Коми Республикаса Национальнӧй галереяын «Шылад, кывбур, серпас» выставкаын графикаа уджъяссӧ петкӧдлӧ Москваысь художник Алевтина Стручкова.
Ичӧтсяньыс Алевтинаӧс кыскӧма творчествоыс. Сійӧ помалӧма И.Н. Репин нима художествоа школа, вурсян дизайн лицейын велӧдчӧма модельерӧ, А.Н.Косыгин нима текстильнӧй университетын — художник-стилистӧ. Чужӧма да олӧ Москваын, но вужъясыс сылӧн Комиысь, Алевтиналӧн рӧдын тшӧтш и композитор Прометей Ионович Чисталёв. Прадедыс, Александр Васильевич Анисимов, веськӧдлӧма Нювчимса кӧрт сывдан заводӧн, кӧні сылӧн зільӧмӧн вӧлі восьтӧма бурдӧдчанін да вӧскреснӧй школа. Сылӧн Нювчимса керкаын ӧні меститчӧ П.И.Чисталёвлӧн музей, кӧні видзӧны Анисимов-Чисталёвъяслӧн семья йылысь паметьсӧ.
Алевтина оз нин ӧти во туяв коми войтырлысь аслыспӧлӧс культурасӧ: быдлунъя оласногсӧ, киподтуйсӧ, сер-орнаментсӧ, да та вылӧ подуласьӧмӧн и вӧчалӧ серпасъяссӧ. Сылӧн уджъясысь аддзам крестьянаӧс, вӧралысьясӧс, зырянка-аньясӧс, серпасасигас тшӧкыда вӧдитчӧ кысян-вышивайтчан серӧн.
Выставка вылын петкӧдлӧма «Сюжеты и образы Коми края», «Мистика Арктики», «Путешествие по реке Кокшеньге» серпас чукӧръясысь уджъяс. Наын тыдовтчӧ, мый войвывса йӧз оз торйӧдны асьнысӧ вӧр-ваысь. Художник петкӧдлӧ, мый радейтӧ войвывсӧ, коми йӧзӧс, вылӧ донъялӧ налысь сям-кужӧмсӧ. Москва да Коми костын йитӧдъяс сӧвмӧдӧмысь Алевтиналы сетӧма Москваса правительствоысь национальнӧй политика да регионкостса йитӧдъяс кузя департаментлысь Почёт грамота.
Графикаа серпасъяссӧ Алевтина Стручкова заводитӧма вӧчны, кор тӧдмасьӧма Японияысь художник Утагава Хиросигэлӧн да гижысь Арисима Такэолӧн уджъясӧн. Выставка вылысь позьӧ аддзыны и «Девушка из Йокогамы» серияысь серпасъяс. Алевтиналӧн серпасасянногӧ тӧдчӧма и авангардистъяс Иоханнес Иттенлӧн да Василий Кандинскийлӧн творчествоыс.
Галереяын выставкаыс уджалӧ октябрь помӧдз.
Павел Анохин.