Кӧрткерӧс районса Одыбын олысьяс шыӧдчӧмаӧсь Коми Республикаса юралысь да Россияса президент дорӧ восьса письмӧӧн. Юӧртӧмаӧсь, мый сиктсьыс тупкӧмаӧсь аптека.
Одыбсалӧн висьталӧм серти, аптекаыс меститчылӧма сиктса амбулаторияын. И со тавося февраль 12 лунсянь сійӧ пӧдса.
Сиктсаӧс бырӧдӧмӧн бырӧдӧны
—Пӧдлалісны Россия Федерацияса правительстволысь кольӧмвося декабрь 31 лунся 2.463-ӧд номера выль постановление вынсьӧдӧм бӧрын, код серти быть колӧ маркируйтны лекарствояссӧ. А миян аптекаын абу торъя оборудованиеыс, мед лыддьыны медпрепаратлысь сідз шусяна штрих-кодсӧ. Одыбӧ лекарство-уколсӧ Коми Республикаса государственнӧй аптекаысь вӧлі вайӧ Кӧрткерӧс районса шӧр больнича. Тайӧ госучреждениеясыс, кыдзи миянлы тӧдса, оз кӧсйыны ньӧбны сиктса аптекалы колана оборудованиесӧ. Шуӧны, мый та вылӧ налӧн сьӧмыс оз лишав. А миянлы кыдзи овны? – майшасьӧны одыбса.
–Одыбкӧд орчча сиктъясас аптекаыс абу жӧ. Ковмас кӧ лекарство, колӧ лэччывны Шойнатыӧ (сэтчӧдз 67 километр), Кӧрткерӧсӧдз (120 километр) либӧ Сыктывкарӧдз (160 километр), – водзӧ висьталӧны найӧ. – Рейсӧвӧй автобус оз быд лун лэччыв. Да и билетыс абу донтӧм. Шуам, Шойнатыӧдз ӧтарӧ-мӧдарӧсӧ колӧ мынтыны 500 шайт, Кӧрткерӧсӧдз – 600. Одыбысь автобусыс петӧ асывнас 6 час 30 минутын, а бӧрсӧ воӧ рытнас сизим час да джынйын. Ни Шойнатыын, ни Кӧрткерӧсын автобус виччысяніныс абу. Нӧшта на и Висер–Одыб костын тулыс-арнас туйыс шогмытӧм. Зэра гожӧмӧ – рунь жӧ. Позьӧ ӧмӧй вӧлі пӧдлавны аптекасӧ?! Али миян чинаяс оз тӧдны та йылысь?
Крепыд дзоньвидзалунӧн некод оз вермы ошйысьны. Шуам, кодкӧ висьмас насмукаӧн, гриппӧн, ОРВИ-ӧн, кӧвъясяс кутшӧмкӧ мӧд вуджан вирус – кытысь ньӧбны лекарствосӧ? Мӧдӧд во нин коронавируслы паныд тышкасям. А кыдзи овны налы, кодлӧн диабет, астма, гипертония, сьӧлӧмыс висьӧ? Ӧдвакӧ та кузя вӧлӧктӧ верман вуджны…
«Земскӧй доктор» уджтас серти Одыбӧ воис том терапевт. Кыдзи сылы бурдӧдны йӧзсӧ? Шуас висьысьлы, колӧ пӧ юны татшӧм лекарство, сюйны укол, и вӧзъяс лэччывны нала Кӧрткерӧсӧдз?!
Коми Республикаын йӧзлысь дзоньвидзалун видзан министерстволӧн вочакывйысь одыбсалӧн сьӧлӧмыс абу бурмӧма. Регионса ведомство подуласьӧ Россия Федерациялӧн индӧд вылӧ, кӧні пасйӧма, мый быть колӧ маркируйтны бурдӧд-чан препаратъяссӧ. Тайӧ пӧ вӧчсьӧ сы могысь, мед эз вӧв ылӧга лекарствоыс.
Дерт, сиктсаяс тшӧтш кӧсйӧны бурдӧдчыны бур лекарство-уколӧн, но сідзжӧ чайтӧны, мый оз позь вынсьӧдны татшӧм оланпассӧ, коді бырӧдӧмӧн бырӧдӧ йӧзсӧ. Одыбын да и мукӧд сикт-грездын тшӧтш колӧ бӧр восьтыны аптекасӧ. А торъя ведомствояслӧн могыс – синйыны, мед оз во бурдӧдчанінӧдз шогмытӧм лекарствоыс.
Эскам, бӧр восьтасны
Февраль 15 лунӧ Госсӧветысь депутатъяс видлалӧмаӧсь жӧ тайӧ гӧрӧдсӧ да шуӧмаӧсь, мый сиктса ФАП-ясӧ, амбулаторияясӧ лекарство-уколсӧ кутасны бӧр вайны.
Тайӧ могыс пӧ лоас карса да районса больничаяслӧн.
Налы ковмас сёрнитчыны сідз шусяна поставщикъяскӧд, а сэсся могмӧдны ылі сикт-грездъясын олысьясӧс бурдӧдчаннас.
А неважӧн Госдума шуӧма вежыштны лекарствояс кузя вынсьӧдӧм выль оланпассӧ.
Депутатъяслӧн кывъяс серти, ылі сикт-грездӧ, кытчӧ аптекасӧ восьтыны «абу рентабельнӧ», кутас ветлыны торъя транспорт.
–Лоас оз тӧлкыс сідз шусяна «кӧлеса вылын аптекаысь»? – юалі одыбсалысь.
–Оз, – вочавидзисны сиктсаяс. – Висьтавлім нин, миян сиктӧдз, овлӧ, сьӧкыд воӧдчыны. Да и лекарствоыс вермас ковмыны талун, а оз аски либӧ аскомысь. Эскам, Одыбын аптекасӧ бӧр восьтасны.
А ӧні жырйыс куш, став лекарствосӧ лэччӧдісны, гашкӧ, Кӧрткерӧсса райбольничаӧ либӧ нӧшта кытчӧкӧ…
Екатерина МАКАРОВА.