Март 12 лунӧ Виктор Савин нима драмтеатрын енбиа артистка Светлана Малькова виччысьӧ искусство радейтысьясӧс История одного свидания» моноспектакль вылӧ. Шылада-поэзияа петкӧдчӧмын сійӧ лыддяс Роберт Рождественскийлысь, Белла Ахмадулиналысь кывбуръяссӧ да Василий Шукшинлысь висьт, а сідзжӧ сьылас радейтана да тӧдса сьыланкывъяс. Аккомпанируйтас артисткалы Семён Налимов нима «Балалайка» котыр.
–Светлана, кыдзи чужис мӧвп дасьтыны татшӧм петкӧдчӧмсӧ? Мыйла колӧ артистлы моноспектакльыс?
–Збыльвылас кӧ, важӧн мӧвпала та йылысь, – вочавидзис сійӧ. – Сӧмын дыр эг вермы смелмӧдчыны.
Кадыс мунӧ, эм кӧсйӧм, кодӧс окота збыльмӧдны, – и со босьтчи.
Нималана артистъяс, шуам, Светлана Крючкова, сцена вывсянь лыддьӧны кывбуръяс, сьылӧны. И ме думайта да, мыйла ми тані ог видлӧй.
Ӧти-кӧ, ме велӧда ныв-зонмӧс искусствояс колледжын сцена вывсянь сёрнитны (рочӧн кӧ, сценическая речь). Лыддьыны авторлысь гижӧдсӧ сідз, быттьӧ сійӧ аслад. И тайӧ петкӧдчӧмыс налы лоас месянь кутшӧмкӧ примерӧн.
Мӧд-кӧ, кор дасьтім «Игроки» спектакль (сэні ме ворса да сьыла), гӧгӧрвои, мый колӧ лӧсьӧдны ассьым программа.
Постановка бӧрас матыстчис ӧти видзӧдысь да шуис: «Тэныд кад нин торйӧн петкӧдчыны. Окота ӧтнадтӧ кывзыны». И тайӧ кывъяс бӧрас збыльысь ыззи.
А ӧні майшася, кажитчас оз видзӧдысьыслы. Окота, мед йиджис сьӧлӧмас, колис тайӧ уджыс театрлӧн репертуарӧ дыр кежлӧ.
Петкӧдчӧмсӧ дасьтігӧн уна вын лои пуктӧма. Ме тані ог ворс, а ола, сьӧлӧмӧн сьыла, – юксьӧ моноспектакль йывсьыс аслас мӧвпъясӧн артистка.
Некымын во сайын, кор Виктор Савин нима театрын нуӧдӧмаӧсь «Спектакли малых форм» конкурс, Светлана Малькова вӧзйылӧма нин дасьтыны Владимир Высоцкий да Марина Влади йылысь висьтасьӧм.
Кӧсйӧма сьывны сьыланкывъяссӧ, лыддьыны налысь ӧта-мӧдыслы письмӧяссӧ.
Но кадыс кольӧма да, Светлана Мальковалӧн дум-кӧсйӧмыс вежсьӧма. «История одного свидания» моноспектакльӧ пыртӧма Высоцкийлысь сьыланкывъяссӧ, но письмӧасьӧмсӧ, кыдзи ачыс артистка шуӧ, кольӧма мӧдысь кежлӧ.
Ӧнія петкӧдчӧмсӧ Светлана Малькова сиӧма нывбабаяслы.
Роберт Рождественскийлӧн эм «Монолог женщины», сы вылын и кутчысьӧ сюрӧсыс. Абу нин том ань локтӧма свиданньӧ вылӧ, виччысьӧ мортсӧ, коді сійӧс корис, но мужичӧйыс абу и абу.
Ань майшасьӧ, шогсьӧ, мыйла тадзи артмӧ олӧмас, мыйла ставыс сэтшӧм дзуг. Ань кӧсйӧ лоны шудаӧн, но…
–Но ме ог ӧти авторӧс босьт, – водзӧ висьталӧ Светлана. – И ог сӧмын нывбаба да мужичӧй костын муслун йылысь висьтав. Пырті петкӧдчӧмас и Василий Шукшинлысь «Письмо» висьт: мамыс гижӧ нылыслы. Тайӧ висьтыс меным зэв ёна кажитчӧ. И ме сиа тайӧ юкӧнсӧ аслам мамлы, коді 17 во нин абу таладоръюгыдас.
Тайӧ юкӧнас петкӧдчӧ и менам Анна нылӧй. Сыкӧд ми сёрнитам муслун йылысь, олӧм йылысь, ӧтлаын сьылам.
–Светлана, артмӧ, «История одного свиданияыс» кутшӧмакӧ семьялӧн удж. Нылыд тшӧтш пет-кӧдчӧ, а режиссёрыс – Денис Рассыхаев верӧсыд.
–Кӧть миянӧс и ӧтувтіс тайӧ уджыс, но кӧсъя пасйыны, мый тайӧ спектакльсӧ абу меным сиӧма, абу ме йылысь, а нывбабаяс йылысь, менам тӧдса аньяс йылысь.
Ӧд ми вокыс быдӧн кӧсъям лоны шудаӧн, радейтам, кӧсъям, медым матыссаясным вӧліны дзоньвидзаӧсь. Постановкаас тыдовтчӧ аньлӧн сьӧлӧмыс, лолыс.
Зэв окота, мед йӧзыс волісны тайӧ моноспектакльсӧ видзӧдны да мекӧд тшӧтш сьылісны, – кывкӧрталіс Светлана Малькова.
Екатерина МАКАРОВА.