Бӧрӧ коли нӧшта ӧти во. Эз кокни вӧв 2020-ӧдыс миян республикалы, кыдзи и Россияса став мукӧд регионыслы. Пандемияыд мӧрччис и йӧзыслы, и предприятие-организацияяслы.
Но ӧд и бурыс вӧлі жӧ. Сьӧкыдлунъяс вылӧ видзӧдтӧг олӧмыс мунӧ водзӧ. Кольӧм воас бергӧдчылӧмӧн эм мый нимкодьпырысь казьтыштны Войвывса кар-районъясын олысьяслы, кодъяслы мӧйму, кыдзи и воддза воясӧ, тӧдчана отсӧг вичмӧма «ЛУКОЙЛ» ПАО-сянь. Усинскын, Ухтаын, Чилимдін, Изьва, Сосногорск, Вуктыл да Печора районъясын социальнӧй юкӧн сӧвмӧдӧм да йӧзлысь олӧмсӧ водзӧ бурмӧдӧм вылӧ мусир перъян компания бара на видзӧма аслас сьӧмкудйысь миллиардысь унджык шайт.
Пандемиялы паныд водзсасьны
Усинсклы, кӧні «ЛУКОЙЛ» перйӧ ставнас регионын артыштӧмысь джынсьыс унджык мусирсӧ, кольӧм во компаниясянь отсӧгыс вӧлӧма зэв тӧдчана – 400 миллионысь унджык шайт.
Кызвын сьӧмсӧ вичмӧдӧмаӧсь медучреждениеяслы пандемиялы паныд водзсасьӧм могысь. Торйӧн кӧ, ньӧбӧмаӧсь оборудование-аппарат, мед могмӧдны кислородӧн да топӧдӧм сынӧдӧн Усинскса шӧр больничаын вуджан висьӧмысь бурдӧдан отделение. Тайӧ больничаас жӧ лӧсьӧдӧмаӧсь дон босьттӧг ӧтуввезйӧн вӧдитчан Wi-Fi, а сідзжӧ дасьтӧмаӧсь ПЦР-лабораториялы проект-смета.
Содтӧд колӧ пасйыны, мый компанияса президент Вагит Алекперов сетӧма ассьыс сьӧм, мый вылӧ ньӧбӧ-маӧсь ИВЛ да УЗИ аппаратъяс, коронавируслы паныд водзсасян мукӧд колана медоборудование да больничаын уджалысьяслы вуджан висьӧмысь видзчысян паськӧм-маска.
Мусир перйысьяслӧн зільӧм-водзмӧстчӧмӧн Усинскын унатор вӧчӧмаӧсь, мед пандемиякӧд йитӧдын зэв сьӧкыд кадӧ карын олысьяс ловнас эз усьны, мед зонпоснилы эзджык мӧрччы быдсикас мытшӧд-падмӧгыс. Сідз, шӧр изэрдын кыпӧдӧмаӧсь челядьлы аслыспӧлӧс ворсанін, кодӧс вӧчигӧн подуласьӧмаӧсь ВДНХ-ын «Нефть» пави-льонлӧн проект вылӧ. Усинсксаяс окотапырысь волывлӧны шойччыны и «Пламя» стелаа скверӧ.
Воысь-во мичаммӧ и Усинск районса сикт-грездлӧн чужӧмбаныс, бурмӧ сэтчӧс войтырлӧн олӧмыс. Сідз, Щельябӧжын да Мутнӧй Материкын помалан выйынӧсь выль детсадъяс. Сӧстӧммӧ-бурмӧ Нӧвикбӧжын да Усвавомын олысьяслӧн юан ваыс. Усвавомын жӧ шуӧма кыпӧдны выль ӧтувъя пывсян.
Мусир перйысьяссянь сикт-грездын олысьяслы вичмӧ и быдлунъя отсӧг. Шуам, улича-туйяс лымйысь весавны.
Благотворительнӧй удж йылысь кӧ сёрни панны, колӧ пасйыны, мый «ЛУКОЙЛ» быд во отсалӧ спорт, культура да велӧдан учреждениеяслы, торйӧн кӧ, дзоньтасьны да выль оборудование ньӧбны.
Мусир перйысьяслӧн тӧжд улынӧсь жӧ ветеранъяс, вермытӧм йӧз да детдомысь зонпосни.
Социальнӧй да культурнӧй проектъяслӧн конкурсын мӧйму усинсксаяслысь 19 уджтас шуӧмаӧсь медбуръяс лыдын.
Вичмӧдӧм грантъяс весьтӧ боевӧй да трудӧвӧй слава музейын лӧсьӧдӧмаӧсь Ыджыд Вермӧмсянь 75 во тырӧмлы сиӧм экспозиция, кыпӧдӧмаӧсь Сӧветскӧй Союзса Герой, армияса генерал Василий Маргеловлы памятник, ньӧбӧмаӧсь ӧти школаӧ мобильнӧй скалодром, а сідзжӧ водзмӧстчысь йӧзлӧн зільӧмӧн карын олысьяс босьтчӧмаӧсь торйӧн чукӧртны важ кабала-пластик да мукӧд сикас шыблас-коляс.
–Мусир перъян компаниякӧд уна во нин социальнӧя ёртасьӧмысь водзӧсыс зэв ыджыд, – висьталӧ Усинск карса кытшын юралысь – администрацияӧн веськӧдлысь Николай Такаев. – Компаниялӧн сьӧма отсӧгӧн сӧвмӧны кар-сикт, а сідзкӧ, бурмӧ йӧзлӧн олӧмыс. Ме аттьӧала компанияӧн веськӧдлысьясӧс миян Войвыв му да тані олысьяс вӧсна тӧждысь.
«Ыджыд мукӧд» йитӧд кутны
Кольӧм во мусир перъян компания вичмӧдӧма Вуктыл карса кытшлы «Нерпа» аэровездеход ньӧбны 9 миллион шайт.
Муниципалитетса юралысь – администрацияӧн веськӧдлысь Гульнара Идрисовалӧн висьталӧм серти, тайӧ вына техникаыс вуктылсалы зэв колана, торйӧн нин ылі сикт-посёлокын олысьяслы, кытчӧ сьӧкыд воӧдчыны, тшӧтш и сёян-юан да мукӧд груз вайны. А татшӧмыс муниципалитетас дас, и на пиысь куим сикт-грездын олысьяслӧн «ыджыд мукӧд» йитӧдыс, позьӧ шуны, абу. И медым разьны тайӧ ёсь гӧрӧдсӧ, шуӧмаӧсь ньӧбны «Нерпа» аэровездеходсӧ, мыйӧн ӧтпырйӧ позьӧ нуны дас мортӧс да кык тоннаӧдз груз.
Сьӧкыдлунъяс вылӧ видзӧдтӧг Вуктылын олысьяс зільӧны пӧльзаӧн коллявны прӧст каднысӧ да ышӧ-дӧны та могысь и томуловӧс.
Челядьлӧн искусствояс школаын велӧдчысьяс мӧйму «Мырпом» проектӧн лоӧмаӧсь «ЛУКОЙЛ» компаниялӧн гранта конкурсын вермысьӧн. Вичмӧдӧм сьӧм вылас ньӧбӧмаӧсь дона бур сёй, мыйысь и вӧчасьӧны ӧні том художникъяс.
А «Золотой ключик» детсадйын босьтчӧмаӧсь лӧсьӧдны «Зарни ки» творческӧй мастерскӧй, кӧні зонпосни кутасны тӧдмасьны нималана мастеръяслӧн Коми мулӧн историялы да культуралы тӧдчана ремеслӧӧн. Та могысь мусир перйысьяслӧн грант весьтӧ ньӧбасны ноутбук, проектор, экран, мольберт-краска да мукӧд коланатор.
И томуловлы, и олӧмалы да вермытӧмлы
–Сосногорск район да «ЛУКОЙЛ-Коми» ООО ёртасьӧны уна во нин. Та йылысь сёрнитчӧм сайын – збыльысь ӧтувъя да ыджыд водзӧса удж. Тайӧ торйӧн нин тӧдчана миянлы ӧнія сьӧкыд кадӧ, – юксьӧ аслас мӧвпъясӧн муниципалитетса юралысь – райадминистрацияӧн веськӧдлысь Сергей Дегтяренко.
Сылӧн кывъяс серти, бӧръя некымын воӧн мусир перйысьяссянь районлы воӧма 120 миллион шайт. Кольӧм во бара торйӧдӧмаӧсь 1,2 миллион, мед мынтыны школаын велӧдчысь енбиа ныв-зонлы стипендия, восьтыны микробиологияӧ нырччысь томуловлы лаборатория, выльвося козинъясӧн нимкодьӧдны судзсьытӧма олысь семьяясысь челядьӧс, а сідзжӧ отсыштны сьӧмӧн ветеранъяслы да вермытӧмъяслы.
Дерт жӧ, и социальнӧй да культурнӧй проектъяслӧн быдвося конкурсын водзмӧстчысьяслы «ЛУКОЙЛ» бара на вичмӧдӧма грантъяс. Медбуръяс лыдын шуӧмаӧсь нёль уджтас.
Кыпалӧны выль олан керкаяс
А мый бурсӧ вӧчӧмаӧсь кольӧм во мусир перйысьяслӧн отсӧгӧн Ухтаын?
Тайӧ карас социальнӧй юкӧн сӧв-мӧдӧм могысь «ЛУКОЙЛ» компания аслас «ЛУКОЙЛ-Коми» предприятие пыр вуджӧдӧма 350 миллионысь унджык шайт. И кызвын сьӧмсӧ видзӧмаӧсь Ярегаын физкультурно-оздоровительнӧй комплекс кыпӧдӧм вылӧ.
Тайӧ зэв ыджыд стрӧйбасӧ компаниялӧн тшӧт весьтӧ лэптӧны 2018 восянь. Доныс сылӧн 420 миллионысь унджык шайт. Восьтыны лӧсьӧдчӧны матысса кадӧ нин.
–Кыдзи и воддза воясӧ, мӧйму мусир перйысьяс вӧчисны ставсӧ, мый кӧсйысьлісны миян районын олысьяслы налысь социальнӧй тӧжд-могсӧ тӧд вылӧ босьтӧмӧн.
Ярегаса дыр нин виччысисны, кор воссяс налӧн посёлокын выль спорт дворечыс, кӧні лоасны вермасьӧм, бокс да фитнес радейтысьяслы залъяс, а сідзжӧ бассейн, – висьталіс Ухтаса администрацияӧн веськӧдлысьӧс вежысь Марина Метелева. – Торйӧн колӧ казьтыштны мусир перйысьяслӧн ичӧтик кар кодь ворсан площадка йылысь, кодӧс вӧчӧмаӧсь, медым челядь дзолядырсяньыс тӧдмасисны «ЛУКОЙЛ-Коми» ООО-ын зільысьяслӧн уджӧн.
«ЛУКОЙЛ» водзӧ ёнмӧдӧ муниципалитетын медучреждениеяслысь материально-техническӧй подувсӧ, унатор вӧчӧ коронавируслы паныд водзсасьӧм могысь. Мӧйму спецтехника ньӧбӧмаӧсь карса 1-ӧд больничалы. Лыдпаса выль рентгенаппаратӧн врачьяс вӧдитчӧны нин сьӧкыда висьысьяслӧн палатаясын.
Уна во ӧтув зільӧны Ухтаса администрация да «ЛУКОЙЛ-Ухтанефтепереработка» ООО. Кольӧм во ӧтвылысь нуӧдӧмаӧсь «Сабантуй» гаж, татаралӧн «Бердэмлек» национально-культурнӧй автономияысь артистъяслы вурӧдӧмаӧсь выль костюмъяс.
2020 воын социальнӧй да культурнӧй проектъяслӧн конкурсын Ухтаысь витӧн босьтӧмаӧсь грант. Тайӧ сьӧм вылас ньӧбӧмаӧсь Г.А.Качевский нима творческӧй шӧринӧ лабораторнӧй да компьютернӧй оборудование, Ярегаысь олӧма йӧзӧс компьютерӧн вӧдитчыны велӧдан техника, 23-ӧд номера школаын вӧчӧмаӧсь ГТО сдайтан площадка, 45-ӧд номера шӧр школаӧ ньӧбӧмаӧсь пызан-шкап да сенсорнӧй жырйӧ оборудование. А 60-ӧд номера детсадйысь зонпоснилы козьналасны робототехника.
Торйӧн колӧ пасйыны, мый 2014 восянь «ЛУКОЙЛ» кыпӧдӧ Ярегаын оланін. Кольӧм во помалӧмаӧсь кык выль керка, кӧні ставыс 48 патера.
Ӧні эм кӧні шойччыны-гажӧдчыны
2014 воын Чилимдін сиктын босьтчӧмаӧсь кыпӧдны выль детсад. Помавнысӧ урчитлӧмаӧсь 2018 воын. Но кикурӧда уджалысь пӧдрадчикъяс понда юрсиктса зонпоснилы тайӧ зэв колана стрӧйбасӧ эштӧдны абу артмӧма.
Отсӧг вылӧ воӧма «ЛУКОЙЛ» компания. 2016-2020 воясӧ мусир перйысьяс вичмӧдӧмаӧсь колана мында сьӧм – 95 миллионысь ун-джык шайт. И талун сиктса зонпосни котралӧны нин выль, югыд да шоныд детсадйӧ.
«ЛУКОЙЛ»-лӧн сьӧма отсӧгӧн жӧ кольӧм во помын Карпушевкаын воссьӧма выль социокультурнӧй шӧрин, кӧні концертасян залсӧ артыштӧма 100 видзӧдысь вылӧ. А лыддьысьны радейтысьясӧс радпырысь вочаалӧны сэні югыд жыръяса библиотекаын. Тайӧ шӧринсӧ кыпӧдӧм вылӧ мусир перъян компания вичмӧдӧма 42 миллион сайӧ шайт.
Мӧйму жӧ Мӧскашорын кадет школабердса интернатын панӧмаӧсь капремонт. «ЛУКОЙЛ» сетӧма нин та могысь 13 миллион сайӧ шайт. Дзоньтасьнысӧ сьӧмыс нӧшта на вичмас.
7,7 миллион шайт дон вӧчӧмаӧсь и Бугаевын тувсов ытва улӧ веськавлӧм школаын ремонт.
Кольӧм во жӧ «ЛУКОЙЛ» тшӧт весьтӧ ньӧбӧмаӧсь Чилимдінса бюджет учреждениеяслы, на лыдын М.А.Бабиков нима шӧр школалы, оланін кузя рӧштшӧт вӧчан шӧринлы да велӧдан управлениелы, квайт автомашина.
Гранта конкурсын 17 медбур проект збыльмӧдӧм вылӧ вичмӧдӧм сьӧм весьтӧ, торйӧн кӧ, ньӧбӧмаӧсь Пижмаса школалы компьютера мобильнӧй класс, Цильмаса школа бердын интернатӧ выль пызан-шкап, юрсиктса музыкальнӧй школаын велӧдчысьяслы ворсан инструментъяс, «Гудвин» творческӧй шӧринысь том артистъяслы сценавывса паськӧм, Хабарихаса школаын лӧсьӧдӧмаӧсь тренажёра зал, а сідзжӧ дзоньталӧмаӧсь-выльмӧдӧмаӧсь война вылын усьӧм воин-землякъяслы Бугаевын памятник, а Мӧскашорса кадет школаын – боевӧй слава музей.
Ставсӧ тайӧс да уна мукӧдтор вӧчӧм вылӧ мӧйму мусир перйысьяссянь вичмӧма матӧ 38 миллион шайт.
Дзолюкъяслы – изьватас паськӧм
2020 воын Изьва районлы «ЛУКОЙЛ» компания вуджӧдӧма 4,7 миллион сайӧ шайт, сы лыдын 2,7 миллионысь унджык – «Изьваса кӧр видзысь» видз-му кооперативлы.
Кыдзи и быд во, мусир перйысьяс зільӧны водзӧ ёнмӧдны велӧдан учреждениеяслысь материально-техническӧй подувсӧ. Сідз, Щельяюрса школалы 125 во тыригкежлӧ козьналӧмаӧсь мультимедийнӧй оборудование ньӧбны сертификат.
Колӧ пасйыны, мый и воддза воын регионса правительство да «ЛУКОЙЛ» компания костын сёрнитчӧм серти Щельяюрса школаын дзоньтасьӧм вылӧ вичмӧдӧмаӧсь 10 миллион шайт. 2020 воын матӧ 1,8 миллион шайт торйӧдӧмаӧсь социальнӧй да культурнӧй проектъяслӧн быдвося конкурсын вермысьяслы. 8 медбур уджтас серти шуӧмаӧсь водзӧ дзоньтавны Господькӧд Сретенньӧ вичко, ньӧбӧмаӧсь Сизябса шӧр школаын информатика кабинетӧ ӧнія техника, Няшабӧжса школаын восьтӧмаӧсь компьютернӧй класс, Варыш грездса детсадйысь дзолюкъяс тшапитчӧны нин изьватас паськӧмӧн, а юрсиктса 2-ӧд номера детсадйысь зонпосни вӧдитчӧны лыдпаса да мультимедийнӧй оборудованиеӧн.
Водзмӧстчысь йӧзлӧн зільӧмӧн да мусир перйысьяслӧн гранта отсӧгӧн жӧ пелькӧдӧмаӧсь-мичмӧдӧмаӧсь Гамын Айму дорйысь воинлы памятник гӧгӧр да Кипиевын фронтӧвик-землякъясӧс казьтылан ин.
Водзмӧстчысьӧс ышӧдӧмӧн
13 миллион сайӧ шайтысь, мый вичмӧма мӧйму Печора районлы «ЛУКОЙЛ» компаниясянь, 11 миллионсӧ видзӧмаӧсь райбольничалысь материально-техническӧй подувсӧ ёнмӧдӧм вылӧ. Торйӧн кӧ, ньӧбӧмаӧсь медучреждениелысь коляс-шыблас весалан установка, реаниматологлы да анестезиологлы койкабердса вит монитор, инфузияа шприца кызь насос, дзоньвидзалун туялан анализатор, куим ИВЛ аппарат да мукӧд медоборудование, а сідзжӧ вуджан висьӧмысь видзчысян паськӧм-маска.
–«ЛУКОЙЛ»-сянь отсӧгыс воӧ уна сикас, – висьталӧ муниципалитетса юралысь – райадминистрацияӧн веськӧдлысь Валерий Серов. – Кольӧм во Печора пырӧдчис компаниялӧн гранта конкурсӧ, и миян сизим проект лоис сэні вермысьӧн. Зэв тӧдчана, мый мусир перйысьяс ышӧдӧны йӧзсӧ водзмӧстчыны да бур вӧчӧмас босьтчыны, и таысь ми торйӧн аттьӧалам найӧс да лача кутам, мый и водзӧ мӧдам ёртасьны.
Гранта сьӧм вылас, торйӧн кӧ, кыпӧдӧмаӧсь Николай Чудотворецлы выль храм, пелькӧдӧмаӧсь-мичмӧдӧмаӧсь спортплощадка, лӧсьӧдӧмаӧсь став коланасӧ, медым 18-ӧд номера детсадйысь зонпосни да Набережнӧй посёлокысь томулов вермисны пырӧдчыны туясян уджӧ. Таысь ӧтдор вурӧдӧмаӧсь Печораса челядьлӧн искусствояс школалы сценавывса костюмъяс.
* * *
Кыдз тыдовтчӧ, «ЛУКОЙЛ» ПАО-кӧд миян республикалӧн йитӧдыс ёнмӧ воысь-во, и эскыссьӧ, мый регионса правительство да мусир перъян компания костын социальнӧя ёртасьӧм йылысь сёрнитчӧм серти ӧтув зільӧмӧн водзӧ бурмас миян Войвыв муын олӧмыс.
Снимокъясыс «ЛУКОЙЛ-Коми» ООО-лӧн пресс-службаысь.