Январь 26 лунӧ Изьва районса коми войтырлӧн конференция дырйи сёрнитісны муниципалитетса экономикалы да социальнӧй юкӧнлы колана специалистъясӧс дасьтӧм да велӧдчысьяскӧд профессия бӧръян удж котыртӧм йылысь. Видеойитӧдӧн нуӧдӧм чукӧртчылӧмӧ пырӧдчис тшӧтш Коми Республикаса юралысь Владимир Уйба.
–Специалистыс оз тырмы оз сӧмын Изьва, но и мукӧд районын, – висьталіс сійӧ. – Тайӧ мытшӧдсӧ венӧм могысь колӧ бурмӧдны сиктса йӧзлысь олӧмсӧ, вӧчны став позянасӧ, мед налы и уджавсис кыпыда, и шойччыссис лӧсьыда, мый зэв жӧ тӧдчана, торйӧн нин томуловлы. Тайӧ нырвизьясас ӧні и зільӧ правительство.
Чукӧртчӧмаяс пасйисны, мый том йӧзӧс колӧ ышӧдны профессия босьтӧм бӧрас локны ас районӧ. Республикаса экономика сӧвмӧдан да промышленносьт министерстволӧн туялӧм серти, Изьва районын 2027 воӧдз быд во кутасны виччысьны 16-40 том специалистӧс. А районса школаясын 9-ӧд да 11-ӧд классӧ вонас помалӧ 250 гӧгӧр морт.
Вӧлі тшӧтш пасйӧма, мый колӧ паськыдджыка тӧдмӧдны томуловӧс, кутшӧм отсӧг вичмӧдӧны сиктӧ уджавны воӧм специалистъяслы. Сідз, бурдӧдысьяслы мынтӧны компенсация, и «Земский докторӦземский фельдшер» программа серти Изьва районын сьӧмсӧ босьтӧма нин 21 морт.
Видз-му овмӧсын зільысь специалистъяслы вештӧны 500 сюрс, уджалысьяслы – 300 сюрс шайт субсидия. Отсалӧны сьӧмӧн и керка лэптігӧн либӧ оланін ньӧбигӧн. Фермеравны босьтчысьяслы тшӧтш жӧ вичмӧдӧны отсӧгсӧ.
Конференцияса делегатъяслысь вӧзйӧмъяссӧ пыртісны резолюцияӧ. Сійӧс видлаласны республикаса да районса власьт тэчасъясын, медым видзӧдлыны, мый ковмас вӧчны чукӧртчӧмлысь помшуӧмсӧ збыльмӧдӧм могысь.