2020 вося декабрь 31 лун… Час вой… Ю-туб каналын, а сэсся и «ВКонтактеын» петӧ «Помӧсдін – Гаж» коми сьыланкывъя клип. Выль воӧдз кольӧ сутки…
Выль во вочаавтӧдз да точкысьтӧдз на гажа сьыланкывйӧн нимкодясисны сюрсысь унджык морт. А петіс тайӧ клипыс Кулӧмдін районса Помӧсдінысь авъя да енбиа нывъёртъяслӧн водзмӧстчӧмӧн.
А кыдзи налӧн татшӧм «гажыс» артмӧма? Уси шуд сёрнитыштны нывъяслӧн котырысь Ксения Кармановакӧд. Медводз, дерт, юалі: кодлы татшӧм бур мӧвпыс юрас воӧма?
Вӧлӧмкӧ, Ксения нывъёртъясыскӧд важӧнкодь нин кӧсйылӧмаӧсь гижны коми сьыланкыв, мед пӧ эськӧ и томуловлы, и верстьӧлы воис сьӧлӧм вылас да нӧшта на неуна шмоньсора артмис.
—Ӧти асылӧ нывъёртъяскӧд бӧр-йим ӧнія кадся нималана сьыланкыв да шылад вылас шуим гижны комиӧс, — висьталӧ Ксения. — А сы вӧсна, мый кык вежон мысти нин виччысим Выль во, сюрӧссӧ мӧвпыштім выльвося гажлы лӧсяланаӧс.
Сійӧ жӧ рытнас Ксениялӧн коми текстыс вӧлӧма нин дась. Куим нывъёрт — Ксения Карманова, Анастасия Уляшева да Ксения Глуханич drums34booms студия отсӧгӧн пыр и ливкнитӧмаӧсь сійӧс да босьтчӧмаӧсь снимайтны клип.
Та дырйи шуӧмаӧсь петкӧдлыны ӧнія да важся кадсӧ, кыдзкӧ йитны найӧс ӧта-мӧдыскӧд да тӧдчӧдны, мый и ӧнія томулов пыдди пуктӧны кольӧм кадся олӧмсӧ. Зэв ӧдйӧ и аддзӧмаӧсь мамъясныслысь да тьӧтъясныслысь томдырся паськӧмсӧ: чышъян, юбка да пальто. Ас костаныс татшӧм «модасӧ» нывъёртъяс шуӧны «жытник-стайлӧн», дерт пӧ, вежавидзӧмӧн.
А кутшӧм нӧ выльвося гаж Кӧдзыд пӧльтӧг? Нывъёртъяслӧн клипын быдса кык Кӧдзыд пӧль вӧлӧма!
—Ӧтар Кӧдзыд пӧльыс (Антон Иванов) йӧктіс миянкӧд коз гӧгӧр да сёйис торт, а мӧдыскӧд (Алексей Уляшевкӧд) журъялім ставным люлькаа мотоциклӧн, — водзӧ висьталӧ Ксения. — Ставсӧ снимайтім зэв ӧдйӧ: быдӧнлӧн гортас посни челядь, керка тыр удж, а кадыс вӧлі зэв этша. Но, чайтӧм серти, ми сяммим петкӧдлыны тӧжд-майшасьтӧм олӧм, ӧд гажӧдчынытӧ ми ёна радейтам да кужам.
Помӧсдінса нывъяслӧн да налӧн ёртъяслӧн этша кадӧн артмӧма дасьтыны видзӧдысьяслы выльвося козин — ӧд буретш тайӧ и вӧлӧма налӧн медшӧр могӧн.
—Йӧзыслы тай воӧма сьӧлӧм выланыс клипным. Ставсӧ вӧчим окотапырысь, ас кӧсйӧм серти, асланым вынъясӧн да весиг эг виччысьӧй, мый миянлы воас сы мында шань да аттьӧалана кыв. Ставныдлы ыджыд аттьӧ! Асьным тшӧтш радӧсь, мый миян «Гаж» артмис, — кывкӧрталіс Ксения.
* * *
Чолӧмалам енбиа нывъясӧс да налысь ёртъяснысӧ выль сьыланкывйӧн. Збыльысь ӧд, Выль во водзын сэтшӧм бур козин лои дасьтӧма. Сиам и водзӧ на нимкодьӧдны миянӧс выль мича коми сьыланкывъясӧн да клипъясӧн.
А лыддьысьысьяслы тӧдчӧдам, мый улынджык сетӧм куар-код отсӧгӧн верманныд нимкодясьны Помӧсдінса нывъяслӧн выль клипӧн.
Галина МАКАРОВА.
Снимокъясыс Ксения КАРМАНОВАЛӦН архивысь.