Выль «Би кинь кӧсйӧ тӧдны» рубрикаын экология йылысь некымын юалӧм ми сетім Рассыхаевъяслӧн семьялы. Интервьюӧ пырӧдчисны: бать – Ӧльӧш, мам – Елена, челядь – Ёгор, Рита да Костя. Мый артмис – лыддьӧй водзӧ.
Экология – тайӧ?
Ӧльӧш: Экология – миянӧс гӧгӧртысь ловъя мир.
Коми муын экология боксянь медся сӧстӧм ин – кӧні?
Ӧльӧш: ичӧтик юбокса грезд – ылынджык ыджыд сикт-каръясысь, завод да вӧр пӧрӧданінъясысь.
Ёгор: Парма, вӧр.
Мый тэ вӧчан сы могысь, медым миян Му шарным вӧлі сӧстӧмӧн?
Елена: Уна во сайын нин босьтчим торйӧдны пластик, макулатура. Торъя маркировкаа пластик шыбитам лӧз бакӧ. Мый оз позь сэтчӧ пуктавны (гежӧд номера пластик, стеклӧ да с.в), чукӧртам некымын тӧлысь чӧж, медым нуны акцияяс дырйи ёг чукӧртанінӧ.
Ӧльӧш: Ставсӧ, мый ӧнія кадӧ карса олысьлы позьӧ нуны выль пӧв переработайтӧм вылӧ, пуктам урчитӧм бакъясӧ. Град выв пуктаслысь кышъяссӧ косьтам, сэсся нуам сиктӧ (куйӧд пыдди шогмас). Чипан кольк кыш чукӧртам град выв пуктасъяслы жӧ. Жаль, мый оз босьтны линолеум, машина шина да с.в.
Ёгор: Мукӧддырйи аддза кӧ ывлаысь пластик доз, лэпта да шыбита лӧз бакӧ. Тадзи унаысь нин вӧчлім Влад одноклассниккӧд, а тшӧтш и бать-мамкӧд да чой-воккӧд карті гуляйтігӧн.
Рита: Ывлаысь чукӧртам дозмуклысь вевтъяссӧ, сэсся нуам Маршак нима библиотекаӧ.
Школаын да садйын та йылысь сёрнитанныд?
Ёгор: школаын та йылысь ог ёна сёрнитӧй.
Аддзан кӧ, мый кампет кыш кодкӧ шыбитіс эз урнаӧ, а туй вылӧ… Мый вӧчан?
Ёгор: Босьта да шыбита урнаӧ.
Небӧгъяс тайӧ тема серти лыддин нин?
Ёгор: Эг.
Мый бӧръян: пластикысь пакет либӧ дӧра сумка? Мыйла?
Ёгор: Вӧлі кӧ, бӧрйи эськӧ дӧра сумка.
Ӧльӧш: Ёна ковтӧгыс оз ков босьтны лавкаысь выль пакет да пыр шыбитны сійӧс ёгӧсьтны Му шар. Бурджык ньӧбасьны дӧра сумкаӧн – унаысь лавкаад ветлыны шогмас.
Мый вӧзъян миян лыддьысьысьяслы?
Ёгор: Дорйӧй да видзӧй вӧр-ва!
Ӧльӧш: Ми, бать-мам – медся матысса примеръяс. Кыдзи вӧчам ми, сідзжӧ кутасны вӧчны и челядь. Шыбитам кӧ ывлаӧ ёг, тадзи жӧ кутасны вӧчны ныв-пиным. Миянлы аслыным колӧ вежсьыны, и сэки вежсясны челядьным