«Лӧпта ёль бокӧ тулыснас пиыскӧд лэптӧм вӧр керкаыс шондіа мича лунъяснас гожъялӧма да лӧсталіс зарниӧн. Кӧть вуджис бура ыджыд нопйӧн вель кузь туй (грездсянь вӧр керкаӧдзыс дас вит верст, да и, кӧть ёнасӧ оз тӧдчы, ӧтарӧ паныд: вӧр керкадорса лайколын пу йывъяс татчӧс му веркӧсысь улын-джыкӧсь), куритчытӧм мортыдлӧн лолыс эз тыр. Сьӧлӧм вылас вӧлі нимкодь: локтігас вель унаысь жбыркнитлісны сьӧлаяс, бордъяснаныс сьӧкыда шлопӧдчӧмӧн кыпӧдчылісны матіникъ-ясысь таръяс, дозмӧръяс да чукчияс…»
Восьтӧ март тӧлысся номер Василий Лодыгинлӧн «Шыбӧль» висьт. Кыдз и век гижысь восьтӧ, мый майшӧдӧ войвыв коми мортӧс, мый сетӧ олан гажсӧ.
Кӧдзыд. Кӧдзыд.
Гудӧк кизьыс
Сотӧ чуньтӧ,
Быттьӧ кӧрт.
Усьӧ ӧти бӧрся мӧд
Лэдзӧм шыыс,
Муас йизьӧ.
Ӧтнас си бемоль
Оз кынмы,
Енэжланьыс лэбӧ век…
Кӧть и потіс
Гудӧк мек,
Йӧла велаліс нин сьывны…
А тайӧ Анжелика Елфимовалӧн «Си бемоль» кывбур. А дзоньнас кывбур чукӧрыс — «Ставыс на лоас».
«Йигрӧдлан, новлӧдлан юрад бӧрӧ кольӧм кадсӧ да медся нин любӧпырысь сувтлан челядьдырся казьтылӧмъяс вылад. Тыдалӧ, сійӧ медся донаыс мортыдлӧн олӧмас да, ичӧтдырыд тай некор, вӧлӧм, оз вун. Син водзӧ пыр и сувтӧны Ыджыдвидзса сэкся керкаясыс, йӧзыс. Висер юыс, сиктдорса вӧрыс…» казьтылӧ челядьдырсӧ Алексей Попов.
Пукалі. Да ӧшиньӧ кыдз швач!
Быттьӧ кодкӧ вартіс либӧ лыйис.
Гашкӧ, варыш нырнас вачкис тадз,
Люкасис, кор мӧд лэбачӧс кыйис?
Гашкӧ, мися, кодкӧ вартіс морт.
Видзӧдлі: но некод абу сэні.
Абу-ӧ нин тайӧ менам орт,
Аскӧдыс нин мунны корӧ менӧ?
Гашкӧ, тайӧ шонъянӧй бать-мам,—
Лэбачӧ кор ловныс налӧн пӧрлі,—
Ӧлӧдісны, мед эг вошты сям?..
Коли сӧмын шензьыны… да дзӧрны…
«Скӧрӧдум тэ, Скӧродум …» Кывбур чукӧрӧн петкӧдчӧ Александр Уляшев.
Эльвира Поляковалӧн петӧны «Ваня йылысь висьтъяс». Эм на и та кындзи гижӧдъяс.
Чайтам, быдӧн аддзас лов серти гижӧд.