Талун, июнь 10 лунӧ, пасъям Коми печать лун.
«Коми му» газет лыддьысьлы Ирина Терентьевалӧн нимыс бура нин тӧдса. Том ныв локтіс миян редакцияӧ кольӧмвося ноябрын да дзик пыр и аддзис газетын ассьыс «ордымсӧ» – окотапырысь босьтчис гижны фин-угор да республикаысь бокын олысь коми войтыр йылысь, заводитіс тӧдмӧдны лыддьысьысьӧс енбиа йӧзкӧд.
Ирина чужлӧма Изьва районса Краснобор сиктын. 2018 воын Сыктывкарса госуниверситетысь фин-угор факультет помалӧм бӧрын уджалӧма Печора карса этнопаркын. А гижан сямыс да окоталуныс школаын велӧдчигас на петкӧдчӧма.
–Нималана гижысь моз вӧлі пукся аслам жырйӧ, кусӧда би, ӧзта сись да заводита гижны радейтчӧм йылысь висьтъяс да весиг быдса романъяс, – шмоньпырысь казьтылӧ Ирина. – 70 лист бокӧдз нюжавлісны «шедевръясӧй», дерт, рочӧн сӧмын а.
А со комиӧн гижны окотитӧмыс чужӧма «Коми блогйысь» конкурс юӧртӧм бӧрын. Иралӧн сэк аслас коми блогйыс абу на вӧлӧма, но водзмӧстчысь нывка конкурсӧ пырӧдчӧм да вермӧм (!) ради босьтчӧма гижны чужан кывйӧн. И ӧд вермӧма!
Колӧ пасйыны, мый Ирина Терентьева оз сӧмын «Коми муын» зіль, сылысь гижӧдъяссӧ тшӧкыда позьӧ лыддьыны «Йӧлӧга», «Би кинь» да «Чушканзі» журналъясысь. Код тӧдас, колӧкӧ, регыд и «Войвыв кодзулысь» сылысь нимсӧ аддзам.
Галина МАКАРОВА. Снимокыс авторлӧн.