Виктор Савин нима драма театрын нимӧдісны Нина Куратовалӧн «Дорого. Любимо.» да «Под шум северного ветра» Каллистрат Жаковлӧн гижӧдъяс серти йӧзӧдӧм аудионебӧгъяс. Висьт-мойдъяссӧ асланыс гӧлӧсӧн «ловзьӧдісны» драма театрысь артистъяс.
–Зэв ыджыд аттьӧ Нина Никитичналы! – шыӧдчис Россияса заслуженнӧй артистка Ольга Носкова. – Кор ме лыдди сылысь висьтъяссӧ, син водзын сулаліс аслам челядьдырӧй, кодӧс ме коллялі сиктын пӧч ордын. Кыпыдлуныс йиджис лолам! Меным зэв нимкодь вӧлі уджавны тайӧ небӧгъяснас.
Чолӧмаліс гӧсьтъясӧс драма театрӧн веськӧдлысь Михаил Матвеев. Культура министерствосянь шоныд кывъяс висьталіс сэтчӧс медиа шӧринын уджалысь Алина Павлова.
–Бур, мый ӧнія кадӧ йӧзыслӧн эм позянлун кывзыны небӧгъяссӧ, сы вӧсна мый лыддьысьнысӧ оз быдӧнлы тырмы кадыс, – шуис Валентина Морозова, Нина Куратовалӧн нылыс. – Аттьӧ татшӧм колана уджас водзмӧстчысьяслы!
Сьӧлӧмсяньыс сёрнитіс Россияса заслуженнӧй артист Виктор Градов, коді «козьналіс» ассьыс гӧлӧссӧ Каллистрат Жаковлӧн гижӧдъяслы.
–Таӧдз Жаковлысь гижӧдъяссӧ ме эг лыддьывлы, – юксис мӧвпъяснас драма театрса артист. – Шензи! Каллистрат Фалалеевичӧс шуӧны зыряна интеллигенциялӧн батьӧн, аслас быд гижӧдын сійӧ пыдісянь мӧвпалӧ, мый ради шуӧма овны мортыслы. Ме зэв шуда, мый мойвиис дасьтыны сылысь аудионебӧг.
Михаил Любимов, звукорежиссёр, пасйис, мый лои вӧчӧма зэв ыджыд удж.
–Аудионебӧгъясыс быттьӧ шымыртісны некымын миниспектакль, – шуис звукорежиссёр. – Аттьӧ артистъяслы!
Владимир Казаковцев, кодӧс шуисны тайӧ проектыслӧн «идейнӧй вдохновительӧн», юксьыштіс водзӧ вылӧ дум-кӧсйӧмнас. Театрын водзмӧстчысьяс пӧ мӧвпалӧны лӧсьӧдны Каллистрат Жаковлӧн мойдъяс серти анимация.
–Ми шыӧдім кык небӧг, ӧтарас весиг шыладыс абу, сійӧ сэтчӧ оз и ков да. Артистъяс асьныс бӧрйисны, коді мый кутас «ловзьӧдны», кодлы мый кажитчӧ да мый матынджык, – тӧдчӧдіс Владимир Казаковцев. – Ӧні мӧвпалам выль проект йылысь – кӧсъям Тювӧ тун йылысь лӧсьӧдны анимация.
Нина Куратовалӧн да Каллистрат Жаковлӧн шыӧдӧм гижӧдъяссӧ лэдзӧма CD-дискъясӧн. Гӧгӧрвоана, абу быдӧнлӧн эм позянлуныс кывзыны татшӧм дисксӧ – ӧнія кадӧ йӧзыс ёнджыка вӧдитчӧны телефонӧн, а мукӧд компьютерас весиг и дисководыс нин абу. Аудионебӧгъясысь торъя юкӧнъяс йӧзӧдӧмаӧсь «ВКонтактеын» культуралы да искусстволы отсӧг сетан фондлӧн лист бокын.
* * *
«Под шум северного ветра» да «Дорого. Любимо.» небӧгъяс шыӧдӧм вылӧ сьӧмсӧ вичмӧдӧма культуралы да искусстволы отсӧг сетан республикаса фонд. Каллистрат Жаковлысь небӧгсӧ «ловзьӧдӧма» Коми Республикаса юралысьлӧн, а Нина Куратовалысь гижӧдъяссӧ – Коми Республикаса культура министерстволӧн грантъяс вылӧ.
Ирина Терентьева.