Январь помын власьт тэчасын, бизнесын уджалысьяс да общественнӧй котыръясын водзмӧстчысьяс «гӧгрӧс пызан» сайын сёрнитісны шыблас торйӧдлӧмӧн чукӧртӧм йылысь.
Та бӧрын республикаса правительствоӧн веськӧдлысьӧс вежысь Ирина Бахтина аддзысьліс шыблас чукӧртысь-переработайтысьяскӧд, кӧні найӧ юксисны чина морткӧд асланыс тӧжд-могӧн.
«Переработка вторичного сырья» предприятиеӧн веськӧдлысь Александр Неськинлӧн кывъяс серти, шыблас чукӧртӧм-переработайтӧмыд пӧ та вылӧ видзӧм сьӧмсӧ оз бергӧд. И век жӧ тайӧ предприятиеыс босьтчӧма кослунъя вый да йӧв-сок улысь тыртӧм дозмуксӧ босьтавны.
Ирина Бахтина юаліс сылысь, мӧдас-ӧ компанияыс и стеклӧ доз примитны? Бизнесмен вочавидзис, вермам пӧ тайӧс вӧчны, переработайтан предприятиеыс кӧ кутас вештыны транспортӧн вӧдитчӧмысь рӧскодсӧ, ӧд матысса татшӧм предприятиеыс меститчӧ Санкт-Петербургын, и ичӧт бизнеслы сэтчӧ стеклӧ дозмуксӧ нуны сувтас вывті дона.
«Комиэковтор» чукӧртӧ шыблассӧ Сыктывкарын, Ухтаын, Визинын, Изьва районса Щельяюрын. Компанияӧн веськӧдлысь Алексей Блещук пасйис, государствосянь пӧ ыджыд отсӧгсӧ ог виччысьӧй. Гашкӧ пӧ, биысь рӧскодсӧ мед сӧмын вештасны. Но медым кызвын районас шыблас чукӧртанінсӧ котыртны, республикаса власьт тэчассянь отсӧгтӧг компаниялӧн выныс оз тырмы.
Ирина Бахтина висьталіс, «Му-васа озырлунӧн вӧдитчӧм да вӧр-ва видзӧм» программа серти пӧ шыблассӧ торйӧдлӧмӧн чукӧртӧм вылӧ быд во муниципалитетъяслы вичмӧдӧны 5,5-6 миллион шайт. Но ӧткымын районын пӧ тайӧ сьӧмнас оз колана ногӧн вӧдитчыны.
–Колӧ выльысь видлавны да вежны бюджетысь сьӧм вичмӧданногсӧ, – шуис сійӧ. – Могыс миян – вӧчны сідзи, медым быд мортлӧн вӧлі позянлун торйӧдлӧмӧн мынтӧдчыны шыблассьыс, и мед чукӧртӧм сідз шусяна утильыс воис сійӧс переработайтысьясӧдз.
Правительствоӧн веськӧдлысьӧс вежысь корис бизнесменъясӧс вӧзйыны шыблас чукӧртӧм-переработайтӧм кузя ассьыныс мӧвпъяссӧ да кӧсйысис вӧр-ва видзан министерствоын уджалысьяскӧд волыны налӧн предприятиеясӧ тӧдмасьны сэні вӧдитчан технологияясӧн.