Том йӧз, гашкӧ, эз на кывлыны, но эм сэтшӧм важ-важ коми сьыланкыв: «Ылын-ылын, роч Кавказын Ӧ уна-уна киссис вир…». Сьыланкывсьыд тай он веж некутшӧм кыв, но водзӧ вылӧ Ен мед видзас вир киссьӧмысь! Шань йӧзыс Кавказад тырмымӧн. А гоз-мӧд во сайын сэтчӧ овмӧдчис нӧшта и муса коми ань Евгения Абибулаева, нывдырся овыс Лобанова. Блогйысьяслы сійӧ тӧдса Тусь нимӧн.
Гортын Женялӧн классыс век син улын, стенын ӧшалӧ налӧн уна рӧма фотокарточка, ӧд тайӧ класснас веськӧдлысьӧн вӧлі менам верӧс, Александр Михайлович. Сылы тайӧ челядьыс лоисны медмусаӧн, сы вӧсна мый уджавны дугдӧм водзас вӧліны бӧръяясӧн.
Женя Лобанова локтіс искусство гимназияӧ Удораысь. Велӧдчигас ёна водзмӧстчис коми кыв, литература, фольклор, йӧзкостса творчествокӧд йитчӧм быдсикас уджын. Сідз жӧ и Сыктывкарса канму университетын велӧдчигас. Лои бур журналистӧн.
Мортыд оз тӧд, кытысь аддзас шудсӧ. Енмыс шулӧма Женялы паныдасьны муслуныскӧд лунвыв саридз дорын. Верӧсыслӧн вужъясыс крымса татарасянь, а чужаніныс – Кабардино-Балкария. Сэні и овмӧдчис том семья. Быдтӧны Эдель нима нылӧс.
Водзӧ сэсся Женя ачыс висьтасьӧ:
–Кор кывсис, мый верӧс сайӧ муні ылі муӧ, ӧти тӧдса шензьӧмӧн юаліс: «Мунін? А кыдзи нӧ коми кыв?» – «А ме сійӧс аскӧд босьті, сійӧ пыр мекӧд и меын. Ӧд кыв – тайӧ абу пызан-улӧс либӧ керка, мый он вермы нуны сьӧрсьыд; абу морт, кодӧс он вермы невӧлитны вуджны выльлаӧ; тайӧ абу радейтанаин, мый оз позь нетшыштны мусьыс… Кыв олӧ миянын, ми сійӧс новлӧдлам аскӧд!»
–Меным пыр вӧлі окота, медым кагаӧй сёрнитіс комиӧн. Ӧні, кор усис шуд лоны мамӧн, тайӧ кӧсйӧмыс нӧшта на вынсяліс. Дерт, и ме, и мамӧй, коді тӧвйӧ миянын, сёрнитам Эделюшкӧд комиӧн. Медым нывка падъявтӧг торйӧдіс комисӧ да рочсӧ, окота, мед батьыс сёрнитіс сыкӧд сӧмын рочӧн. Но… Сійӧ миян полиглот… Велӧдӧ коми, и, дерт, быд выль кыв радпырысь пыртӧ сёрниӧ. Вомъёртъяс пӧвстын и ичӧт Эдель. Миян папным абу на дзик коми, и быть мыйкӧ висьталӧ кагалы рочӧн. Но нӧшта… Миян папным татарин… И татара кывъясыс миян семьяын эмӧсь жӧ… Мися, куим кывсьыс тэ тыр-бура тӧдан рочсӧ – сыӧн и сёрнит. Но паплы такӧд миритчыны сьӧкыд.
–Муыс бергалӧ… Миян гӧгӧр уна йӧз. И весиг чужан мусянь ёна ылын мойвилӧ сёрнитны мам кывйӧн. Оз сӧмын телефон пыр рӧдвужкӧд да ёртъяскӧд, оз сӧмын коми кыв велӧдысь гортсаяскӧд, но и дзик тӧдтӧм йӧзкӧд…
А со Женялӧн блогйысь кывбур:
Зэв ыджыд аттьӧ, Чужан кыв,
Мый менам олӧмын тэ эм,
Мый бӧрйин менам мамлысь сыв,
Йӧв войтӧн йиджин меӧ сэн,
Мый восьтін енъюгыдлысь мич,
Пӧль-пӧчсянь чӧжсьӧм олан лад…
А мый кӧть сьӧлӧмам эг видз,
Пыр тэнад сюрліс меным кад.
И аттьӧ, дона Чужан кыв,
Мый медбур ёрткӧд тӧдса ме,
Мый ӧтка чагторйӧн ог кывт –
Шань йӧзкӧд йитін олӧмӧс.
Мый медся мелі юргӧмнад
Тэ доймӧм лолӧс бурдӧдлан.
Мый тэкӧд водӧ дзолюк-ныв,
Тэд аттьӧ, муса Чужан кыв!
…Ылын-ылын, роч Кавказын Евгения Абибулаева быттьӧ миян Коми мулӧн посол: уджалӧ уна сикас кывъясӧн сёрнитысь челядькӧд да вӧчалӧ накӧд тшӧтш и коми ног чолӧмалан да козьналан серпас-гижӧдъяс, нуӧдӧ комиӧн ассьыс блог, петкӧдчывлӧ миян газет-журналын да сёрнитлӧ радио пыр. А ӧні «Юрган» телеканалкӧд да Яна Сажинакӧд ӧтвылысь Женя заводитіс вӧчны челядьлы комиӧн сёрнитысь кыӧм чачаяс. Март помын медводдзаяссӧ виччысьӧны нин Сыктывкарын.
Мария Кузьбожева.