Да ставыс миян бур!

Оз-оз да кодкӧ кадысь кадӧ юавлӧ менсьым да уджъёртъяслысь: А «Чушканзіыс» нӧ петӧ на? Весиг «Войвыв кодзулыс»? Коді бара-й лыддьӧ «Коми мусӧ» а?!

Весиг джӧмдывлан мукӧддырйиыс да ас кежсьыд шензьыштан: кыдз нӧ коми мортыс вермӧ юасьны татшӧмторсӧ? А сэсся бура мӧвпыштан да, збыльысь ӧд: нэмсӧ кӧ судзӧдӧны коми газет-журналтӧ – дерт, лыддьӧны, а мода кӧ абу киас весиг босьтлыны – кытысь тӧдасны?

Но мед кӧть мый оз шуавны коми петасъяс йылысь (кодкӧ – ошкыштас, кодкӧ – дивитас), ме тай гӧрдитча, мый тані уджала! Асывсянь рытӧдзыс комиӧн уджъёртъяскӧд сёрнита, мукӧддырйиыс вель на и гораа коридорын ӧта-мӧдлы мыйкӧ висьталам (Печать керкаын би нюжӧдысьяс да выль ӧшинь пукталысьяс регыд швач комиӧсь лоасны).

А сэсся, видзӧдлыны кӧ, шуам, финн-йӧгра регионысь мукӧд газет-журнал – коми петасъясыд ньӧти оз кольччыны наысь ни пытшкӧслуннас, ни ортсы мыгӧрнас (верстайтӧм боксянь). Мӧдарӧ на, эм мый лыддьынысӧ, и «чужӧмбанныс» ӧнія кадлы лӧсялана.

Со тай тӧрыт «Коми йӧзӧдчан керка» пырӧдчыліс «Информационный мир Югры» онлайн-форумӧ, кодӧс дасьтіс-нуӧдіс Ханты-Манси автономия кытшысь йӧзкӧд йитӧд кутан департамент. Миян веськӧдлысь Инесса Орёл висьтасис ас удж йылысь: тӧдмӧдіс петасъяслӧн сӧвмӧмӧн, «Лок татчӧ» коллекция уджӧ пыртӧмӧн, сайт да соцсеть паськӧдӧмӧн да с.в.

Тӧдчӧда, форумӧ пырӧдчыліс Россияса матӧ кызь СМИ. Ми ставнысӧ (хантыӧс, мансиӧс, мариӧс да уна мукӧдӧс) сюся кывзім-видзӧдім, мыйсюрӧ пель сайӧ сюркнялім, мый вылын кӧ шензим, дерт жӧ, и нимкодясим. Но! «Межэтническӧй журналистика гильдия» котырса президент Маргарита Лянге форумсӧ сигӧртіс со татшӧм кывъясӧн: «Ті – национальнӧй СМИ-ын зільысьяс, ставсӧ вӧчанныд ас кывнытӧ видзӧм могысь, ӧд кывйыс либӧ паськалӧ, либӧ кусӧ. Тіян медшӧр могыс – дерт жӧ, паськӧдны-сӧвмӧдны… Ставныслысь доклад кывзӧм бӧрын шуа: видлӧй уджавны Коми Республикаысь «Коми йӧзӧдчан керкаын» зільысьяс моз, босьтӧй налысь пример, и тіян ставыс лоас бур».

Та дорӧ, чайта да, и содтынысӧ нинӧм…

Галина МАКАРОВА,

«Коми йӧзӧдчан керкаын» веськӧдлысьӧс вежысь да

«Коми му» газетын шӧр редакторлысь удж вӧчысь.

Да ставыс миян бур!

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх