Ми весь ог на олӧй

Дас кӧкъямыс во Ыджыдвидзса ветеранъяслӧн сӧветӧн юрнуӧдӧ Юлия Михайловна Попова. Кутан ошкыны сійӧс да, пыр и шуас, ӧтнам пӧ ӧд нинӧм эськӧ эг вермы вӧчны. Збыльысь, бура зільӧны сӧветӧ став пырысьыс. Окота быдӧнӧс ошкыштны, быдӧнӧс пасйыны: Михаил Пантелеймонович Игушев, Ольга Ивановна Мишарина, Роза Геннадиевна Панюкова, Татьяна Валерьяновна Панюкова, Нина Николаевна Иванова, Татьяна Михайловна Игушева, Ольга Александровна Мишарина, Елена Ивановна Макарова, Анна Ивановна Игушева, Тамара Гендриховна Игушева, Роза Александровна Ширяева.

Дерт, тайӧ уджсьыс сьӧм оз мынтыны, кӧть унаӧн чайтӧны да и шулӧны на, сідз-тадз пӧ ӧд оз мырсьыны.

Кута киын кольӧмвося планнымӧс. Ёна жӧ падмӧдіс миянӧс тайӧ «карнана» висьӧмыс, мыйсюрӧ эз лэдзны нуӧдны: Джиянын, Ыджыдвиддзын да Зулӧбын гаж-праздникъяс, библиотекаын, клубын аддзысьлӧмъяс, эз вӧвны «Лямпиада» да спортивно-творческӧй фестиваль, мукӧдтор.

Но быд во Юлия Михайловна чукӧртӧ снимокъяс, альбомӧ гижӧдъяс, кӧні 100 листыс тырӧма нин. Сідзкӧ, ветеранъяслӧн сӧвет бура на уджалӧма.

Шензьӧдана уна удж вӧчӧ Ольга Ивановна Мишарина. Сылӧн арталӧм серти, война вылӧ сиктысь мунлӧма 600 саяс морт. Лыдпасыс водзӧ на вежсьӧ-содӧ. Михаил Феликсович Бушенев веськӧдлӧм улын сиктса администрация, депутатъяс, ветеранъяслӧн сӧветӧ пырысьяс йӧз отсӧгӧн сиктсӧвет ӧшинь улын кыптіс мемориал-памятник, кӧні пасйӧма война вылӧ мунӧмаясӧс, кодъяс эмӧсь «Паметь книгаын». Победасянь 75 во тырӧмкӧд йитӧдын котыртлім велӧдчысьяскӧд аддзысьлӧмъяс. Шойна вылын весалім эновтӧм нин гуяс.

Коймӧд во ветеранъяскӧд уджалӧ Елена Егоровна Панюкова. Сійӧ юрнуӧдӧ «Ыджыдвидзса аньяс» котырӧн, кӧні вӧчалӧны праздникъяс кежлӧ козинъяс.

Апрельнас тылын уджалысьяслы сеталім медальяс, ас киӧн вӧчӧм открыткаяс, юмовторъяс. Майнас кытшовтім война кадся челядьӧс, сідзжӧ чолӧмалім открыткаясӧн да юмовторъясӧн. Ветлім Вомынӧ видзӧдны Победа лунлы сиӧм «Синий платочек» концерт.

Чукӧртам тылса труженикъяслысь, война кадся челядьлысь, дас да унджык ныв-пи, быдтӧм мам-героиняяслысь казьтылӧмъяс. Тайӧ гижӧдъяснас позьӧ тӧдмасьны школаса музейын, кодӧн веськӧдлӧ Ольга Ивановна Мишарина.

Кыдзи и быд во, май 9 лунӧ да июнь 22 лунӧ чукӧртчылім обелиск дорӧ, пуктім сэтчӧ дзоридзьяс, казьтыштім война вояссӧ.

Аддзысьлім-сёрнитім Коми Республикаса Госсӧветысь депутат Татьяна Саладинакӧд. Коми кывъя диктантсӧ ми, ветеранъяс, гижим библиотекаын. Быд во декабрь 19 лунӧ казьтывлам поэт Александра Мишаринаӧс.

Гожӧмнас Кулӧмдінӧ кежавлӧмӧн кайлім Дон тыӧ. Аддзысьлім Донса ветеранъяскӧд, тӧдмасим сиктнас, пыралім музейӧ, кӧні миянлы ёна кажитчис, шойччим ты дорас. Зэв нимкодь миянлы, мый Коми муын эмӧсь татшӧм гажаинъясыс. Ветлӧм йывсьыс гижлім «Коми му» да «Звезда» газетъясӧ.

Висер ю бокын Сурва ді – ок, и гажа места! Сэтчӧ ветлігӧн Михаил Иванович Симпелев миянӧс ньӧввужйысь да винтовкаысь лыйсьӧдіс, пызанвывса хоккейнад да бадминтоннад ворсӧдіс. Михаил Пантелеймонович Игушев юкванад номсӧдліс, самӧварысь чайнад юктӧдіс. Чӧскыд кӧра сійӧ ывлаад. А сӧстӧм сынӧдсӧ кыдзи апалім!

Гожӧмнас уналаӧ на ми, ветеранъяс, удитім волыны: и Крымӧ, и Одыбӧ, и Кировӧ.

А арнас бара на Адзорӧмын ордйысим, ӧкмыс команда пӧвстын медводдза места шедӧдім. Молодечьяс быдӧн, коді поводдя вылӧ видзӧдтӧг ветліс-ордйысис сэні.

А октябрь 1 лунӧ Сыктывкарса администрациялӧн жырйын чолӧмалім 70 арӧс тырӧмӧн Ыджыдвиддзысь петлӧм коми драматург Алексей Вячеславович Поповӧс. Чолӧмалім ас пӧжалӧм пирӧгӧн, вотӧсӧн, йӧлӧн, дзоридзьясӧн да бур кывъясӧн.

Дас кык во нин ветеранъяслӧн сӧвет нуӧдӧ «Лучшее подворье» конкурс. Быд во медводдза местасӧ сетам йӧрсӧ мичаа пелькӧдысь выль мортлы. Мӧйму вермӧмыс вичмис Надежда Геннадьевна да Василий Кимович Павловъяслы. Мича ӧшинь увъясысь сеталім ошкана гижӧдъяс.

Ветеранъяс век петкӧдчӧны концертӧн и Зулӧбын, и Выльыбын, и Ыджыдвиддзын.

Со и артмӧ, мый «карнана» висьӧм вылӧ видзӧдтӧг кольӧм во Ыджыдвидзса ветеранъясӧн унатор на вӧчӧма.

2021 воас кӧсйӧмторным уна жӧ: аддзысьлыны быдмысь войтыркӧд, ог вунӧдӧй и сьӧкыд войнадырся кадсӧ вуджӧм олӧма йӧзӧс.

Таво жӧ миян Коми Республикалы тырӧ 100 во. Тшупӧда пас кежлас дасьтысям жӧ.

Мартнас «Лямпиада» дырйи мича сарапанаӧсь, дзоридза чышъянаӧсь, ми, ветеранъяс, вочаалім гӧсьтъясӧс республика йылысь юалӧмъясӧн. И водзӧ на кутам пырӧдчыны спорткӧд йитчӧм аддзысь-лӧмъясӧ.

* * *

Тайӧ гижӧдын окота ошкыштны и Кӧрткерӧс районса ветеранъяслысь сӧветсӧ (веськӧдлысьыс Сергей Васильевич Изъюров). Мед и водзӧ на оз кус сиктса ветеранъяслӧн уджыс!

Анна Александровна Попова,

ветеранъяслӧн сӧветӧн веськӧдлысьӧс вежысь.

Ыджыдвидз сикт, Кӧрткерӧс р.

Снимокъясыс Юлия Михайловна ПоповалӦн.

Ми весь ог на олӧй

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх