Турун пуктӧм казьтыла…

«Коми му» газет водзӧ нуӧдӧ социальнӧй тӧдчанлуна «Комиыд и Филиппиныын коми» гранта уджтас. Талун миян гӧсьт – ылі шоныд Турцияын олысь коми ныв Елизавета Вурал. Вайӧ матысяньджык сыкӧд тӧдмасям.

Велӧдчӧм да Турция ӧтувтчӧмаӧсь

Кӧрткерӧс районысь Шойнатыса школа помалӧм бӧрын Елизавета (сэки Ширяева на) пырӧма велӧдчыны Сыктывкарса канму университетысь «Теория и методика преподавания иностранных языков» факультетӧ да сійӧс помалӧм бӧрын босьтӧма «лингвист-преподаватель» специальносьт. И ӧд буретш тайӧ нырвизьын велӧдчӧмыс регыдъя кадӧн вежӧма-бергӧдӧма нывлысь водзӧ олӧмсӧ…

Мӧд курсын велӧдчигас Лиза веськалӧма Санкт-Петербургса госуниверситет бердын котыртӧм «Пеликен» гожся лингвистическӧй школаӧ. И сэні ныв тӧдмасьӧма верӧспуыскӧд, коді локтӧма Россияӧ ёртыслӧн корӧм серти отсавны сылы ӧдйӧджык велӧдны роч кыв. Том морт студенталігас гожӧмъяснас уджавлӧма туризм нырвизьын, медым нажӧвитны велӧдчӧм вылас, та понда бура тӧдӧма роч кывтӧ. Со тадзи Лизалӧн олӧмыс вӧляникысь кутӧма йитчыны Турциякӧд…

Водзӧ велӧдчигас Лиза унаысь на пырӧдчылӧма быдсикас проектӧ да конференцияӧ. И медводдзаысь Турцияӧ ветлӧма абу шойччыны-гожйӧдчыны, а англия кыв школаын велӧданног серти войтыркостса студентъяслӧн конференция вылӧ. Весиг диплом уджыс нин нывлӧн йитчӧма Турциякӧд да шусьӧма «Особенности межкультурного взаимодействия на английском языке в многонациональных семьях (на примере Турции)». Да и бӧръя курсас тӧлысь чӧж практикуйтчӧма бара жӧ Турцияын.

Радейтана верӧс пыр орччӧн

И со квайт во нин Елизавета олӧ Средиземнӧй саридзбердса Белек курорта карын. Верӧссӧ шуӧны Мехмет. Ӧтлаасьӧмаӧсь радейтана пӧлыскӧд гожӧмнас, бӧръя курс помалӧм водзын. Мехмет велӧдӧ шӧр школаын георгафия да история. Шуда гозъя быдтӧны Ясмина да Дерья муса нылукъясӧс. Ӧні Лиза гортас пукалӧ – быдтысьӧ (вӧлӧмкӧ, Турцияын абу сэтшӧм нырвизь, кыдзи школаӧдзса велӧдӧм, да оз и корны-тшӧктыны быть новлӧдлыны челядьтӧ детсадйӧ).

Первой кадсӧ, дерт, Елизаветалы сьӧкыдкодь вӧлӧма мӧд муад: ёртъяс абуӧсь, кывтӧ он тӧд. Сӧмын радейтана верӧс орччӧн. А сэсся вочасӧн велалӧма овны мӧд муын, пыдди пуктыны вужвойтырлысь традиция-обычай.

–Менам верӧслӧн мукӧдсьыс нинӧмӧн торъявтӧм семья, – висьталӧ Лиза. –Накӧд первойсяньыс тӧдмасьӧм бӧрын куті велавны став выльторйӧ (аттьӧ, верӧс пыр сӧвет сетліс кыдз да мый). Турцияын эм обычай – паныдасигӧн да янсӧдчигӧн окыштны верстьӧджык да олӧмаджык мортлысь кисӧ, тшӧтш и торъя гаж дырйи, весиг дзик тӧдтӧм мортлы. Сэсся первойсӧ аслым эз вӧв лӧсьыд, мый вывті ыджыд ме дорӧ (налы ӧд ме – иностранка) вниманньӧыс. Да сэсся ме – дзик еджыд юрсиа на дай! Первой кадсӧ весиг шонді сайын сотчавлі-гожъявлі, ёна сэки шогсисны верӧслӧн бать-мамыс: кыдзи бара-й пӧ кутан тані овны?

А со тай велалӧма нин. Елизаветалӧн верӧсыс – ӧтка пи. Ставнас семьяыс пыр ӧтлаын вӧлӧма, со тадзи вочасӧн и ставныс дорӧ велалӧма. Кык во сайын Мехметлысь батьсӧ дзебӧмаӧсь, ёна сьӧкыд вӧлӧма, но тайӧ шогыс матыстӧма семьясӧ ӧта-мӧд дорас, да и мӧд кывъяс Лиза ӧдйӧджык велалӧма.

Коми кывйыд отсалӧма

Ӧні Лиза зэв нин бура сёрнитӧ турецкӧй кывйӧн. Ачыс велӧдӧма, весиг пӧ некутшӧм акцент абу нин. Тані коми кыв тӧдӧмыс ёна отсалӧма. Мукӧд шыпасыс пӧ ӧткодьӧсь коми «ӧ» да «і» дорӧ, а тшӧтш «ы» шыпасыс тшӧкыда кывъясас паныдасьлӧ, сідз шусяна агглютинативнӧя кыв артмӧмыс ӧткодь и комиын, и турецкӧйын. Буретш ставыс тайӧ отсалӧма Елизаветалы ӧдйӧ велавны мӧд кывйӧ.

Семьяас сёрнитӧны рочӧн, вӧляникысь тшӧтш и английскӧй пыртӧны. Но кор нылукъясыс кылӧны мамыслысь комиӧн сёрнитӧмсӧ – окотапырысь бӧрсяньыс шуалӧны, да весиг пӧ роч дорсьыс бурджыка сёрниыс артмӧ. Тані нин мӧдарӧ – турецкӧй кыв тӧдӧмыс пӧ налы отсалӧ.

–Налы збыльысь кокньыдджык коми кывъяссӧ шуавны, – водзӧ юксьӧ Лиза. – Ӧні нин менам бать-мам дорӧ ыджыд мамӧн да ыджыд батьӧн окотапырысь шыӧдчӧны. Водігӧн ӧта-мӧдлы пыр комиӧн шуам «Бур вой», кужам нин дасӧдз лыддьыны. Мӧвпала нин и коминас нылукъясӧс ёнджыка велӧдны, весиг асьныс мукӧддырйи корӧны налы коми книга лыддьыны, кӧть эськӧ оз гӧгӧрвоны нинӧм, но зэв сюся кывзӧны.

Колӧ пасйыны, мый Лиза университетас велӧдчигас коми кывтӧ некор жӧ абу вунӧдлӧма. И том йӧзлӧн «МИ» котырын водзмӧстчылӧма, и том гижысьяслӧн Гожся университетын Павел Симпелев дорын тӧдӧмлун босьтӧма, и финн-йӧгра факультетсакӧд ёртасьлӧма, и Марина Серафимовна Фединакӧд Германияӧ ветлӧма. Мед, суйӧрсайса кыв кӧ велӧдӧма – уна курсӧвӧй удж да доклад гижлӧма коми кыв да культура йылысь.

Рамазан да Курбан-байрам

Юалі Лизалысь, мися, ёна-ӧ торъялӧны миян традиционнӧй гажъясыс турецкӧйысь, да кыдзи тэ найӧс пасйывлан?

–Бать-мам дорын олігӧн, дерт, и выльвоасьлім да чужанлунасьлім, тшӧтш и Ыджыд лунӧ чипан кольктӧ баситлім. Тані ме тшӧтш ставсӧ тайӧс пасъя, – висьталӧ Лиза. – Но верӧс семьяын сэтшӧм паськыда да озыра Выль вотӧ оз пасйыны, ӧнӧдз на Мехмет оз гӧгӧрво, мыйла пӧ колӧ сы мында сёян-юан да нӧшта на уна сьӧм тайӧ гаж вылас видзны?! А менам ӧд велалӧма нин вӧлі гортӧ вайны пашкыр коз, таз тыр салат вӧчны – та понда первойя кадсӧ ставыс тайӧ меным зэв ёна оз вӧлі тырмы. Но козтӧ Выль во кежлад ми быть пуктам, а ӧні нин нылукъяскӧд Ыджыд лун кежлӧ чипан кольктӧ ӧтув мичмӧдам. А сэсся миян роча-турецкӧй ёртъяс эмӧсь – Россияса гажъястӧ пасйывлам жӧ.

Дерт, Елизавета аслас семьякӧд и Турцияса ыджыд да тӧдчана, кыдз канмуса, сідз и налӧн религияса, гажъяс ӧтув пасйыны велалӧма.

Медшӧр гажъяс – Рамазан да Курбан-байрам дырйи – став рӧдвужнас чукӧртчывлӧны, гӧститӧны ӧта-мӧд дорас.

А тшӧтш и сюннет (зонкаяслӧн обрезание да мевлют (кулӧмаӧс казьтылӧм) вылӧ ветлывлӧны.

Картупель, тшак да турун пуктӧм

Елизаветакӧд сёрни сигӧртігӧн юалі: «А мыйысь нӧ медъёна гажыд бырӧ чужанінтӧ казьтылігӧн?».

Дерт, Лиза гажтӧмтчӧ бать-мамсьыс, чойяссьыс, племянничаяссьыс. Став матысса рӧдвужыс сылӧн олӧны Комиын. Лиза зільӧ быд во гортас волыны, но кольӧм во абу артмӧма. Бур пӧ, ӧні кӧть видеосвязьыд эм – гортсаясыскӧд быд лун сёрнитӧны.

–Нӧшта тӧлысь ёна гажтӧмтча! Лымйысь! Чужан сиктысь, ас керкаысь, сьӧлӧмлы дона местаясысь. Ӧд джын олӧмӧй сэні колис, – висьталӧ Лиза. – А кутшӧма тшак сёйыштны кӧсъя! Да парма-ягса вотӧс! Тані эськӧ эм жӧ тшакыд, но кызвыннас сӧмын шампиньон быдтӧны. Вотӧсыд эм жӧ, но зэв дона. Чӧдйыс гырысь, да и кӧрыс абу. А выль картупельысь кыдзи гаж быри! Торйӧн нин жаритыштны кӧ сійӧс латкаын да нӧшта на тшакӧн. А ас мӧслӧн гортса йӧв… Некор оз вун сылӧн кӧрыс. Э-эк… Турцияын мӧс вӧра йӧвтӧ оз юны, быть пузьӧдӧны, уфф… Да и рысьтӧ оз вузавны, ме ачым вӧча.

А сэсся кор татысь газонокосилкаӧн турунсӧ ытшкӧны – турун пуктан кад дум вылӧ воӧ. Пыр казьтыла…

* * *

Став сьӧлӧмсянь сиа Лизалы да сылӧн семьялы став бурсӧ! Инӧн-ладӧн водзӧ овны да дзоньвидзаӧн лоны! Мед эськӧ тшӧкыдджыка артмывлас чужанінад волӧмыс да некор оз ор сыкӧд йитӧдыс.

Галина МАКАРОВА.

Снимокъясыс Елизавета ВураллӦн гортса архивысь.

Турун пуктӧм казьтыла…

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх