Ноябрь 21 лунӧ Комиын зільысь предпринимательяслы онлайн вӧлі котыртӧма «Ыджыд бизнес-форум».
Тайӧ аслыспӧлӧс чукӧртчылӧмас пырӧдчӧм могысь шыӧдчӧмаӧсь кык сюрс сайӧ ас вылас уджалысь. Но, кыдз тыдовтчӧма, сёрнитанторйыс вӧрзьӧдӧма ёна унджыкӧс, кодъяс тшӧтш окотапырысь юксьӧмаӧсь сы йылысь асланыс мӧвп-видзӧдласӧн соцсетьясын.
Форум вылас Москваын студиясянь сёрнитӧмаӧсь «АндерСон» компаниялы подув пуктысь да сыӧн веськӧдлысь, «Сколково» МШУ-са Амбассадор, предпринимательство кузя Москваса мэрлӧн дӧвереннӧй морт, РФ-са ичӧт да шӧр бизнесын предпринимательяслысь право дорйысь, рестораторъяслӧн да отельеръяслӧн федерациялӧн Москваса представительствоӧн юрнуӧдысь Анастасия Татулова; предприниматель, интернет-маркетингын эксперт Михаил Приходько; Little Big Agency SMM-агентствоысь креативнӧй директор, «Молодой лидер рунета» премияа лауреат Василий Богданов; Little Big Agency SMM-агентствоысь соучредитель да стратегическӧй директор, Москваса PR-школаын велӧдысь Максим Юрин да мукӧд паськыда нималана эксперт-практик, кодъяслысь эм мыйӧ велӧдчыны, мед сэсся асшӧр уджӧ босьтчыны.
Сизим час чӧж уджалӧма чат, кӧні сёрниӧ пырӧдчысьяс юасьӧмаӧсь да юксьӧмаӧсь асланыс мӧвпъясӧн.
Содтӧд пасъям, мый форумсӧ котыртӧма Комиысь «Мой бизнес» шӧрин. Сы могысь, мед гӧгӧрвоӧдны йӧзыслы, кутшӧм тӧдчана талун асшӧр уджыс, сетны ас вылас уджалысьяслы выль тӧдӧмлун, а сідзжӧ ышӧдны унджык йӧзӧс босьтчыны ичӧт да шӧр бизнесӧ.