Кыдзи ті чайтанныд, эмӧсь-ӧ талун миян пӧвстын Сюзь Матвейлӧн быдтасъясыс? Эмӧсь кӧ, кодъяс найӧ? Кытысь найӧс корсьнысӧ? Мыйӧн бур кӧрт зыр?
А мыйла, тіян серти, Боня рытнас кулӧма нисьӧ ловъя, коксӧ ӧдва кыскалӧ? Мыйысь бурдӧдӧ доктор Айбо? Позьӧ-ӧ юркарса шӧр уличаын балкон вылын косьтыны улыс гач? Збыльысь-ӧ ӧш вермӧ лоны козёлӧн?
Нӧшта юалӧмъяс: мыйла Кудымкар шӧрын важӧн нин повтӧг «шӧйтӧ» ош? Кодъяс вежасны пӧрысьмӧм Гузиӧс да Мезиӧс Горький нима театрын? Мыйӧн ӧткодьӧсь Сыктывкар да Кудымкар?
Кытчӧ ветлӧ коронаа автобус? Мый корсис кар шӧрын пикӧ воӧм Марья пӧч да сюрис-ӧ сылы коланаторйыс? Ёна-ӧ ньӧбасис Машӧ «сьӧд» пекничаӧ? Ыджыд-ӧ штрап перйӧны сикт шӧрын ёгзьӧмысь?
Мыйта гос чинтіс Анна «Фейриӧн»? Кутшӧм дон вештіс Степан Нина полицияӧ «ложнӧй вызовысь»? Ёг сотан завод: бур али лёк?
Став тайӧ юалӧм вылас вочакыв корсисны таво Сыктывкарса коми КВН-ӧ пырӧдчысьяс (ті верманныд сійӧс видзӧдны ӧтуввезйын куар-код серти).
Юркарын ордйысьӧмсӧ котыртлісны нёльӧдысь нин да та пӧрйӧ сиисны Сыктывкарлӧн 240 вося тшупӧда паслы.
Коми КВН-сӧ вӧлі шуӧма вӧчны восьсаӧн, а сідзкӧ, конкурсас вермисны пырӧдчыны тшӧтш и мукӧд кар-районысь котыръяс. Со найӧ и водзмӧстчисны: ворсісны Кӧрткерӧс районысь «Одыбса репас» да «Коланторъяс», а нӧшта Перым-Коми муысь «Кашкавда». Сыктывкарсянь КВН-ын петкӧдчисны ставлы тӧдса «КилоМэтръяс» да «Эжва йывса бабаяс».
Коронавируса висьӧм паськалӧм вӧсна коми КВН таво муніс онлайн: командаяс
водзвыв ыстісны видеояс. Йӧзыс ӧд велалісны аддзыны ворсысьясӧс сцена вылысь, а та пӧрйӧ найӧ петкӧдчисны и ывлаын, и сиктса керкаын, и карса патераын.
Тавося КВН-ын вӧлі сӧмын ӧти конкурс – коліс дасьтыны «Сюзь Матвейлӧн быдтасъяс» шылада гортса удж. И, дерт, сэні медъёна шмонитісны коронавирус йылысь.
Конкурссӧ гортса коз пу дорын нуӧдіс Изьваса «бандерлог» Григорий Пыстин: сійӧс видео пыр жӧ ставӧн аддзисны-кывзісны.
Командаяслысь енби-сямсӧ донъялісны коми КВН-лы подув пуктысь, гижысь Анжелика Елфимова, «Юрган» телеканалысь журналист Александр Пивкин да Виктор Савин нима драма театрын ворсысь Дмитрий Греченюк.
Кыдз тыдовтчис, тавося КВН-ын медъёна водзмӧстчисны Кӧрткерӧс районсаяс: медводдза места вичмис «Коланторъяслы», а «Одыбса репас» лои коймӧдӧн. Мӧд местасӧ шедӧдісны карса «КилоМэтръяс».
Медбур ворсысьнас жюри шуис «Коланторъясысь» Юлия Поповаӧс.
Став вермасьысьыслы вичмис диплом да сьӧм, а Юлия Поповалы – «Коми йӧзӧдчан керкасянь» козин.
Казьтыштам, юркарын конкурссӧ котыртлӧны Сыктывкарса администрацияын культураӧн веськӧдланін, коми культура шӧрин да «Коми войтыр» ӧтмунӧмлӧн Сыктывкарса юкӧн.