Ӧнія кадӧ йӧзыс ёна эскӧны быдсикас гороскопӧ да календарӧ. Китайса гороскоп серти вежон мысти нин колльӧдам Крысаӧс да паныдалам Ӧшкӧс. Астрология пасъястӧ бура жӧ тӧдам да унаӧн эскам асланым зодиакӧ – и Стрелец, и Водолей, и Дева…
А майя войтырлӧн лунпас серти 2012 воын унаӧн виччысисны сідз шусяна апокалипсис, весиг заптісны сёян да пыралісны бункерӧ. Но бур, мый майя туналӧмыс эз збыльмы.
Сэк жӧ быдсикас гороскопӧ эскӧмӧн миян быттьӧ вунлӧ, мый комияслӧн эм жӧ асланыс календар. 1975 воын Шойнатыысь аддзӧмаӧсь бронза кытш, кӧні вундалӧма-серпасалӧма
9 пемӧсӧс. Важӧн комияслӧн выль воыс заводитчылӧма март
21 лунӧ. Сэкся йӧзыс восӧ юклӧмаӧсь 9 кадколаст вылӧ, и быд кадколастлы лӧсялӧ вӧлӧм вӧр-васа кутшӧмкӧ пемӧс.
Ми корсим ӧтуввезйысь став тайӧ пемӧс йывсьыс юӧръяс. Лыддьӧй да мӧвпыштлӧй, лӧсялӧ-ӧ комияслы татшӧм ногӧн донъялӧмыс. А асьныд ті тайӧ календар сертиыс кутшӧм пемӧс?
Ош
Ті кӧ чужинныд коркӧ март 22 – апрель 27 лунъясӧ, сідзкӧ, тіян пемӧсныд – пармаса кӧзяин Ош.
Важся йӧз эскӧмаӧсь, мый ошлӧн кадколастӧ чужлӧм йӧзыс – повтӧмӧсь, зільӧны тӧдмавны мыйкӧ выльтор. Ош сяммӧ бура котыртны быдсикас уджсӧ да збыльмӧдӧ ассьыс став кӧсйӧмсӧ, некутшӧм мытшӧд сійӧс оз падмӧд, нинӧмысь оз яндысь ни. Кужӧмӧн донъялӧ вын-эбӧссӧ, оз радейт корны кодлыськӧ отсӧг. Зэв киподтуя – век мыйкӧ лӧсьӧдӧ-дзоньталӧ, ёртасьӧ спорткӧд.
Ошкыд – водзмӧстчысь, кӧть и овлӧ жӧ сылы окота кытчӧкӧ сайӧдчывны мукӧдысь, дзебсьывны «гуӧ» да сэні ӧткӧн пукыштны-мӧвпыштны.
Йӧзыс чайтӧны, мый Ошсӧ бура гӧгӧрвоӧны, но… тыр-бура сійӧс некод оз тӧд, «пармаса кӧзяиныд» уна мӧвпалӧ, но этша сёрнитӧ.
Кӧр
Апрель 28 лунсянь июнь 2 лунӧдз – Кӧрлӧн кадколаст. Тайӧ кадӧ чужлӧм мортыс – зэв зіль, небыд сьӧлӧма да абу уна сёрниа. Сійӧ кывкутӧ аслас удж вӧснаыс, повтӧг мунӧ водзӧ да нуӧдӧ йӧзсӧ ас бӧрсяыс, кӧть и радейтӧ уджавны ас кежас. Пӧртӧ олӧмӧ мог бӧрся мог. Кӧрыд – зэв сюсь, прамӧй морт, но вермӧ ӧдйӧ пузьыны, этшсьыс петны. Овлӧ, вывті нин вылӧ асьсӧ лэптӧ.
Ёна радейтӧ путешествуйтны. Мусукыс сылӧн дзик ӧти, кодӧс вермӧ корсьны нэм чӧжыс.
Сьӧдбӧж
Сьӧдбӧжлӧн кадколастыс заводитчӧ июнь 3 лунӧ да помасьӧ июль 4 лунӧ. Тайӧ пемӧсыс пыр мыйкӧ керӧвӧчӧ, некор весь оз пукав. Асныра, чайтӧ кӧ, мый колӧ вӧчны тадзи, а оз мӧд ногӧн, вӧчӧ, кыдзи ачыс кӧсйӧ. Оз быдӧнӧс пыдди пукты, но ладмӧдчанныд кӧ Сьӧдбӧжкӧд – сійӧ лоӧ тіян медся бур ёртӧн. Матыссаыслы дась сетны ставсӧ, мый аслас эм, кодлыкӧ ковмас кӧ, медводдзаӧн уськӧдчӧ отсавны.
Скӧрмылӧ, но оз вермы дыр лӧгавны. Радейтӧ тӧдмавны мыйкӧ выльтор, кытшовтны тӧдтӧм на инъяс.
Сан
Чужинныд кӧ июль 5 лунсянь август 9 лунӧдз, сідзкӧ, тіян тотем пемӧсныд – Сан.
Тайӧ кадколастӧ чужӧны зэв вежӧра да падъявтӧм йӧз, кодъяс тӧдӧны, кор колӧ уджавны, а кор – шойччыны, кор колӧ водзӧ котӧртны, а кор – бӧрӧ воськовтны. Сан весиг аслас мытшӧд-падмӧгсьыс зільӧ босьтны мыйкӧ бурӧс. Некодлы оз сет ыджыдавны ас вылас (пемӧсыс кӧть и ичӧт, но и кӧинкӧд, и ошкӧд вермӧ тышкасьны). Век эскӧ, мый сылӧн ставыс артмас.
Саныд мудер, абу сёрниа, ӧтдортчысь. Зэв сьӧкыда ладмӧдчӧ йӧзыскӧд, оз вунӧд ӧбидасӧ, весиг овлӧ, некодкӧд оз ёртась. Зэв бур сідз шусяна интуицияыс, радейтӧ заптысьны.
Йӧра
Йӧра кадколаст заводитчӧ август 10 лунсянь да помасьӧ октябрь 4 лунӧ.
Йӧра – зэв вына да веськыд морт, век тӧждысьӧ матысса вӧснаыс, дорйӧ быдсикас шог-лёксьыс. Сылӧн, кыдзи и Санлӧн, зэв жӧ бур интуицияыс, сӧмын оз пыр кывзы ассьыс сьӧлӧмкылӧмсӧ. Тайӧ кадӧ чужлӧм морт пыдісянь гӧгӧрвоӧ мукӧдлысь сямсӧ, рочасьыштны кӧ, натурасӧ. Йӧра зэв зіль, мыйкӧ кӧ ёна кӧсйӧ, быть вӧчас, но оз кӧ – некод сылы мырдӧн тшӧктыны оз вермы.
Радейтӧ прӧст кадсӧ коллявны ӧткӧн либӧ медся матыссаясыскӧд.
Вурд
Октябрь 5 лунсянь декабрь 19 лунӧдз – Вурдлӧн кадколаст. Тайӧ кадӧ чужлӧм морт зэв кыпыд руа да быдтор тӧдны кӧсйысь. Вурд некор оз норась, век гажӧдчӧ, шмонитӧ, оз радейт зык-шум, йӧзкӧд зільӧ овны мирын-ладын. Сьӧлӧмсяньыс нимкодясьӧ, мукӧдыслӧн кӧ ставыс бур, некодлы оз завидьты.
Оз радейт ӧткалунсӧ, некор оз ылӧдлы ассьыс мусуксӧ, семьяын став вӧснаыс тӧждысьӧ. Вурд – зэв творческӧй, вывті варов, овлӧ, вомъёртсӧ оз кывзы да оз кыв.
Руч
Чужинныд кӧ коркӧ декабрь 20 – январь 24 лунъясӧ, сідзкӧ, тіян пемӧсныд – Руч.
Руч зэв ӧдйӧ велалӧ быдсикас оланногӧ. Некор он вермы тӧдмавны сылысь русӧ – овлӧ, долыда нюмъялӧ, а сьӧлӧмас йиджӧма
ыджыд дой. Некутшӧм висьӧм оз падмӧд татшӧм мортсӧ, колӧ кӧ – и ыджыд температураӧн локтас удж вылӧ.
Ручлӧн зэв бур паметьыс, та вӧсна сійӧс он вермы пӧръявны. Сюсь, ӧдйӧ мӧвпалысь да творческӧй морт. Сьӧмсӧ нажӧвитны кужӧ, но оз зіль вывті нин озырмӧдчыны.
Тайӧ кадколастӧ чужӧмаяс лоӧны зэв бур бать-мамӧн. Медзіля налы уджавсьӧ рытнас. Мустӧм уджсӧ тшӧктӧны вӧчны мукӧдлы, асьныс оз радейтны сьӧкыдлунсӧ да. Налӧн шмонитӧмыс овлӧ дойдана.
Ур
Ур кадколаст заводитчӧ январь 25 лунсянь да помасьӧ февраль 21 лунӧ.
Ур зэв зіль, тэрыб да вежӧра. Медся тӧдчанаыс сылӧн – семья. Некор оз вунӧд рӧдвуж йывсьыс, тӧждысьӧ на вӧсна. Аслас матысса йылысь некор оз думышт омӧля, доръяс весиг сэки, кор сійӧ вӧчас мыйкӧ лёктор. Ачыс век жӧ виччысьӧ рӧдвужсяньыс отсӧг да шоныд кыв.
Полӧ выльсьыс. Урлы кажитчӧ «шыльӧдны-мольӧдны» оланінсӧ, заптысьны. Тшӧкыда майшасьӧ да шогалӧ нинӧм абусьыс.
Ёртъяссӧ бӧрйӧ нэм кежлас.
Тулан
Февраль 22 лунсянь март 21 лунӧдз – Туланлӧн кадколаст.
Тулан век ставсӧ водзвыв урчитӧ-арталӧ да чукӧртӧ колана юӧр. Оз радейт дыр пукавны гортас, тшӧкыда ветлывлӧ кытчӧкӧ выльлаӧ. Йӧз чукӧрын гусьӧн пукалӧ пельӧсын да кывзӧ-видзӧдӧ мукӧдӧс, ас йывсьыс оз ёна висьтась. Бур партизан! Радейтӧ спорт, торйӧн нин котравны да гимнастика вӧчны, но, шуам, сьӧкыд атлетикаӧ оз пырӧдчы. Чайтӧ кӧ, мый сійӧс кодкӧ кӧсйӧ лёкӧдны, ачыс вермас водзвыв уськӧдчыны.
Шмонитӧ зэв аслыспӧлӧса, Туланӧс оз быдӧн гӧгӧрво.
Матыссасӧ донъялӧ веськыда, аддзӧ и бурсӧ, и лёксӧ.
* * *
Кывкӧртӧд пыдди окота пасйыны, мый оз ков вывті нин эскыны быдсикас гороскоп-лунпасас. Медтӧдчанаыс – аслад ловкӧд сӧгласын-ладын овны. А календарыд да гороскопыд мед кӧть мый сэсся туналасны…
Ирина Терентьева.