–Некымын тӧлысь сайын меным звӧнитіс Олег Исаков, Печораын КВН котыртысь, юаліс, верма-ӧ волыны донъявны налысь КВН-сӧ, – сцена вывсянь висьталіс Анжелика Елфимова, жюриӧн веськӧдлысь. – Ме дзик пыр вочавидзи, мый роч КВН-тӧ ог донъяв. Сэки Олег шуис, мый КВН-ыс – коми. Шензьӧмыс менам вӧлі! Коми КВН? Печораын? Татшӧмтор ради кӧть кытчӧ локта!
Нёльсьыс кыкӧн
Февраль 20 лунӧ Печораын юргис коми КВН. Ворсны кӧсйис нёль команда, но сцена вылӧдз воӧдчисны сӧмын кыкӧн: Печораса «Рӧмпӧштан» да Приуральскӧй сиктысь «Некытчӧ туйтӧмъяс». Соколов сиктысь шмонитысьяслӧн котырысь джынйыс висьмӧмаӧсь ворсӧм водзас да абу вермӧмаӧсь локны гажӧдны видзӧдысьясӧс, а Изьваса «Бандерлогъяс» абу лысьтӧмаӧсь 50 градус кӧдзыдӧ петны машинаӧн кузь туйӧ.
Конкурс дырйиыс жюрилӧн донъявтӧг петкӧдчисны Кулӧмдін районысь «Скӧрӧдумсаяс» да налӧн «Шок» команда-быдтасыс. Тайӧ котыръясыс шуӧмаӧсь кутны сідз шусяна социальнӧй дистанция да шмонитісны видео пыр.
Ворсысьтӧ гӧгӧрвоӧй
Гаж пансьытӧдзыс Наталья Шахова, Сыктывкарын КВН котыртысь, нуӧдіс мастер-класс, кӧні висьтавліс коми шмоньлӧн аслыспӧлӧслун, КВН-лӧн история да рольяс юклӧм йылысь.
–Командаын век кодкӧ зэв бура ворсӧ, но сценарийсӧ гижны оз сяммы, – юксис тӧдӧмлуннас Наталья. – А кодкӧ, мӧдарӧ, бура гижӧ, но слабджыка ворсӧ. Колӧ кужны тыр-бура гӧгӧрвоны ас котырсьыныд быдӧнӧс.
Наталья вӧзйис ворсігӧн вӧдитчыны гижӧда кывйӧн, этшаджык пыртны диалектасӧ, медым ставӧн ставсӧ гӧгӧрвоисны, а сідзжӧ пӧ оз ков матькыны сцена вылын.
–Унджык лыддьысьӧй, – ышӧдіс КВН котыртысь. – Листалӧй коми газет-журнал, видзӧдӧй серамбана уджтасъяс, медым вӧлі сідз шусяна насмотренность. Кор жюриала, век чинта баллсӧ налы, коді шмоньсӧ лыддьӧ лист вылысь. Ӧд тадзисӧ шмонитны быдӧн вермас, а ті видлӧй кывъястӧ паметяд кутны да ворсны на тшӧтш. Да и мисьтӧм, кор лыддьысьӧны видзӧдысь водзын.
–Бур, мый командаӧй висьмис, – сералыштіс Соколов сиктсаяслӧн капитан Лариса Канева. – Петкӧдчим эськӧ кыдзи оз позь петкӧдчынысӧ.
Печораын гажсӧ нуӧдіс том коми войтырлӧн «МИ» котырӧн веськӧдлысь Анна Махотина.
– Тайӧ менам олӧмын выль тшупӧд, – тӧдчӧдіс ныв. – КВН-ын ворслі, а жюриӧ оз на лэдзны. Талун кӧть Масляков пыдди сулышта.
«Спутник» да ветеринар
«Некытчӧ туйтӧмъясӧн» веськӧдліс Надежда Пыстина, «Рӧмпӧштанӧн» – Ольга Хасанова. Капитанъяс «из-шыран-кабала» ворсӧмӧн индісны, коді первойӧн петкӧдчас сцена вылын. Медводз йӧзсӧ гажӧдны мойвиис «Рӧмпӧштанлы».
Орччӧдны кӧ кык командалысь петкӧдчӧмсӧ, «Рӧмпӧштан» шмонитіс паськыдджык темаяс вылӧ, тшӧтш и пандемиякӧд йитӧдын:
«Кыдзи ӧні верӧсыдкӧд овны, тэ дорӧ кӧ «спутникӧс» [ковидысь вакцина] овмӧдны кӧсйӧны?».
Тшӧкыда кыпӧдлісны и пенсия вылӧ петан арлыд содтӧм кузя мытшӧдсӧ, овнысӧ пӧ ӧні дышӧдтӧдз ковмас, а уджавнысӧ – кувтӧдз.
«Некытчӧ туйтӧмъяс» медсясӧ шмонитісны асланыс сиктын гӧрӧдъяс йылысь. Приуральскӧйын фельдшерыс абу да, йӧзӧс бурдӧдны волӧ ветеринар: «Китӧ черӧн керыштін – кыкысь лун кӧ ки вылад кудзыштан, ставыс бурдас». Да и некытчӧ туйтӧмъясӧн пӧ эгӧ асьным лоӧй, чиновникъяс миянӧс татшӧмӧн вӧчисны – туйным некытчӧ абу.
Сёрӧнджык гажсӧ донъялысьяс шуисны вежны приуральскӧйсаяслы нимсӧ: кыдз пӧ карабтӧ нимтан, сідзи сійӧ и кывтас.
«Рӧмпӧштанлысь» юалі жӧ, мыйла тадзи асьнысӧ шуӧмаӧсь.
–Командалӧн нимыс зэв ӧдйӧ чужис, – пасйис Ольга Хасанова. – Рӧмпӧштанад ӧд асьтӧ аддзан сэтшӧмӧн, кутшӧм тэ збыльвылас. Сцена вылын ми олӧмсӧ веськыда петкӧдлам, и видзӧдысьыс быттьӧ рӧмпӧштан пыр ставсӧ аддзас.
«Биатлонын» командаяс ӧта-мӧд бӧрся висьталісны шмонь, а жюрилы колӧ вӧлі бӧрйыны серамбана-джык котырсӧ. Тайӧ тшупӧдыс лои медся кузь – донъялысьяс некымынысь корисны висьтавны содтӧд теш.
«Туйтӧмъясыд» зэв на и туянаӧсь
Жюриӧ Анжелика Елфимова да Наталья Шахова кындзи нӧшта пырисны «Лючки-ладнӧ» командаын ворсысь Денис Рокин да Печора районса культура управлениеысь специалист Яна Габова. Донъялысьяс кывкӧрталісны, мый ӧти балл вылӧ тешкодьджыкӧсь вӧліны Приуральскӧйысь «Некытчӧ туйтӧмъяс». Налы и вичмис I тшупӧда диплом.
Меным мойвиис бӧрйыны медся серамбана ворсысьсӧ да «Коми йӧзӧдчан керка» нимсянь козьнавны сылы козинбокс. Буретш татшӧм – «Рӧмпӧштан» командаысь Владимир Беляев. Том зонлӧн и сцена вылын, и олӧмас чужӧм вывсьыс нюмыс оз куслы.
–Ачым Инта районса Роговӧй грездысь. Велӧдча Печораса речнӧй училищеын, мӧдӧд во уджала ю вылын, – гаж помасьӧм бӧрын висьталіс ас йывсьыс Владимир. – Тайӧ вӧлі менам медводдза КВН на, но полӧм-майшасьӧм эз вӧв, ӧд тшӧкыда йӧз водзын сцена вылын петкӧдча.
–КВН-ын петкӧдчыны миянӧс ышӧдіс Олег Исаков, – тӧдчӧдіс Ольга Макарова, «Некытчӧ туйтӧмъяс» командаын ворсысь. – Медводз повзим: мися, кутшӧм нӧ ми КВН-щикъяс? Репетиция дырйи сералім, шмоньсӧ чукӧртім ас олӧмысь. Бӧръя лунъясӧ ёна майшасим, артмас-ӧ петкӧдчынысӧ. Но ставыс лои репетицияясысь бурджыка на!
Жюриӧ пырӧдчысьяс да гӧсьтъяс шуисны видзӧдны-донъявны Печораысь командаяссӧ и таво Сыктывкарын республикаса КВН вылын.
* * *
– Печораын комиыс абу этша, – висьталісны гаж бӧрын сэні ворсысьяс. – Но мыйлакӧ яндысьӧны ас-ланыс коми вужъяссьыныс. Зэв ёна кӧсъям, медым миян медводдза КВН-ным ыззьӧдас том войтырӧс, да найӧ котыртасны выль командаяс.
Рочмӧм войвылын коми шмоньыс йӧзсӧ ӧтувтіс. Мед эськӧ и водзӧ вылӧ тадзи лоас.
Ирина Терентьева.