Республикаса Госсӧветӧн веськӧдлысь Сергей Усачёв регионын мортлысь право дорйысь Надежда Быковскаякӧд кольӧм лунъясӧ аддзысьлігӧн сёрнитісны Комиын уполномоченнӧй йылысь оланпасӧ вежсьӧмъяс пыртӧм кузя. Тайӧ законсӧ пӧ колӧ выльмӧдны Россия тшупӧдын 48-ӧд номера федеральнӧй оланпас вынсьӧдӧмкӧд йитӧдын.
Торйӧн кӧ, ӧнія законас урчитӧма уполномоченнӧйлы йӧзӧс дорйӧм могысь унджык позянлун: шыӧдчыны веськыда прокуратураӧ, водзмӧстчыны административнӧй либӧ уголовнӧй делӧ панӧмын, шыӧдчыны ёрдӧ мортӧс дорйӧм кузя административнӧй искӧн да с.в.
Выль оланпасыслӧн водзӧс да тырмытӧмтор кузя аслас видзӧдласӧн Надежда Быковская юксис «Коми му» газеткӧд.
–Тайӧ законыс збыльысь дыр виччысяна да зэв колана. Россия пасьталаысь уполномоченнӧйяс та йылысь уна нин сёрнитлім. Зэв уна вежсьӧм-содтӧд вӧзйылім. И Госдумаын миянӧс кылісны. Унатор сэтчӧ лои пыртӧма, но унатор и пасйытӧм на коли, – висьталіс Надежда Николаевна.
–Бурыс сыын, мый оланпасын ӧні гижӧма, уполномоченнӧй пӧ вермӧ шыӧдчыны веськыда прокуратураӧ. Збыльысь, талун Россияын эмӧсь веськыда президентӧн юрнуӧдан тэчасъяс: пытшкӧсса делӧяс министерство, прокуратура, УФСИН, Туясян комитет. Таӧдз ми уджалім накӧд топыд йитӧдын жӧ, но вынсьӧдӧм сёрнитчӧмъяс серти, ӧд уна шыӧдчӧм инмӧ буретш тайӧ ведомствоясыслы. А ӧні законын стӧча гижӧма – уджавны веськыда.
Федеральнӧй законас гӧгӧрвотӧм со мый. Мортлысь право дорйӧм могысь уполномоченнӧйлы урчитӧма позянлун шыӧдчыны ёрдӧ. Сэк жӧ судлысь помшуӧмсӧ вермӧ киритны сӧмын вылысджык тшупӧда ёрд. А омбудсменлӧн кӧ татшӧм правоыс абу, кутшӧм сылӧн тӧдчанлуныс? Сэсся ӧд ёрдӧ шыӧдчӧм могысь колӧ тӧдны Жилищнӧй, Гражданскӧй, Административнӧй кодексъяс. А, шуам, кыдзи тайӧс позьӧ вӧчны миян регионын, уполномоченнӧйыс кӧ ӧти да сылы отсасьысьыс ӧти жӧ?
Гӧгӧрвотӧм и, кыдзи уполномоченнӧйлы бӧрйыны, кодӧс сійӧ кутас дорйыны ёрдын? Шыӧдчысьыс ӧд уна, а ме ӧтнам. Ӧтиӧс доръя, а мӧдӧс ӧтдорта? Сідзкӧ, мӧдыслысь правосӧ торка. Ставныс ӧд чайтӧны асьнысӧ правӧн. Ыстысьӧны на, адвокат-юрист пӧ тадзи шуисны. Но талун ӧд зэв уналаӧ позьӧ шыӧдчывны юристлӧн отсӧгла дон босьттӧг: Общественнӧй палатаӧ, Коми Республикаса юралысьлӧн да партияяслӧн общественнӧй приёмнӧйясӧ, Сыктывкарса университетӧ, госслужба академияӧ, Вӧр институтӧ. Асьтӧ дорйӧм могысь колӧ вӧдитчыны дзик став позянлуннас.
Елена Плетцер.