«Коми йӧзӧдчан керкаын» уджалысьяслысь ныв-пинысӧ быд во зілям чолӧмавны Выль воӧн. Уна-уна во чӧж миян медся шань Кӧдзыд пӧльным – Григорий Хатанзейский – чолӧмавліс челядьнымӧс гортӧдзыс волӧмӧн, мукӧддырйиыс водз асывсянь сёр рытӧдзыс тырмывліс ставнысӧ кытшовтны. Ок, и радлісны челядьным, кор Кӧдзыд пӧль гортӧдзыс волывліс!
Таво тайӧ пандемияӧн весиг детсад-школаын утренникъяс оз нуӧдны. А ми со шуим чукӧртлыны (дерт, коді вермис) зонпосниӧс удж вылын, мед кӧть неуна гажӧдыштны да чолӧмавны найӧс.
А кутшӧм мича да аслыспӧлӧс Лымныв да Кӧдзыд пӧль (Полина да Артемий Барсуковъяс) волісны миян дорӧ! Шаньсьыс-шаньӧсь, збыльысь волшебникъяс! Пӧттӧдз ворсӧдісны посниуловӧс, шмонитісны, сюся кывбуръяс кывзісны да, дерт жӧ, кытшӧн ветлӧмӧн коз йылысь нималана сьыланкыв сьылісны.
Медбӧрын ставӧн котӧртісны корсьны Кӧдзыд пӧльлысь козин тыра мешӧксӧ. Вӧлӧмкӧ, вунӧдӧма-кольӧма сійӧс ӧдзӧс сайӧ. Ок, и радлісны сэсся дзолюкъясыд, аддзисны да!
Ыджыд аттьӧ висьталам Полиналы да Артемийлы миян ныв-пилы выльвося гаж нуӧдӧмысь! Пандемияыд кор на помасьлас, а челядьыдлы кыпыд рутӧ да радлунтӧ пыр колӧ козьнавны.
Галина МАКАРОВА.