2016 вося апрель 5 лунӧ Россияса президент Владимир Путинлӧн индӧд серти котыртӧма национальнӧй гвардияса федеральнӧй службалысь войска. Комиын Росгвардиялӧн управление вит вося юбилей кежлас дасьтӧма «Ми олам тіянкӧд орччӧн, ми тіян кодьӧсь жӧ» выставка. Сійӧ воссис март 16 лунӧ Сыктывкарын, финн-йӧгра культура шӧринын.
Комын фотоснимок вылын петкӧдлӧма Росгвардияса сотрудникъяслысь абу сӧмын быдлунъя уджсӧ, кор найӧ служба вылынӧсь, тренируйтчӧны, песӧны вын-эбӧссӧ спортӧн, но и ветеранъяскӧд, челядькӧд, кадетъяскӧд ёртасьӧмсӧ. Со ӧти снимок вылын росгвардееч сёрнитӧ журналистъяскӧд, мӧд вылын – погона донорлысь босьтӧны вир. Выставка вылас жӧ – пуысь, кабалаысь, картонысь, пластикысь танкъяс, самолёт, автомат да челядьӧн вӧчӧм-мастеритӧм уна мукӧдтор.
Выставкасӧ восьтіс финн-йӧгра культура шӧринӧн веськӧдлысь Татьяна Барахова.
–Миян учреждениелы 15 во. И тайӧ каднас татшӧмсяма выставкаыс медводдза на. Ми видзам важ войтырлысь традицияяс, культура, музыка да художествоа творчество. А ті видзанныд странанымӧс, миянлысь лючки олӧмнымӧс. Ме абу сӧглас выставка нимыскӧд. Ті абу миян кодьӧсь. Ті – медся ёнӧсь, медся повтӧмӧсь, медся зумыдӧсь. И таысь ат-тьӧалам тіянӧс, – висьталіс шӧринӧн веськӧдлысь.
Чукӧртчӧмаяслы петкӧдлісны Росгвардияса сотрудникъяслӧн быдлунъя удж йылысь видеоролик.
Та бӧрын кыв сетісны Комиын Росгвардиялӧн управлениеӧн веськӧдлысь, полицияса полковник Алексей Ходоровлы. Сійӧ эскӧдіс, мый ведомствоыс и водзӧ мӧдас ёртасьны шӧриныскӧд, да сетіс Татьяна Бараховалы аттьӧалана письмӧ.
–Зэв нимкодь, мый выставка вылас локтісны том йӧз, челядь. Тайӧ снимокъясыс, кыдз шуласны, абу постановочнӧйӧсь. Найӧс босьтӧма олӧмсьыс. Миян ведомствоса министр нимсянь аттьӧала погона йӧзӧс, кодъяскӧд ӧтув ми туйдам-ышӧдам челядьӧс радейтны чужан му, – висьталіс Комиысь велӧдан, наука да том йӧзлӧн политика кузя министрӧс первой вежысь Лидия Смирнова.
Республикаын национальнӧй политика министерствоысь национально-культурнӧй да енлы эскысь котыръяслӧн юкӧнӧн веськӧдлысь Сергей Судаков сідзжӧ аттьӧаліс Росгвардияӧн веськӧдлысьясӧс тайӧ выставкасьыс. Снимокъясыс пӧ тӧд-мӧдӧны миянӧс йӧзкӧд, кодъяс дорйӧны миянӧс, челядьнымӧс, ышӧдӧны радейт-ны чужан мунымӧс.
Выставкасӧ восьтігӧн юӧртісны, мый Росгвардиялӧн тӧжд-могыс уна. Ӧд сійӧ шымыртӧ войскӧвӧй часьтъяс, вневедомственнӧй охрана, лицензионно-разрешительнӧй удж нуӧдан юкӧнъяс, ОМОН, СОБР, спецназ да ведомствоыслы сотрудникъясӧс дасьтан вузъяс.
–Нимкодь, мый уджнымӧс талун петкӧдлӧны культура отсӧгӧн. Томъяс пиысь, кодъяс воласны тайӧ выставка вылас, кодсюрӧ, гашкӧ, аски локтасны Росгвардияӧ служба вылӧ, мед дорйыны-видз-ны странанымӧс, – эскӧ ОМОН-ӧн веськӧдлысь, полицияса полковник Андрей Терзи.
Республикаын вневедомственнӧй охрана управлениеӧн веськӧдлысь, полицияса полковник Алексей Петренко юӧртіс, мый подразделениеыслӧн борд улын 2,5 сюрс сідз шусяна объект. Быд лун пӧ 40 гӧгӧр наряд видзӧдӧ кар-районын пӧрадок бӧрся. Кольӧм во ведомствоыслӧн дежурнӧй пульт вылын 3,5 сюрсысь унджыкысь ӧзйылӧма «тревога» кнопка. 420-ысь гусясьысьяс абу вермӧмаӧсь помӧдз вайӧдны ассьыныс сьӧд уджсӧ. 5,5 гӧгӧр мыж вӧчысьӧс кутӧмаӧсь да вайӧдӧмаӧсь полицияӧ, на вылӧ панӧма 250-ысь унджык уголовнӧй делӧ, дасьтӧма 3,5 сюрс сайӧ административнӧй протокол. Вневедомственнӧй охрана кутӧма мыж вӧчысь 90 пышъялысь мортӧс, кодъясӧс корсьӧны мукӧд ведомствояс.
–2019 вося августын миян сотрудникъяс Сыктывкарын Киров нима паркын видзӧдӧмаӧсь пӧрадок бӧрся. Сыктыв ю пӧлӧн мунігӧн кылӧмаӧсь отсӧг коран горзӧм. И аддзӧмаӧсь вӧйысь нылӧс. Демид Пахомов чеччыштӧма ваас да кыскӧма сійӧс берегас. МЧС сетіс таысь миян сотрудниклы медаль, – ошйысьыштіс Алексей Петренко.
Выставка помланьыс нин Алексей Ходоров юӧртіс, мый росгвардиясаяс – енбиа йӧз, радейтӧны быдсикас хоббисӧ.
–Ме ачым сямма вышивайтчыны машинкаӧн. Заводитлі киӧн на, кыдз шуласны, крестикӧн. Да, ме 27 во нин служита СОБР-ын, МВД-лӧн медся боевӧй подразделениеын. Тайӧ, гашкӧ, унаӧс неуна шемӧсмӧдӧ. Но вышивайтчӧмыс отсалӧ меным сайкавны сьӧкыд лунъясысь, этшӧ воны, – юӧртіс Алексей Георгиевич.
Комиын Росгвардияӧн веськӧдлысь радейтӧ и туризм. Томдырйи пӧ кытшов-ті ставнас Скандинавия-
сӧ, Прибалтика да Европа. И некӧн пӧ эг овмӧдчыв отельӧ, пыр пӧ узьлі палаткаын, а ветлӧдлі медсясӧ велосипедӧн.
Тайӧ смел мортыс радейтӧ и дайвинг, аквалангӧн уялӧ ва пыдӧсті. Сизим арӧссянь снимайтчӧ. Сылысь уджъяссӧ позьӧ аддзывны МВД-лӧн выставкаяс вылын.
Бӧръявыв финн-йӧгра шӧринын юргис республикаса филармонияысь сьылысь Екатерина Курочкиналӧн мыла гӧлӧсыс.
Николай Размыслов.