«Монди Сыктывкарса ЛПК»-лӧн уджыс топыда йитчӧма юркарса Эжва районкӧд да, комбинат уна во нин пуктӧ ассьыс пай сійӧс сӧвмӧдӧмӧ. Торйӧн кӧ, социальнӧй да экономика юкӧнын ёртасьӧм кузя сёрнитчӧм серти кольӧм во предприятие вичмӧдіс Эжвалы 2,4 миллион шайт.
Тайӧ сьӧмсьыс 1 миллион дон лои бурмӧдӧма культура учреждениеяслысь материально-техническӧй подувсӧ. Дасьтӧма Бумажникъяслӧн культура дворечлысь ывлавывса сценасӧ выльмӧдӧм кузя уджтас, коронавируса висьӧмысь видзчысьӧм могысь ньӧбӧма сэтчӧ сынӧд весалан рециркуляторъяс да температура инмӧдчывтӧг туялан термометръяс. Таысь кындзи лои снимайтӧма Эжваӧ туристъясӧс волыны ышӧдӧм могысь видеоклип, лӧсьӧдчӧны йӧзӧдны туй индалан небӧг.
«Монди Сыктывкарса ЛПК»-сянь 800 сюрс шайт вичмис уна сикас культура гаж да фестиваль-конкурс котыртӧм могысь. Шуам, пандемияӧдз на комбинат отсӧгӧн Эжваын кыпыда пасйисны Йӧввыв – кольӧм воӧ уна йӧза бӧръя гаж. Та бӧрын татшӧм чукӧртчылӧмъяссӧ мӧдісны котыртлыны онлайн да, кольӧм сьӧмыс муніс сы вылӧ.
Комбинат отсаліс сьӧмӧн и спортлы сиӧм «Лыжня России», «Лыжня дошколят» да «Лыжня здоровья» гажъяс нуӧдӧмын.
«Монди Сыктывкарса ЛПК» пуктіс пай и Выль во кежлӧ Эжва мичмӧдӧмӧ. Сідз, лои кыпӧдӧма выльвося каръяс, уна рӧмӧн югзьӧдӧма Слава улича, вӧчӧма исласян чойяс да лымйысь лабиринтъяс.
Нӧшта 300 сюрс шайт предприятие вичмӧдіс 11-ӧд да 98-ӧд номеръяса садъясӧ ветлысь зонпосниӧс витаминӧн могмӧдӧм вылӧ. 98-ӧд детсадйӧн веськӧдлысь Татьяна Тимкиналӧн висьталӧм серти, посниуловлысь дзоньвидзалунсӧ ёнмӧдӧмын комбинат водзмӧстчӧ некымын во нин. «Монди Сыктывкарса ЛПК»-лӧн сьӧма отсӧгӧн детсадйын во гӧгӧр чӧж чӧсмӧдлӧны челядьӧс быдсикас сокӧн да фруктыӧн – яблӧгӧн, бананӧн да апельсинӧн, гожӧмнас ньӧбӧны ӧгуреч да помидор.
–Миян детсадйӧ ветлӧны 3-сянь 8 арӧсӧдз 130 нывка да зонка. Ставныс найӧ слаб дзоньвидзалунаӧсь: омӧля аддзӧны, сьӧкыда вӧрӧны-ветлӧны, лёка сёрнитӧны, торксьӧм психикааӧсь. И татшӧмъясыслы торйӧн нин тӧдчана пӧтӧса да тыр-бура сёйнысӧ. «Монди Сыктывкарса ЛПК» отсӧгӧн миян челядь быд лун чӧсмасьӧны фрукты-сокӧн. Аттьӧ комбинатлы посниулов вӧсна ыджыд тӧждысь, – пасйис Татьяна Тимкина.
Татшӧм витамина вӧлӧганас предприятиелӧн сьӧм весьтӧ могмӧдӧны и 11-ӧд номера детсадйӧ котралысь 405 нывкаӧс да зонкаӧс.
Эжвалы ыджыд да зэв колана отсӧгысь аттьӧаліс «Монди Сыктывкарса ЛПК»-ын зільысьясӧс и районса администрацияӧн веськӧдлысь Сергей Воронин: «Сьӧлӧмсянь аттьӧ предприятиелы да торйӧн нин генеральнӧй директор Клаус Пеллерлы бур вӧчӧмысь, Эжвалы отсӧг вичмӧдӧмысь. Эска, и водзӧ кутам топыда ёртасьны да чужанін сӧвмӧдӧм могысь ӧтув унатор вежам бурланьӧ. Сиа «Монди Сыктывкарса ЛПК»-ын став уджалысьыслы выль воын вермӧмъяс да тыр-бур олӧм».
«Комиинформ» агентстволӧн юӧр серти.
Снимокъясыс Эжва районса администрацияысь.