Тайӧ авъя, мелі видзӧдласа да шань нылыс – Коми Республикаса челядьлӧн да том йӧзлӧн шӧринын зільысь Виктория Попова. Кык во да джын сійӧ уджалӧ чужан му туялан юкӧнын педагог-организаторӧн.
Виктория чужлӧма Кӧрткерӧс районса Каляты сиктын, нёль арӧсӧн бать-мамыскӧд да чойыскӧд вуджӧмаӧсь овны Шойнатыӧ. Помалӧма Сыктывкарса университетын география да экология юкӧн.
Студенталігас на Виктория уджыштіс миян «Коми йӧзӧдчан керкаын» – зілис коми газет-журналъяслӧн сайтын да социальнӧй котыръясын, а такӧд тшӧтш видліс ассьыс вынсӧ журналистикаын.
Ас кадӧ ныв водзмӧстчыліс коми том войтырлӧн «МИ» котырын, аслас ёртъяскӧд водзмӧстчис коми кыв да культура сӧвмӧдӧмын.
–Шӧринын уджыс воӧ сьӧлӧм вылӧ. Ныв-зонкӧд ӧтув гижам туялан да творческӧй проектъяс, пырӧдчам уна сикас конференцияӧ. А медтӧдчанаыс – уджъёртъяскӧд зілям пестыны быдмысь войтырлӧн сьӧлӧмын ас чужан му, кыв, йӧз дорӧ муслун да пыдди пуктӧм.
Галина МАКАРОВА. Снимокыс Анастасия МарковкиналӦн.