Ноябрь 13 лунӧ Абъячойын чукӧртчылісны «Коми войтырлӧн» Луздорса представительствоӧ пырысьяс да ӧтмунӧмын водзмӧстчысьяс. Коронавируса вуджан висьӧм понда конференция пыдди таво ковмис нуӧдны татшӧм аддзысьлӧм, но тайӧ эз тӧдчы сёрнитантор вылӧ — чукӧртчӧмаяс кыпӧдлісны сиктса войтырӧс майшӧдлана тӧжд-мог.
Луздорса комияслӧн вогӧгӧрся уджлы кывкӧртӧд вӧчис представительствоӧн веськӧдлысь Галина Попова. Кольӧмвося конференция- лысь помшуӧмъяссӧ пӧ олӧмӧ пӧртӧм могысь районса администрация вынсьӧдліс торъя план, кытчӧ вӧлі пыртӧма кӧкъямыс вӧзйӧм. Ӧткымынӧс збыльмӧдӧма нин либӧ матысса кадӧ лоӧ вӧчӧма, но абу на ставсӧ.
Сідз, луздорсаяс корӧны унджык сьӧм вичмӧдны туйяс дзоньталӧм вылӧ. Надежда Косолаповалӧн кывъяс серти, Черёмуховкаын пӧ туйыс сэтшӧм лёк, мый весиг кувсьӧмаӧс шойна вылӧ нуны колӧ кытшола туйӧд. Оз пӧ тырмыны и бурдӧдысьыс да велӧдысьыс.
—Арлыда велӧдысьяс кӧ ӧтпырйӧ ставӧн петасны пенсия вылӧ, велӧднысӧ некодлы лоӧ, — шуис сійӧ.
Коми йӧз водзын сёрнитігӧн Галина Попова пасйис и тавося чукӧртчӧмлӧн резолюцияӧ вӧзйӧмъяс: сиктын олысьясӧс могмӧдны биа-руӧн, котыртны коми кыв сӧвмӧдан шӧрин, школаын чужан коми кыв велӧдӧм вылӧ вежоннас урчитны кык час, топыдджыка уджавны бать-мамкӧд, мед найӧ ышӧдасны челядьсӧ велӧдны ассьыныс кывсӧ. Вуктымын пӧ колӧ стрӧитны врача амбулатория, а Мутничаын, Черёмуховкаын, Чернышын, Лӧпъювомын, Спаспорубын, Занулльӧын да Слудкаын — ФАП-яс.
Чукӧртчылӧм вылын сёрнитіс и республикаса юралысь Владимир Уйба. Ме пӧ абу нин медводдзаысь Луздорын, волывлі татчӧ и тулыснас ытва дырйи, и гожӧмнас, да тӧда пӧ муниципалитетысь тӧждъяссӧ. Медым венны найӧс, общественнӧй котыръяслы, районса веськӧдлысьяслы, асшӧр уджалысьяслы колӧ зільны ӧтув. А туйясыс пӧ омӧльӧсь абу сӧмын Луза да Летка вожын, но и республика пасьталаын. Эскӧда пӧ, мый 2024 воӧ Луздорын туйясыс лоасны тӧдчымӧн бурджыкӧсь.
Сикт-посёлоксаӧс биаруӧн могмӧдӧм йылысь Владимир Уйба висьталіс, мый «зарни трубаыс» Луздорын оз ло, но эм позянлун кыпӧдны республикаын кизьӧртӧм газ вӧчан кык завод, ӧтиыс пӧ, гашкӧ, буретш тіян районын и лоас.
—Некымын во нин ме доръя том специалистъясӧс удж вылӧ распределение серти мӧдӧдӧм йылысь мӧвп, — висьталіс республикаса юралысь, кор делегатъяс шуисны, мый районын оз тырмы бурдӧдысьыс. — Татшӧм ногӧн ми некымын воӧн разям тайӧ гӧрӧдсӧ. Ӧні миян оз тырмы 600 врач, тӧкӧтьӧ этшаджык — шӧр тӧдӧмлуна специалистыс. Мед найӧ локтісны уджавны, колӧ мог-мӧдны ставнысӧ оланінӧн.
«Коми войтыр» ӧтмунӧмӧн юрнуӧдысь Алексей Габовлӧн кывъяс серти, сиктъясын пӧ колӧны фельдшеръяс, мед кужисны бурдӧдны и верстьӧӧс, и челядьӧс. Но оланінсӧ налы оз позь лӧсьӧдны ФАП бердын.
—Некодлы ӧд абу окота гортас уджавны, — шуис сійӧ. — Та вӧсна колӧ том специалистъяслы керкаяс стрӧитны.
Делегатъяс тӧждысьӧны и сиктлӧн аскиа лун вӧсна. Сиктас пӧ олӧмыс кусас, сэтчӧс йӧзыслӧн кӧ оз ло удж да тупкасны сэтысь школа. Ӧні республикаын котыртӧны Комиын сиктса овмӧдчӧминъяс сӧвмӧдӧм кузя сӧвет.
—Сӧветыс кутас индыны тайӧ юкӧнас государственнӧй политикалысь ныр-визьяс, — висьталіс Владимир Уйба. — Чайта, сиктъяс сӧвмӧдӧм могысь миянлы колӧ ӧтувтны общественнӧй котыръяслысь, медвойдӧр «Коми войтырлысь», «Изьватаслысь», «Коми Республикаса вужвойтыр аньяслысь» уджсӧ. Сідзжӧ колӧ збыльмӧдны и сикт-посёлокын олысьясӧн вӧзйӧм социальнӧй тӧдчанлуна уджтасъяс.
* * *
Чукӧртчылӧм дырйи Владимир Уйба сетіс Роза Пунеговалы да Василий Гуторовлы наградаяс: Василий Александровичлы — «За вклад в межнациональный мир и согласие в Республике Коми» морӧсвывса пас, Роза Афанасьевналы — «Коми Республикаса заслуженнӧй уджалысь» почёт ним.
Снимокъясыс ӧтуввезйысь.