Артём Ермолин витӧд во нин нуӧдӧ Ютуб каналын видеоблог, кӧні тӧдмӧдӧ аслыспӧлӧс нылыслӧн вермӧмъясӧн.
Дас ӧкмыс арӧса Настя пусьӧ, вурсьӧ, велӧдчӧ кысьыны, чукӧртӧ пазлысь серпас, исласьӧ конькиӧн, уялӧ бассейнын. Босьтчӧма мужичӧй снимайтны нылыс йылысь видеосӧ абу сійӧс нимӧдӧм ради, а медым ышӧдны эскыны бурас аутизма челядьлысь бать-мамсӧ.
Мыйсяма висьӧм, абу тӧдӧмаӧсь
Артём Варсонофиевич Чилимдін районса Трусов сиктысь. Кор гозъялӧн чужӧма Настя, чайтӧмаӧсь, мый сійӧ дзоньвидза. Но кор дзолюкыслы вӧлӧма куим арӧс, бурдӧдысьяс пуктӧмаӧсь повзьӧдлана диагноз – РАС (рочӧн кӧ, расстройство аутистического спектра). Но весиг сэки гозъя абу лючки гӧгӧрвоӧмаӧсь, мый налы ковмас быдтыны аслыспӧлӧс кагаӧс.
–Чайтім, нинӧм вывті лёкыс абу. Врачьясыдлӧн тай медкартаад уна гӧгӧрвотӧм пасйӧдыс. Кор нылӧйлы вӧлі вит арӧс, тӧдмалім, мый сылӧн аутизм. Но бара жӧ эг ставсӧ стӧча тӧдӧй тайӧ висьӧм йывсьыс. Кор нин гортын лои ӧтуввез, а сэки Настялы кӧкъямыс арӧс нин тыри, вӧлисти лои ясыд, мыйсяма тайӧ диагноз, – казьтылӧ Артём Варсонофиевич.
Мужичӧйлӧн кывъяс серти, висьлӧс нылукыскӧд шыӧдчылӧмаӧсь и районса, и республикаса бурдӧдысьяс дорӧ, но найӧ пӧ сӧмын ылӧсас сёрнитӧмаӧсь. Буракӧ пӧ, веськавлім эг бур специалистъяс дорӧ.
Бурдӧдысьяс видлӧмаӧсь такӧдны, нинӧм нин пӧ он вӧч, да вӧзйӧмаӧсь велӧдны нывкасӧ коррекционнӧй школаын.
Оз ков тшӧктӧм, ачыс вӧч
Но Артём Ермолин абу эновтчӧма висьлӧс нывсьыс. Быдторйӧ зільӧма велӧдны, мый он шу мам йывсьыс. Мужичӧй эз окотит висьтасьны вӧвлӧм гӧтыр йывсьыс.
–Юксьӧм бӧрын Настяӧс ас ордӧ кольӧді, кызвыннас ме сыкӧд нокся-вӧдитча да. А мамыс ёнасӧ эз и сибӧдлы ас дорас. Кӧть и ёрдын видлалісны, кодлы водзӧ видзны-быдтыны Настяӧс, – пасйис мужичӧй.
Батя-ныла кыкӧн овмӧдчӧмаӧсь, кор Настялы вӧлӧма дас кык арӧс. Ӧні нывлы тырӧма дас ӧкмыс. Кольӧм вося августын Трусовысь вуджӧмаӧсь овны Сыктывкарӧ. Асланыс патера карын абу, лэдзӧмаӧсь рӧдвужыс. Мужичӧй висьталӧ, ньӧбны либӧ кӧртымавны пӧ эськӧ эг вермӧй, а ӧні, рӧдвужыскӧд сёрнитчӧмаӧсь да, коммунальнӧй услугаясысь сӧмын вештысьӧны.
–Эн повзьӧй вуджны сиктысь карӧ? Кокньыд-ӧ вӧлі эновтны горт овмӧснытӧ? – юася Артём Варсонофиевичлысь.
–Бӧръя кадӧ ыджыд овмӧс эг нин кут. Кӧть эськӧ водзті видзлі мӧс, кукань, кролик, весиг вӧлӧс да, дерт, и пон да кань. Настяӧс тшӧтш велӧді пемӧсъяскӧд ноксьыны, горт гӧгӧр удж-ноксӧ вӧчны. Настя кужӧ пач ломтыны, пелькӧдчыны, пусьыны-пӧжасьны, песласьны – став гортса уджсӧ вӧчӧ. Верзьӧмӧн вӧв вылӧ сӧвтӧдлі и, вӧрӧ новлӧдлі вотчыны, а сідзжӧ турун пуктыны. Ӧні менам нылӧй зэв нин мастер пусьыны. Вурсьыны кужӧ и. Оз ков тшӧктӧм. Неважӧн курткаӧй косясис, видзӧда да, вурӧма нин. Шарп велӧдчис кыны, – ошкӧ нывсӧ Артём Варсонофиевич. – Карын позянлуныс унджык. Тані ми сувтім коньки вылӧ, велӧдчам роликӧн журъявны, бассейнын уялам.
–Мый медъёна воӧ Настялы сьӧлӧм вылас?
–Сёрнитны нылӧй оз куж, но ме аддза, мый окотапырысь конькиӧн исласьӧ. Ваысь первойсӧ ёна поліс, оз вӧлі пыр, горзӧ. А сэсся ӧтлаын келавны кутім, и ӧні зэв нимкодьпырысь уялӧ-варччӧ. Быд уджӧ сьӧлӧмсяньыс босьтчӧ. Шуам, кор кысьыны заводитіс, оз вӧлі артмы да шогалыштіс, но пыр водзӧ нускис-кыис. Сійӧ менам молодеч! – бара на ошкыштіс нывсӧ батьыс.
Мед сяммис ас бӧрсяыс видзӧдны
Кыдзи висьталіс Артём Ермолин, сылы медвойдӧр аслыс ковмӧма велӧдчыны быдтыны аутизма кагасӧ, сӧвмӧдны сійӧс, мед сяммис ас бӧрсяыс видзӧдны. И ставсӧ тайӧс снимайтӧ да ӧтуввезйын йӧзӧдӧ.
–Кор тӧдмалім Настялысь диагнозсӧ, быттьӧ пӧсь пуан ваӧн морӧсӧ койыштісны. Но мый вӧчны, быть колӧ вӧлі водзӧ овны. Велӧдны нылӧс, мед быдмӧг кодь эз вӧв. И удж вылысь ковмис дугӧдчыны (армияас служитігас шоперӧ велӧдчӧма, но специальносьт сертиыс абу уджавлӧма, зільӧма видз-му овмӧсын. – Е.М.), нылӧс видзӧмысь сьӧм воӧ. Настялысь вермӧмъяссӧ снимайта, мед аутизма челядьӧс быдтысь бать-мамлы петкӧдлыны. Мед тӧдісны, мый унаторйӧ позьӧ велӧдны татшӧм зонпоснисӧ. Дерт, колӧ накӧд ёна ноксьыны, уна вын пуктыны. Аутизмыс уна сикас овлӧ, та вӧсна и велӧданногыс торъялӧ, – висьталӧ Артём Ермолин.
–Артём Варсонофиевич, ӧні мыйыськӧ майшасянныд?
–Шуштӧм мӧвпъяс юрын ог кут, но… Таво гожӧм меным тырӧ 50 арӧс. Лоас кӧ сідз, мый ог кут вермыны видзны нылӧс, интернатӧ сылӧн веськалӧмысь пола. Жаль, но сэні татшӧм диагнозаясыс нинӧмӧ воӧны. Та понда и ӧні став вынӧс пукта, мед Настяӧс быдторйӧ велӧдны, мед водзӧ вылӧ ас кежсьыс вермас овны.
Екатерина МАКАРОВА.
Снимокъясыс Артём ЕрмолинлӦн «ВКонтактеын» лист бокысь.