Чилимдін районса Карпушевка грездын воссис выль социокультурнӧй шӧрин, кодӧс кыпӧдӧмаӧсь Коми Республикаса правительство да «ЛУКОЙЛ» ПАО костын социальнӧя ёртасьӧм йылысь сёрнитчӧм серти.
Стрӧитчан уджсӧ, а сідзжӧ выль пызан-улӧс-шкап да оборудование ньӧбӧм вылӧ став рӧскодсӧ артыштӧмӧн видзӧмаӧсь 42,5 миллион шайт.
Тайӧ шӧринсӧ восьтӧмкӧд йитӧдын кыпыд чукӧртчылӧм дырйи Карпушевкаын олысьясӧс чолӧмалісны регионса юралысь Владимир Уйба да Коми Государственнӧй Сӧветысь депутат, «ЛУКОЙЛ-Коми» ООО-са генеральнӧй директорӧс вежысь Евгения Лясковская.
Владимир Уйба аттьӧаліс «ЛУКОЙЛ» компанияӧн веськӧдлысьясӧс республикалӧн 100 вося юбилей кежлӧ сиктса йӧзлы татшӧм колана бур козинысь да эскӧдіс, мый выль кыпыд да югыд социокультурнӧй шӧрин отсалас тшӧтш водзӧ сӧвмӧдны Чилимдін районын туризм.
Евгения Лясковскаялӧн кывъяс серти, сиктса йӧзлӧн лоас тӧдчымӧн унджык позянлун видзны да водзӧ озырмӧдны татчӧс войтырлысь нэмӧвӧйся аслыспӧлӧс традицияяссӧ да бур оласногсӧ, мыйӧн нималӧ налӧн чужан муыс.