Октябрь 19 лунсянь вежон чӧж Питирим Сорокин нима Сыктывкарса университетысь гуманитарнӧй наукаяс институтын «медыджыдъяснас» вӧліны медводдза курсын велӧдчысьяс. Коронавируса вуджан висьӧм понда студентъяслӧн сӧвет вӧзйис первокурсникъяслы Михаил Булгаковлӧн «Мастер и Маргарита» роман серти дасьтыны видео да петкӧдлыны сійӧс институтлӧн «ВКонтактеын» vk.com/ign_syktsu лист бокын.
Медводз йӧзӧдісны студсӧветӧн снимайтӧмсӧ: «Аннушка кисьтӧма джоджӧ вый, кок йывсянь юр вылас сувтӧма Меладзе, а велӧдчанінса директорлысь жырсӧ мырддьӧма пеж вын». Тадзи институт веськаліс сьӧд ру пытшкӧ…
А сэсся сьӧрсьӧн-бӧрсьӧн сямсӧ петкӧдлісны студентъяс.
Политологӧ велӧдчысьяс висьталісны канму вӧсна тӧждысьысь – мед пӧ сійӧ оз жӧ барай дзикӧдз киссьы – Сергей зон йылысь. Канму вӧсна майшӧдлана мӧвпъясӧн сійӧ локтӧ тӧдӧмлунла университетӧ. И паныдасьӧ Воландкӧд. Мый лоас водзӧ, ог висьтав, асьныд видзӧдӧй ӧтуввезсьыс.
Роч кыв да литература юкӧнысь студентъяс нинӧм дзебтӧг петкӧдлісны, мый найӧ дасьӧсь вӧчны радейтана СГУ-ын велӧдчӧм могысь.
Журналистъяс дасьтӧмаӧсь видеосӧ ӧти лунӧн. Сэтысь аддзам, мый найӧ кывкутанаӧсь, сюсьӧсь, уджачӧсь, збойӧсь да ӧтпырйӧ рамӧсь. И некор некытчӧ оз сёрмыны.
Коми кыв да литература туялысь студентъяс дасьтӧмаӧсь йӧзлӧн тырмытӧмторъяс йылысь видео. Быд мортлӧн пӧ татшӧмыс эм.
Пиарщикӧн лоны кӧсйысьяс мӧвпыштчӧмаӧсь, мый эськӧ вермис лоны, «Мастер и Маргаритаысь» геройяс кӧ велӧдчисны СГУ-са гуманитарнӧй наукаяс институтын.
Филологъяс лӧсьӧдӧмаӧсь сессия йылысь видео, экзаменысь оценкатӧ пӧ «автоматӧн» позьӧ босьтны. Нӧшта висьталӧмаӧсь, кыдзи колӧ кутны асьтӧ, мед Воланд эз скӧрмы.
Быд видеоын студентъяс петкӧдчисны кужысь да ыджыд сяма ныв-зонмӧн, «Мастер и Маргарита» романсӧ бура тӧдысьясӧн.
Медбӧрын окота сины первокурсникъяслы бура велӧдчыны университетсӧ помавтӧдз.
Дарина Сизганова.