Кор сёрни пансьылӧ сиктса ветеринар йылысь, син водзӧ сувтӧ ыджыд тушаа, крепыд тэчаса мужичӧй, коді ки пӧвнас вермӧ и вӧвтӧ лэптыны, и мӧстӧ пӧрӧдны.
А Изьва сиктын айболиталӧ томиник вӧсньыдик ныв Екатерина Семяшкина. «ВКонтактеын» аслас лист бокын Екатерина Аристарховна вӧчалӧ быдлунъя удж йывсьыс пасйӧдъяс. Сыкӧд сёрнитчӧмӧн йӧзӧдам найӧс «Коми му» газетын. Лыддьӧй…
Тӧв, кӧдзыд. Уджъёртъяскӧд сёрнитчим асывсянь босьтавны орчча грездын вӧвъяслысь вир проба. Вӧлыс сэні абу уна — 30-40 кымын. Чайтам да, пажынӧдзыс ми, куим ветврач, помалам тайӧ уджсӧ, а лун шӧр бӧрас ветлам овмӧсъясӧ, кӧні вӧвъясыс зэв асныраӧсь да, весиг кӧзяинъясыс оз вермыны вайӧдлыны найӧс вир босьтанінас.
Мамӧ тӧрыт ньӧбӧма аслыс выль «Прощай, молодость» кӧмкот. Гид-картаад уджавнытӧ татшӧмыс зэв бура шогмӧ, вильыдджык тай сӧмын-а.
Ывлаыс кӧдзыд да, мам вӧзйис меным кӧмавны «молодостьсӧ», эн пӧ сӧмын няйтчӧд. Думышті, мися, дерт, ог, некымын вӧвлысь сӧмын вирсӧ босьтыштны колӧ да…
Уджным матыстчис помлань, кынӧм ёна нин сюмаліс, кор котӧрӧн локтіс нывбаба — отсалӧй пӧ, мӧскӧйлы асывсяньыс лёк, вайсьыны оз вермы.
Мӧдӧдчим, мися, час кымынӧн отсалам вайсьынысӧ.
Дерт, кӧсйим кыскыны куканьсӧ ловйӧн. Ӧта-мӧд бӧрся зілим тшапкыны сылысь коксӧ, но ки улӧ веськавліс сӧмын юрыс. Мӧслӧн пытшпибердса да асмог ваыс шоныд шорӧн визувтіс-йиджис миянлы улыс паськӧмӧдз.
Мӧскыд дзикӧдз вынтӧммис, то водас джоджӧ, то бӧр кок йылас сувтас.
Корсюрӧ миянлы аслыным ковмыліс мӧскыскӧд орччӧн джоджас кымынясьлыны, медым бара на видлыны кукань коксӧ тшапкыны.
Киным дубаліс, чуньясным ӧдва нин вӧрисны. Шыын дзескыд, сынӧдыс оз тырмы. Здук кежлӧ петавлім ывлаӧ лолыштны, но ва паськӧмным кӧдзыдысла пыр жӧ пужъяліс…
Мырсим 5 час чӧж, но мӧстӧ мездыны эз артмы, ковмис начкыны. Вӧлӧмкӧ, куканьыс зэв лёк ногӧн куйлӧма кынӧм пытшкас да и гӧг сюрӧснас на голя гӧгӧрыс гартчӧма…
Рыт нин, пемыд. А уджыс юр выв тыр на, урчитӧм мында вир пробасӧ колӧ босьтны да ичӧтик дозмукъясӧ кисьтавны…
Коркӧ да локті жӧ гортӧ. Мамӧй чуймалӧ, кытчӧ пӧ та дыра кежлӧ вошлін. Но шы дукыс да няйт паськӧмӧй ставсӧ сылы «гӧгӧрвоӧдісны». Мамукӧй, чайта да, тэнсьыд «Прощай, молодость» кӧмтӧ он нин вермы весавны-мыськыны, кыдзи и мен-сьым паськӧмӧс.
Аскинас став лысьӧмӧй ёнтіс-юкаліс, киӧй гыжнаӧсь вӧлі, а кокӧй – лӧз печата. Думышті, мися, збыльысь – «Прӧщай, томлунӧй» и дзоньвидзалунӧй тшӧтш. Ме ӧд ветеринар…
Екатерина Семяшкина.
Снимокыс авторлӧн гортса архивысь.