Ксения Бессонова помаліс Вяткаса госуниверситет да таво арнас бӧр воис чужан сиктас, Изьва районса Красноборӧ. Заводитіс уджавны аслас школаын.
Ксения – велӧдысь рӧдысь ныв: пӧль-пӧчыс школаын велӧдӧмаӧсь, мамыс да тьӧтыс сідзжӧ сетӧны челядьлы тӧдӧмлун. Ӧні и Ксениялӧн кадыс воис.
–Сентябрсянь на тані, но, ок, ёна воӧ уджӧй сьӧлӧм вылӧ, – висьталӧ Ксения. – Челядьӧс велӧда англия кывйӧ, кажитчӧ меным ставыс – и урокъяс кежлӧ дасьтысьны, и ныв-зонлы выль тӧдӧмлун сетны. Колана сӧветӧн ёна отсалӧны опытаджык педагогъяс: неважӧн на менӧ велӧдісны, а ӧні со уджъёрталам.
Велӧдысьлӧн ӧдвакӧ уна прӧст кадыс. Но кор Ксениялы вичмыштӧ шойччан здукыс, зільӧ лыддьыны художествоа литература да босьтчылӧ кипом уджӧ – ныв мичаа вурсьӧ-вышивайтчӧ да кыӧ быдсикас чачасӧ.
Ирина Терентьева. Снимокыс Соня Ковровалӧн.