Паджгаса Пелысь Парась помтӧг пурсис-пинясис Пашӧ пиыскӧд, Педул пӧлыскӧд, Пекла пӧдругаыскӧд, Прокопей председателькӧд. Петас пос помӧ, «пилитас» понсӧ, порсьсӧ, петуксӧ:
—Пеж пемӧсъяс, пустӧ путкылясянныд!
Пӧкрӧвӧ пуж петкӧдліс: пӧрӧдіс печкан, пазӧдіс патепон, пузь-пазькерис пӧнар, пӧттӧдз порчкис! Парсасис паччӧрӧ. Пуксис пракмунӧм пинжак-пасьяс пиӧ, пуктӧм пиньсӧ певнас прӧверитіс, перйис, пӧрччысьтӧг пӧрӧдчис-плавгысис пӧдушкаӧ. Пырысь-пыр парквайис: пырӧны патераас Параскева Пекнича, Петыр-Павел праведникъяс, поконча Пелагея перняньыс.
—Повтӧма пузьӧдчан, Парасюк! Пӧдлав паръястӧ: Паджгаын пинясян — Пӧдтыбокын правӧславнӧйяс пернапасасьӧны! Пельӧсъясыд пелькӧдтӧмӧсь, перинаыд пыркӧдтӧм, пытшъяса! Пирӧгыд пӧжавтӧм, пескыд пырттӧм, пеж пельсаыд петкӧдтӧм, паськӧмыд пеславтӧм. Пӧтӧлӧкыд пемдӧма, пывсяныд пӧлӧс, потшӧсыд пӧрӧма, пачыд потласьӧма, пестеръясыд паськалӧмаӧсь, пельсаясыд пыдӧстӧмӧсь. Пратьӧсь, пеляд понтшак, платтьӧыд пезьдалӧма. Пашӧ пиыд первой пыжӧн пышъяс — Печораӧ, Педул пӧлыд Пеклакӧд пар-титчасны, пемӧсъясыд пакӧститчасны. Прокопей председатель прӧдукта пайнад пӧрйӧдлас, пашпорттӧ пыді пызанӧ печатялас. Порчкӧмсьыд пӧрысьман, пыскыльман. Плешкад петас пемыд пудпас. Пукаланіныд пыктас-польдас, потас. Пропадитан-пагалан, Пантелеймоновна!
Повзьӧмысла Парась пӧсяліс, пондіс пӧдны, пидзӧсыс позяліс. Паляліс! Пырысь-пыр пызйыштіс паччӧрсьыс. Пӧсявтӧдз пожъясис-пелькӧдчис, пусис-пражитчис. Пуксьӧдіс пызан пасьта Пашӧ писӧ, Педул пӧвсӧ, Пекла пӧдругасӧ, Прокопей председательсӧ, пыртіс понсӧ, порсьсӧ, петуксӧ:
—Прӧститӧй полӧкалӧӧс!
Пируйтісны, пӧлянасисны! Помтӧма пасибӧалісны Параскева Пекничаӧс, Петыр-Павел праведникъясӧс, поконча перняньсӧ. Пинясьӧмлы — пом! Пелысь Парась, расковья Пантелеймоновна, Парасюк — прамӧй. Патераныс — пельк поз, пачьясыс пӧсьӧсь, пемӧсъясныс пыр пӧтӧсь! Па-шӧ Педулкӧд пармаын пӧтка прӧмышляйтӧны, пу пӧрӧдӧны, пес пилитӧны. Пекла председателькӧд праздникъясӧ пыралӧны. Паджгасаяс Парасьӧс пыдди пуктӧны.
Екатерина Семяшкина,
Пӧдтыбок посёлокса библиотекаын уджалысь.
Кӧрткерӧс р.