Телевидение-радио, газетъяс, ӧтуввез пыр да весиг гортӧ волӧмӧн нин погона йӧз ӧлӧдӧны-велӧдӧны миянӧс видзчысьны быдсикас мошенниксьыс. Но ӧтторъя усьӧ син улӧ юӧрыс, мый кодӧскӧ бара на бӧбйӧдлӧмаӧсь. Мыйсӧ весиг оз думышт ылӧдчысьыд! И банкын уджалысьӧн висьтасяс да ним-вичнад тэ дорӧ шыӧдчас, и ӧтуввезйӧ «ВКонтактеӧ» пырас да тэ нимсянь тӧдсаясыдлысь «удждысяс».
Медтшӧкыда, буракӧ, звӧнитӧны «банкын зільысьяс» да корӧны юӧртны банкса карталысь реквизитъяс либӧ тшӧктӧны вуджӧдны сьӧмсӧ мӧд тшӧт вылӧ. Кутӧй тӧд вылын, мый збыль уджалысьяслы татшӧмторсӧ юасьны оз позь! Карта номернытӧ кӧ кӧсйӧны тӧдны да сьӧмтӧ тшӧктӧны кытчӧкӧ вуджӧдны — тайӧ мошенникъяс.
И ӧд уджалӧ юрныс, мед сідз либӧ тадз, но бӧбйӧдлыны кодӧскӧ.
Со неважӧн на «Инстаграмын» ӧти ань юӧртіс, мамӧй пӧ туй выв неминучаӧ веськалӧма, реанимацияын куйлӧ, и кора пӧ отсавны, зэв дона лекарство колӧ ньӧбны да. Тӧдсаясыс эскӧмаӧсь да унаӧн мӧдӧдӧмаӧсь сьӧм. А, вӧлӧмкӧ, аньыслӧн мамыс кувсьӧма 15 во сайын нин. Сӧвесьттӧм мортыд и збыльысь кулӧматӧ ловзьӧдас.
Мошенникыд зэв бура сяммӧ сетны юӧрсӧ. Висьталас, кӧні да кор лоӧма «неминучаыс», кӧні бурдӧдчӧ «доймӧм» мортыс… И йӧзыс эскӧны татшӧмыслы.
Мый, сідзкӧ, вӧчны? Некодлы абу эскыны-отсавны? Отсавны. Но корӧны кӧ сьӧм, звӧнитлӧй, тӧдмалӧй, збыльысь-ӧ отсӧгыс колӧ. И банкын позьӧ жӧ стӧчмӧдны, налӧн-ӧ уджалысьыс звӧнитӧ. Гижасянныд кӧ «тӧдсакӧд», юасьӧй сы йылысь, мый эськӧ тӧдӧ сӧмын ёртныд. Шуам, кор бӧръяысьсӧ аддзысьлінныд, кӧні тӧдмасинныд, мый радейтанныд…
Тӧда, кодсюрӧ радейтӧны мошенникъяслы комиӧн вочавидзны: ӧтиыс сьӧмсӧ ко-рӧ рочӧн, а мӧдыс комиӧн юасьӧ, уна-ӧ пӧ да мый вылӧ колӧ.
Видзчысьӧй асьныд да ӧлӧдӧй матыссаястӧ, торйӧн нин олӧмаджыкъясӧс. Эн лэдзӧй нажӧвитчыны сӧвесьтсӧ воштӧм йӧзыслы.
Ирина Терентьева.