Юаласны кӧ менсьым, дзолядырся кадысь мый медся сӧстӧмыс да казьтыланаыс коли менам паметьын, ӧдйӧ и аддза вочакыв – быд чужан лун кежлӧ выльвося коз гортӧ вайӧм, чӧскыд кӧч гӧснечӧн номсӧдлӧм да лӧз рӧма ыджыдсьыс-ыджыд тракторӧн журъялӧм.
И став тайӧ казьтылӧмыс йитчӧма менам муса да зэв тӧждысьысь папакӧд. Дерт, сиктса коми челядьыд ёнджыкасӧ «бать» кывйӧн вӧдитчӧны, но ми асланым семьяын ичӧтсянь велалӧмаӧсь «папа» дiнӧ.
Шуӧны менсьым папаӧс Владимир Владимирович Моторинӧн. Чужӧма сiйӧ Кӧрткерӧс районса Пӧддельнӧй сиктын ыджыд семьяын.
Бать-мамыс, Владимир Андреевич (1899-1944) да Александра Васильевна (1901-1970), чужтӧмаӧсь куим пи да вит ныв. Володя чужӧма бӧръяӧн – кӧкъямысӧдӧн.
Бабӧй вӧлӧм казьтылӧ, эз кӧ пӧ вӧв тайӧ проклятӧй войнаыс, нӧшта кык-куим кагатӧ чужтi на.
Володя, дерт, оз нин помнит ассьыс батьсӧ, сiйӧ усьӧма лёк вӧрӧглы паныд чорыд тышын.
Сьӧкыд кад вылӧ видзӧдтӧг челядь быдмӧмаӧсь ӧтсӧгласӧн, пыр отсасьӧмаӧсь ӧта-мӧдныслы. Налӧн ёртасьӧмыс миянлы, том кӧленалы, пыр вӧлi да лоӧ бур примерӧн.
Медводз Владимир Владимирович уджалӧма «Дзоридз» колхозын, сэсся велӧдчӧма трактористӧ да уна во зілис «Сторожевскӧй» совхозын. Пенсияӧдзыс во дас уджалiс бригадир-механикӧн.
Сылӧн уна медаль да Почёт грамота, Дружбы народов орденӧн весиг наградитiсны. Уджвылас зільӧмсьыс век мыйкӧ да мыйкӧ вӧлi козьналӧны. Помнита, коркӧ карысь вайис ыджыд ящик. Зэв лабутнӧя мамакӧд восьтiсны, а сэнi – сервиз. Гашкӧ, сё тасьтi!
Папа сьӧлыштiс да шуис: татшӧмтор пӧ ӧд верстьӧ мужиклы он жӧ козьнав. Ганна пӧ быдмас да, сылы сета.
А ме кӧть ичӧт на вӧлi, а кывъяссӧ пель сайӧ сюркнялi нин. Кор верӧс сайӧ петi да ас овмӧсӧн овмӧдчи, босьтi тайӧ мича сервизсӧ аслым. Ӧнi на кутшӧмсюрӧ тасьтi эм.
Папа да мама тӧдмасьӧмаӧсь Пӧддельнӧйын. Мама сиктса больничаын санитаркаӧн вӧлӧм уджалӧ. Модӧдӧмаӧсь сiйӧс вӧрӧ песла. Папа видзӧдӧма, кыдзи том нывкаыд пессьӧ, ыджыд чуркаяссӧ трактор кузолад сьӧкыда шыблалӧ, да босьтчӧма отсасьны.
Мича ныв вылад вежыс, буракӧ, том зонмыдлӧн петӧма. Рытнас нин клубын сійӧс йӧктыны корӧма. Матыстчигас вӧлӧм думайтӧ, оз кӧ пӧ пет йӧктынысӧ да янӧдас менӧ, пель бокас и лӧсышта. (Та йылысь уна во мысти папа ачыс висьталiс). А Зояыд, буракӧ, сьӧлӧмнас кылӧма татшӧм «грӧзтӧ», да ӧдйӧ и петӧма зонмыдкӧд йӧктыны.
И со 55 во нин йӧктӧны, куим челядь чужтiсны, дас нёль внук-внучкаӧс быдтыны отсалӧны да куим правнучкаӧс лелькуйтӧны.
* * *
Ноябрь 15 лунӧ миян бать, дед, прадед пасйис ассьыс тшупӧда юбилей – сылы тырис 80 арӧс!
Ми, сылӧн медся матыссаясыс, став сьӧлӧмсянь чолӧмалам дона мортнымӧс чужан лунӧн, сиам сылы крепыд дзонвидзалун, кузь нэм да бур шуд! Ов да выв дыр, мамакӧд видзӧй да жалитӧй ӧта-мӧднытӧ, тӧждысьӧй ӧта-мӧд вӧснаыд. Кыкнад ёна гажаджык: и горт гӧгӧрыд ноксянныд, и капустатӧ солыштанныд, и ас выланыд ропкыштанныд. Тайӧ олӧм! А олӧмас быдтор овлӧ: и радлуныс да шудыс, и шогыс да ускӧттьӧыс.
Тіян вылӧ видзӧдӧмӧн бурас эскӧмӧн зілям водзӧ овны. Семьяным содӧ и содӧ. Со тай бара на миянлысь рӧд нюжӧдысь чужис, папыслысь да дедыслысь кок туй талялысь Пашук Моторин. Тайӧ ӧд ыджыдысь-ыджыд шудлун!
Мед жӧ шудыс миян семьяын и водзӧ лоӧ унасьыс-уна, а тэ, миян дона папа, – тайӧ семьясӧ зумыда кутысьыс! Кыкӧн, дерт, – мамакӧд тшӧтш.
Ок, ёна жӧ ми тiянӧс радейтам!
Став ыджыд рӧдвуж нимсянь олӧмас быд бурсӧ сиӧмӧн,
Ганна Холопова.