Коми мулӧн мыла гӧлӧса роч лэбач

Марина Владимировна Евдокимова, Воркута карысь кагульнича, сьылӧ «Югыд войяс» ансамбльын.

Сыктывкарса педколледж помалӧм бӧрын томиник Марина квайт во уджалӧма посни челядьӧс музыкаӧ велӧдысьӧн. А сэсся помалӧма Р.Валленберг нима войтыркостса университетын семьялӧн да кагалӧн торъя педагогика да психология кузя институт. И ӧнӧдз зільӧ Воркутаын 18-ӧд номера детсадйын велӧдысь-дефектологӧн.

2017 воын Марина Владимировна лоӧма Воркута карса кагульничаяслӧн «Воспитатель года-2017» конкурсын вермысьӧн. И республикаса татшӧм ордйысьӧмын сійӧс шуӧмаӧсь медбурӧн. А Россияса тшупӧдын пасйӧмаӧсь «Особенная педагогика» нимпасын торъя призӧн.

Марина Владимировнаӧс ме тӧда уна во нин. Татшӧм восьса сьӧлӧма мортыс этша. А сылӧн уджыс зэв кывкутана да сьӧкыд. Оз быд кагульнича вермы лунысь-лун сетны ассьыс сьӧлӧм-ловсӧ да муслунсӧ нёрпалысь челядьлы, сӧвмӧдны вежӧрсӧ сьӧкыда сёрнитысь дзолюкъяслысь.

Марина Владимировна велӧдӧ зон-посникӧд тайӧ уджас тшӧтш и кагукъясыслысь мам-батьсӧ, республикаса консультационнӧй шӧринын юксьӧ тӧдӧмлуннас, кыдзи отсавны слаб дзоньвидзалуна челядьлы сӧвмыны.

Прӧст кадыс Мариналӧн пӧшти абу. Но ичӧтсяньыс на сійӧ радейтӧма сьывны. Ӧтчыд национальнӧй культураяс шӧринӧ репетиция вылӧ вайӧдӧма детсадйӧ ветлысь нывкасӧ, кылӧма сэні «Югыд войяс» ансамбльлысь ливкйӧдлӧмсӧ да вӧзйысьӧма тшӧтш сьывны.

И дас воысь дырджык нин Марина Владимировна сьылӧ аслас мыла гӧлӧсӧн. Татшӧма, кыдзи радейтӧ тайӧ нывбабаыс коми сьыланкывъяссӧ, оз став комиыс радейт.

—Менӧ эз повзьӧд сiйӧ, мый ог тӧд коми кывсӧ, — висьтасис Марина Владимировна. — Сыктывкарын педколледжын ми велӧдiм коми литература, неуна коми кыв, сьылiм коми сьыланкывъяс. А кор ме медводдзаысь кылi, кыдзи «Югыд войяс» ансамбль сьылӧ «Ой ты, речка Ижма», ме бӧрддзи, сэтшӧма сійӧ йиджис сьӧлӧмӧ да. Зэв ёна кажитчӧ меным коми шыладыс. А торйӧн нин ёна, дерт, кывъясыс. Кор меным нывъяс вуджӧдӧны сьыланысь кывъяссӧ роч вылӧ, мед ме тӧді, мый йылысь ливкйӧдла, век шензя, кутшӧм пыдiсянь да югыда воссьӧ Коми му да олӧм дорӧ муслуныс. Мукӧддырйиыс весиг синваӧй доршасьлӧ. «Менам чужанінын» — сэтшӧм мича сьыланкыв! Мича юсь йылысь, еджыд лым йылысь! Кыдзи нӧ он радейт Коми мутӧ?!

Менӧ удж вылын первой оз вӧлі гӧгӧрвоны. Мыйла пӧ тэныд тайӧ колӧ? Окота кӧ сьывны, вӧзйысь роч котырӧ, украинечьяс дорӧ, век нин роч кыв дорӧ матынджык. А ме шуа, мися, тi нинӧм он гӧгӧрвоӧй. Чужан мусӧ татшӧм ёна радейтӧмыс оз петкӧдчы налӧн сьыланкывъясын. А ме коми сьыланкывсӧ бура гӧгӧрвоа, тӧда, мый йылысь сьыла, и тайӧ менам вирлы, ловшылы лӧсялӧ.

Чайта, мый ме верма татшӧм югыдторсӧ, кыдзи коми кыв, водзӧ сӧвмӧдны. Менам семьяын нылӧй и пиӧй сьылiсны комиӧн, удж вылын некод нин оз юась, мыйла меным тайӧ колӧ. Быд концерт вылӧ корлывла ассьым став тӧдсаӧс. Сьыланкыв пыр ме и кывсӧ нин ёна бурджыка тӧда. А кор ветлывлам гастрольӧн, коми йӧзкӧд матысяньджык тӧдмасям. Ёна жӧ восьса сьӧлӧмаӧсь, югыд лолаӧсь найӧ!

Коми сьылан менсьым олӧмӧс югзьӧдӧ, шудӧн тыртӧ, выль ёртъясӧс козьналӧ. Чайта, дыр на кута сьывны «Югыд войяскӧд» тшӧтш, сьыланкывъяс пыр ловзьӧдны олӧм кылӧмӧс. И кӧнi кӧть ме ог кут овны, коми сьылан век кутас шыавны менам сьӧлӧмын, — кыпыд лолӧн помаліс сёрнинымӧс Марина Евдокимова.

Светлана Матюшева.

Коми мулӧн мыла гӧлӧса роч лэбач

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх