Судзӧданныд-ӧ ті коми-газет журнал? Лыддянныд кӧ, мый медся ёна кажитчӧ? А мый йылысь эськӧ содтӧд колӧ гижны?
Алёна Хозяинова, Изьва районса содтӧд тӧдӧмлун сетан шӧринӧн веськӧдлысьӧс вежысь:
–Судзӧда да лыддя. Ме серти, ӧткымын юӧр сёрмӧ – вежон чӧжнас удитам нин аддзывны-лыддьыны, шуам, интернетысь. Тӧдчанаӧн да коланаӧн пыр лоасны сідз шусяна «вечнӧй ценносьтъяс» йылысь гижӧдъяс: тайӧ Коми муын олысьяс, вужвойтырлӧн культура да видзӧдласъяс. Сиктын ола да, окотапырысь лыддя агроном Ия Сюрвасевалысь статьяяс, унаторйӧ велӧдча сылысь.
Наталия Сорока, Ханты-Манси кытшса Саранпауль сиктын олысь, роч да коми кыв да литература велӧдысь:
–Ме судзӧда «Коми му» коми газет электроннӧя. Ачым чужлі Коми Республикаын, но ола Юграын. Окотапырысь лыддя став лист боксӧ. Меным ӧд интереснӧ тӧдны, мый вӧчсьӧ чужан республикаын. Коланаӧсь культура, спорт, общественнӧй олӧм йылысь статьяяс. Торйӧн нин сьӧлӧмсянь лыддя коми йӧз да аслам чужан Изьва йылысь.
Саранпауль сиктын кызвын олысьыс – роч, но эмӧсь и коми-изьватас, и коми газет лыддигӧн ме ассьым кывйӧс сӧвмӧда да сы дорӧ быдмысь войтырын песта муслунсӧ. Ыджыд аттьӧ тіянлы зільӧмсьыныд! Вӧчанныд тӧдчана удж он сӧмын Коми Республикаын олысьяслы, но и мукӧд регионсалы.
Ирина Терентьева, Ямал-Ненеч автономия кытшысь Мыжи сиктса школаын коми кыв велӧдысь:
–Бур лун! Коми газет-журналлысь быд номер виччыся. Ямалын олысьяслы зэв колана тіян петасныд. Окота тӧдны, кыдзи коми войтыр олӧны, мый выльыс да интереснӧйыс Коми Республикаын.
Алексей Рассыхаев, Коми наука шӧринса фольклор туялысь:
–Чолӧм! «Коми му» газет да журналъяс судзӧда «Ордым» лавка пыр. Челядьлы – «Би кинь» да «Йӧлӧга», аслыным гӧтыркӧд – мукӧдсӧ. «Коми муысь» ёнджыка лыддя сэтшӧм гижӧдъяс, мый йылысь оз гижны мукӧдлаас. Шуам, кос пресс-релиз либӧ вежонсайся юӧр, мый паныдасьлӧ ӧтуввезйын (унаысь, быд сайтын да социальнӧй везъяслӧн котыръясын), син пыр весиг ог нуӧд. Корся аналитика, нималанаджык йӧзсянь донъялана пасйӧдъяс, автор видзӧдласа гижӧдъяс. Зіля бурджыка лыддьыны коми кыв да культура, сикт сӧвмӧм йылысь статьяяс. Корся и сэтшӧмӧс, мый вермас ковмыны менам туясян уджын. Телевизор абу да, телепрограмма во дас нин ог босьтлы киӧ. А кодлӧн эм телевизор, ог гӧгӧрво, мыйла колӧ буретш газетысь корсьны, кор петкӧдласны колана кино да передача. Мыйла колӧ йӧзӧдны тайӧ «дивӧсӧ» быдса кӧкъямыс лист бокын?! И дерт жӧ, юавны окота: а кымынӧн сійӧн вӧдитчӧны? Гашкӧ, кад нин сыысь мынтӧдчыны либӧ кольны сӧмын «Коми гор» да «Юрган» каналъяслысь уджтасъяссӧ.
Евгений Цыпанов, филология наукаса доктор:
–«Коми му» газет ме лыддя уна-уна во нин, «Югыд туй» нимасӧ на тӧд вылын кутӧмӧн. Ог сӧмын лыддьы, но и корсюрӧ гижа сэтчӧ ассьым статьяяс. Вӧзъя талунъя газетлысь ёнмӧдны куим нырвизь. Медводз, колӧны специалистъяскӧд гырысь вочасёрнияс, шуам, ӧнія пӧрӧс висьӧмыскӧд йитӧдын бурдӧдысьяскӧд. Мӧд-кӧ, унджык ин сетны коми важвылӧм да кыв йылысь гижӧдъяслы, ӧд локтан воӧ Коми Республикалы тырӧ сё во. Коймӧд-кӧ, вӧзъя ломзьӧдавны коми «кодзувъяс», газет пыр тӧдмӧдны талунъя нималана коми гижысьяскӧд, туялысьяскӧд, артистъяскӧд, веськӧдлысьяскӧд, медым коми йӧз, газет лыддьысьяс, нимкодясисны асланыс водзын мунысь ныв-пинас. Оз ло ковтӧм сетавны и криминал йылысь дженьыдик юӧръяс да серамбана гижӧдъяс. Помнита, войдӧр весиг коми кроссвордъяс петавлісны. Тайӧ ставыс кыскас лыддьысьысьӧс ас чужан кывъя газет дорӧ.
Дасьтісны Инесса ОРЁЛ да Галина МАКАРОВА.