Июль 23 лунӧ Японияса юркарын воссис 32-ӧд гожся Олимпиада. 200 гӧгӧр странаысь сэтчӧ локтӧма 11 сюрс спортсмен. Россияса сборнӧйын — 335 морт (таысь кындзи запасын кызь атлет). Тайӧ ёна унджык Рио-де-Жанейроса Олимпиада вылын серти, кытчӧ вит во сайын допинг вӧсна эз лэдзны Россияысь уна спортсменӧс. Но сэк жӧ и этшаджык мукӧд ворсӧмсьыс. Сідз, Пекинса Олимпиадаын вермасьӧма Россияса 455 атлет. А ӧткодявны кӧ США-кӧд, налӧн командаыс Токиоын миян серти кык пӧв ыджыдджык.
Россияса сборнӧйын 150 мужичӧй да 185 нывбаба. Унджыкыс шӧркодя 27 арӧсаӧсь. Медся том — 16 арӧса гимнастка Виктория Листунова. А верзьӧма спортын петкӧдчас 56 арӧса Инесса Меркулова. Рио-де-Жанейроын сійӧ вермасьӧма нималана Мистер Икс вӧлӧн, кодӧс таӧдз кыкысь кӧсйылӧмаӧсь начкыны.
Гӧгӧрвоана, 335 спортсменысь ӧтдор Токиоӧ локтӧмаӧсь тренеръяс, федерацияясӧн веськӧд-лысьяс, командаясӧн юрнуӧдысьяс, ковид-офицеръяс, массажистъяс, врачьяс, менеджеръяс, механикъяс, конюкъяс, операторъяс, ветеринаръяс да кык психолог. Делегацияас кӧсйылӧмаӧсь пырт-ны и священник Андрей Алексеевӧс, но бӧръя здукас бӧр киритӧмаӧсь.
Миян сборнӧйӧ спортсменъясыс веськалӧмаӧсь Россияса 49 регионысь. Медся уна, 91 морт, — Москваысь, медся этша — Севастопольысь. Дзик ӧти морт, волейболистка Анна Лазарева, — суйӧр сайысь (сійӧ ворсӧ Стамбулса «Фенербахчеын»).
Художественнӧй гимнастикаын вермасьӧны двӧйни — Дина да Арина Аверинаяс, триатлонын — Дмитрий да Игорь Полянский вокъяс, гандболын — Анна Вяхирева да Полина Кузнецова чойяс. Варччыны мӧдасны кык Дарья Устинова (ӧтиыс уялӧ крольӧн, мӧдыс — мыш вылас). Фехтованиеын петкӧдчас Россияса Олимпийскӧй комитетӧн веськӧдлысь Станислав Поздняковлӧн София нылыс.
Россияса сборнӧйын Олимпиадаса 24 чемпион, спортса 139 заслуженнӧй, 136 войтыркост тшу-пӧда да 54 мастер, мастерӧ 4 кандидат. Куимлӧн — спортса медвылыс разряд.
Миян спортсменъяс медальяс вӧсна вермасьӧны 83 прӧчент спорт сикасын. Но некод оз пет-кӧдчы бейсболын, софтболын, ыджыд баскетболын, турун выв хоккейын, футболын, гольфын, скейтбордингын да сёрфингын.
Россияса делегацияын уна тренер суйӧр сайысь. Волейболисткаясӧс вайӧдӧмаӧсь Токиоӧ финн Томас Саммельвуо да итальянеч Серджио Бузато. Ылнаӧ чеччалысь Дарья Клишиналӧн тренерыс Афиныса Олимпиадаса чемпион, Америкаысь Дуайт Филлипс. Суйӧрсайса тренеръяс эмӧсь и мукӧд спорт сикасын. Сідз, пыжа слаломын француз, каратэын — иранеч, гандболын — словак, академическӧй гребляын — литовец. Эмӧсь та-тшӧмъясыс и теннисын, лыйсьӧмын, вӧла спортын да мукӧдлаын.
Со татшӧм миян команда вермасьӧ Токиоын Олимпиадаса еджыд дӧрапас да кып пыдди Чайковскийлӧн концертысь шылад улын.
Гожся Олимпиада-2020 вылын Комиысь некод абу. Сэтчӧ вермӧма веськавны Ижевскысь Мария Черепанова, коді ворсӧ баскетболӧн Сыктывкарса «Ника» клубын, но Токиоӧ мунӧм водзвылын сійӧ доймӧма. Вӧлӧма позянлун веськавны сборнӧйӧ республикаса варччысьяслӧн, но абу сяммӧмаӧсь бура петкӧдчыны.
2016 воын Рио-де-Жанейроӧ гожся Олимпиада вылӧ Комиысь ветліс варччысь Александр Сухоруков. Сэні сійӧ лоис нёльӧдӧн. Россияса сбор-нӧйын вӧлі и Комиын чужлӧм боксёр Владимир Никитин, коді шедӧдіс бронза.