«Учитель года – 2021» ставроссияса конкурслӧн республикаса тшупӧдын вермысьӧн лои Сосногорскса велӧдысь Нина Николаевна Евсеева.
Енбиа ань чужлӧма-быдмылӧма Кулӧмдін районысь Помӧсдін бердса Выльгорт грездын. Велӧдан стажыс – 24 во, на пӧвстысь дас кӧкъямыссӧ зільӧ Сосногорск карса 3-ӧд номера школаын коми да роч кыв велӧдысьӧн.
Тайӧ ыджыд тӧдчанлуна конкурсас Нина Николаевна пырӧдчӧма кыдз роч кыв да литература велӧдысь.
–Конкурсӧ пырӧдчӧмыс медводз отсаліс видзӧдлыны аслам велӧдан сям вылӧ мӧд боксянь, – висьталӧ Нина Николаевна. – А дерт, и став чукӧрмӧм опытсӧ выль пӧв видлавны да сяммыны петкӧдлыны мукӧд велӧдысьыслы.
Ассьыс уджсӧ Нина Николаевна сьӧлӧмсяньыс радейтӧ да став вын-эбӧссӧ пуктӧ, медым сылӧн быдтасъясыс водзӧ олӧмас петісны-лоисны тӧлка да сяма йӧзӧн.
Галина МАКАРОВА.
Снимокыс Нина Евсеевалӧн гортса архивысь.