Коми Республикаысь 5 морт петісны «Лидеры интернет-коммуникаций» конкурслӧн полуфиналӧ. На лыдын и «Коми йӧзӧдчан керкаӧн» веськӧдлысь Инесса Орёл.
Медводдза тшупӧдсӧ вӧлі котыртӧма ӧтуввезйын. Сэтчӧ пырӧдчӧма 13,4 сюрс морт, и сӧмын 561 конкурсантыс мунӧ водзӧ.
–Менӧ корисны вӧчны тайӧ конкурсыслы видеоанонс, ышӧдны йӧз-сӧ пырӧдчыны ордйысьӧмас, – висьталіс Инесса Николаевна. – Сэсся тӧдсаяс и вӧзйисны, ачыд пӧ верман жӧ вынтӧ сэні видлыны. Татшӧм мӧвпыс меным юрӧ весиг эз волы! Быд пырӧдчысь вӧчис презентация, дасьтіс проект, вочавидзис некымын тест вылӧ. Тайӧ ставыс вӧлі ӧтуввезйын. Кывкӧртӧдсӧ виччысим матӧ тӧлысь, и со – юӧртісны. Полуфиналистъяссӧ майын корасны Москваӧ, сэні и лоӧ сідз шусяна очнӧй тшупӧдыс.
Ыджыд могъяс ас водзӧ ог сувтӧд – ӧд мукӧд пырӧдчысьыс SММ да таргетын водзмӧстчысьяс. А менам проектыс – «Коми йӧзӧдчан керкалӧн» ӧтуввезйын «олӧм» йылысь. Тайӧ быттьӧкӧ торъялӧ конкурслӧн шӧр нырвизьсьыс. Дерт, окота петкӧдлыны, мый коми газет-журналъяс эмӧсь ӧтуввезйын, ӧд интернет йылысь талун вунӧдны оз позь. Мый лоӧ водзын, ог на тӧд. Аслым зэв интереснӧ!
* * *
«Лидеры интернет-коммуникаций» конкурссӧ котыртӧны «Диалог» да «Россия – страна возможностей» абу коммерческӧй котыръяс.
Ирина Терентьева.