывны
Со неважӧн интернетын мыччысис юӧр, мый Важгортын кӧсйӧны лӧсьӧдны культура шӧрин. И татшӧм мӧвпыс чужӧма бара жӧ менам вомъёртлӧн.
—Локті Важгортӧ. Гуляйтігмоз муні асланым важ керка дорӧ.
Тӧдсаяс шыӧдчисны, вузав пӧ пес вылӧ, кӧть кызь сюрс шайтысь, важӧн нин ӧд тані некод оз ов, — висьталіс Владимир. — А керкаыс ӧд зумыд на, буретш сикт шӧрас сулалӧ.
Думышті, мися, миян сиктын челядьлы некутшӧм бурджык ворсанін абу. Сідзжӧ и культура шӧриныс абу, кӧні эськӧ томулов вермисны чукӧртчывлыны, сьывны-серпасасьны, кытчӧ эськӧ позис мӧд муысь гӧсьтъясӧс вайӧдлыны.
Окота лои сиктын и туризм нырвизьсӧ сӧвмӧдыштны, мукӧдлаысь енбиа томуловӧс татчӧ тшӧтш корлывны.
Важгорт — важся сикт, кӧні ставӧн сёрнитӧны комиӧн. Тані и позьӧ войтырыслысь русӧ кывны-гӧгӧрвоны.
Тадзи и чужис мӧвпыс бать-мамлӧн керкаын восьтыны культура шӧрин.
Коридорас кӧсъям лӧсьӧдны татчӧ волӧм художникъяслӧн картинаясысь галерея. Шуам, коркӧ тайӧ мортыс, гашкӧ, зэв нималанаӧн лоӧ… А сылӧн серпасӧн ылі войвыв сиктын позьӧ нимкодясьны.
Керка йӧрас сувтӧдам качай, челядьлы ворсан площадка, футбол ворота, нюжӧдам волейбол сетка. Ёртъяс меным дасьӧсь отсасьны.
Тані позяс и физкультура-спортӧ пырӧдчыны, и творчество руӧ «суныштлыны».
Окота, медым и чина йӧз оз вунӧдны ичӧт сикт-грезд йылысь. Олӧмыс ӧд тані мунӧ жӧ, колӧ отсыштны и татчӧс йӧзлы, а абу сӧмын каръяс кыпӧдны-сӧвмӧдны.
Ӧні кӧсъям выль клип снимайтны. Корсим нин та вылӧ сьӧмсӧ. Окота гажа коми сьыланкывъяс гижны, ӧд норыс и сідз зэв уна.
* * *
Ӧтуввезйын «ВКонтакте» лист бокын Владимир корӧ отсӧг Удора районса Важгорт сиктын культура шӧрин лӧсьӧдӧм вылӧ: позьӧ могмӧдны стройматериалӧн, краскаӧн, мачьясӧн да сеткаа воротаӧн, а сідзжӧ сьӧма отсӧг мӧдӧдны 89042054782 (Владимир Павлович Т.) телефон пыр либӧ банкын 40817 810 5 2878 1238324 тшӧт вылӧ.
Ирина Терентьева.
Снимокъясыс Владимир ТрошевлӦн гортса архивысь.