Кулӧмдін районын «Монди Сыктывкарса ЛПК» уджалӧ важӧн да паськыда. Та вӧсна и комбинатсянь отсӧгыс 2020 воын лои тӧдчана – 10,26 миллион шайт. 4,74 миллионсӧ видзисны муниципалитетын социальнӧй юкӧнын мытшӧдъяс разьӧм, 5,52 миллион шайт – экономика сӧвмӧдӧм вылӧ.
Кыдз висьталіс «Комиинформ» агентстволы Кулӧмдін районса администрацияын экономика сӧвмӧдан юкӧнӧн веськӧдлысь Елена Цгоева, Эжва йывсалы «Монди Сыктывкарса ЛПК»-сянь отсӧгыс вичмӧ 15 во нин, и сы весьтӧ тайӧ каднас муниципалитетын разьӧма уна гӧрӧд.
–Отсӧгсӧ ми пыр виччысям, торйӧн нин тӧдчана сійӧ детсад-школаяслы, культура керкаяслы да фермеръяслы, – пасйис Елена Цгоева. – Таво майшасим, мый пандемия торкас, но комбинатсянь сьӧмыс кӧть и сёрмыштӧмӧн, но воис.
Сы весьтӧ во помӧдзыс шуӧма пыртны уджӧ Дон сиктын 100 юр вылӧ артыштӧм скӧт карта. Крестьянско-фермерскӧй овмӧс кутысь Сергей Тимушев ньӧбас «Монди Сыктывкарса ЛПК» отсӧгӧн фермаӧ скӧт видзан оборудование, йӧв сетан провод да транспортёр.
Ас вылӧ уджалысь Нина Ивановалы бергӧдісны 1,5 миллион шайт «Вектор NEXT» ПАЗ лизингӧн ньӧбӧмысь. Ӧні выль автобуснас новлӧдлӧны йӧзӧс Югыдъягсянь Сыктывкарӧдз да бӧр.
1,7 миллион шайт вичмӧдасны стрӧитчан материал вӧчӧм кузя уджтасъяс збыльмӧдӧм вылӧ. Ӧні Кулӧмдін районса администрацияын видлалӧны та кузя кабала-документъяс. Вермысьсӧ бӧръясны конкурс нуӧдӧмӧн.
Комбинатсянь 300 сюрс шайт торйӧдасны Мыс дорын воддза воясӧ лӧсьӧдӧм понтон пос видзӧм-дӧзьӧритӧм вылӧ. Елена Цгоевалӧн висьталӧм серти, «Монди Сыктывкарса ЛПК» вӧчліс поссӧ вӧр петкӧдӧм могысь, да сійӧ сиктсаяслы зэв колана. Вӧр петкӧдӧмсьыс дугӧдчӧм бӧрын Мысса войтыр майшасисны вуджанінтӧг кольӧмысь, но комбинат муніс налы воча.
Водзынджык жӧ Кулӧмдін районса администрация неыджыд донысь ньӧбліс «Монди Сыктывкарса ЛПК»-лысь Югыдъягын ковтӧм стрӧйба. Сійӧс лои дзоньталӧма да овмӧдӧма сэтчӧ ӧзйылӧм бӧрын юр сюянінтӧг кольӧм войтырӧс.
–Оланінсӧ коліс корсьны регыдӧн. Аттьӧ комбинатлы йӧз шог гӧгӧрвоӧмсьыс, – пасйис Елена Цгоева.
Предприятиелы ковтӧм нӧшта ӧти стрӧйбаын – Помӧсдінын – лои лӧсьӧдӧма ылі сикт-грездса велӧдчысьяслы интернат. Жыръяссӧ дзоньталӧма-выльмӧдӧма да, ныв-зонлы зэв лӧсьыд сэні лоӧ.
«Монди Сыктывкарса ЛПК» отсалӧ Эжва йывсалы и социальнӧй юкӧнын гӧрӧдъяс разьны. Сідз, таво лои дзоньтасьӧма районса школаясын.
Торйӧн кӧ, Кулӧмдінса шӧр школаын 1,546 миллион шайт дон выльмӧдісны биология, химия да информатика жыръяс: тшӧкӧтуритісны, белитісны, мавтісны стен-йирксӧ, вольсалісны джодж, тэчисны выль ӧшинь. Став уджсӧ ковмис бергӧдны Коми Республикаса Роспотребнадзорлӧн тшӧктӧм серти. Кирпичысь куим судтаа стрӧйбаас талун велӧдчӧ 1.046 ныв-зон, а вужвыйӧныс сійӧс эз на дзоньтавлыны. Та вӧсна комбинатсянь отсӧгыс лоис зэв кивыв. Локтан во кежлӧ дзоньтасян уджыс уна на: стрӧйбаын колӧ вежлавны став ӧшиньсӧ, джоджсӧ, выльмӧдны коридорсӧ.
–Сы пыдди таво челядь локтісны мича жыръясӧ. Химия, биология да информатика кабинетъясӧ ньӧбӧма выль пызан-улӧс, робототехникаын вӧдитчан эмбур видзам торъя шкапъясын, – ошйысис «Комиинформлы» школаса завхоз Владимир Уляшев.
Ручса велӧдчанінын 1,8 миллион шайт дон вежисны вевтсӧ: важ шипер пыдди вольсалісны ӧнія мича да бур профнастил. Ортсыас лӧсьӧдісны ва визувтан жӧлӧбъяс – тадзи стрӧйбаыс дырджык олас.
Вежасны вевтсӧ и Югыдъягса культура керкаын. Дзоньтасьӧм могысь став колана вылас видзасны 1 миллион шайт. Кулӧмдінса клубъяслӧн ӧтувъя тэчасӧн веськӧдлысь Александра Касевалӧн висьталӧм серти, культура керкаыс меститчӧ 1978 воын кирпичысь кыпӧдӧм кык судтаа стрӧйбаын. Кызь во сайын вольсалӧм шиперыс быд во «сылӧма» лымйыскӧд тшӧтш.
–Некымын во нин ми виччысим дзоньтасьны сьӧмсӧ, и со вичмӧдісны, – юксис нимкодьлуннас ань. – Ӧні вевтыс профнастилысь, а сідзкӧ, оз нин вияв да нинӧм оз тшык.
Александра Касевалӧн висьталӧм серти, Кулӧмдінса клубъяслӧн ӧтувъя тэчаслы «Монди Сыктывкарса ЛПК» уна во нин отсасьӧ. Районса администрациясянь комбинатын тӧдӧны культура юкӧнын сьӧкыдлунъяссӧ да пыр зільӧны отсавны. Сідз, Немдінын 2015 воын лои кыпӧдӧма выль культура керка, а Кужйын кольӧм воӧ вежисны клуб вевтсӧ.
–«Монди Сыктывкарса ЛПК» – миян зэв кывкутысь важся бур уджъ-ёрт. Кутам лача, тайӧ ёрта йитӧдыс водзӧ ёнмас, – пасйисны Кулӧмдін районса администрацияын.
«Комиинформ» агентстволӧн юӧр серти гижӧдсӧ дасьтіс
Елена Плетцер.