Комиысь вӧр заптан районъясса войтырӧс уджӧн могмӧдӧмын зільӧмысь «Монди Сыктывкарса ЛПК» компанияӧс шуӧма Россияса FSC-лӧн (Forest StewardshipCouncil, FSC-C119916, Вӧрса попечительскӧй сӧвет) премиялӧн социальнӧй нимпасын вермысьӧн.
Тайӧ нимпасас ордйысьӧма 35 уджтас, а вермысьяссӧ нимӧдӧмаӧсь Россияса FSC-ӧн да «Лесоруб XXI века» ассоциацияӧн котыртлӧм онлайн-конференция дырйи.
–Ми отсалам Коми Республикаса районъяслы, кӧні заптам вӧр, сӧвмӧдны социальнӧй юкӧнсӧ. Тайӧ Mondi котырлӧн уджын тӧдчана нырвизь. И сэтчӧс олысьяс аддзӧны тайӧс да бурджыка нин донъялӧны «Монди Сыктыкарса ЛПК»-лысь вӧр заптӧмсӧ. Ми дасьӧсь юксьыны асланым опытӧн мукӧд предприятиеяскӧд, и «Зелёный проект года» уджтасыс сетӧ та могысь позянлун, – висьталіс «Монди Сыктывкарса ЛПК»-ысь генеральнӧй директор Клаус Пеллер.
Коми Республикаса районъяскӧд экономикаын да социальнӧй юкӧнын ӧтувъя удж нуӧдігӧн комбинат дасысь унджык во нин отсасьӧ шӧр да ичӧт бизнеслы, кӧні лӧсьӧдӧны выль уджаланінъяс. Та кындзи предприятие вичмӧдӧ сьӧм общественнӧй удж котыртӧм да уджтӧмалысьясӧс сэтчӧ кад кежлӧ медавлӧм могысь. Таысь водзӧсыс воӧ и районъясса экономикалы, и йӧзыс инасьӧны чужан сиктас, посёлокас, грездас.
Бӧръя дас вонас «Монди Сыктывкарса ЛПК»-лӧн отсӧгӧн Комиысь муниципалитетъясын видзӧма 1.161, лӧсьӧдӧма пыр кадся 621 да кад кежлӧ 3.049 уджаланін. Проектын индӧма и водзӧ тайӧс вӧчны да выль уджаланінъяссӧ видзӧм могысь локтан воясӧ вичмӧдны сьӧм.
–Миян компания зільӧ кутны топыдджык йитӧд районъясын уджалысь предпринимательяскӧд, ӧд миян могным ӧтувъя – сӧвмӧдны республика и комбинат, – пасйис «Монди Сыктывкарса ЛПК»-ӧс вӧрӧн могмӧдӧм кузя директор Аксель Бендер.
«Зелёный проект года» премия вылӧ вӧзйӧм уджтасъяссӧ донъяліс 16 морта жюри.
–Миянлы нимкодь, мый куим вермысь лыдӧ веськаліс и Mondi компаниялӧн FSC-ӧн сертифицируйтӧм уджтас. Сідзкӧ, казялӧмаӧсь, мый предприятие унатор вӧчӧ, медым збыльмӧдны ас вӧляысь вӧр сертифицируйтігӧн экологиякӧд да социальнӧй юкӧнкӧд йитчӧм содтӧд корӧмъяссӧ. Ас пайсянь чолӧмалам вермысьясӧс да корам премиялӧн сайтса пасйӧдъясысь тӧдмасьны олӧмӧ пӧртӧм нин проектъясӧн. Найӧ вайӧны ыджыд водзӧс и вӧр-валы, и миян странаын олысьяслы, – висьталіс Россияса FSC-ысь генеральнӧй директор Николай Шматков.
«Монди Сыктывкарса ЛПК» уна во нин отсалӧ и школаясса лесничествояслы збыльмӧдны ва ключьяс пелькӧдан да экология ордымъяс лӧсьӧдан уджтас.
«Зелёный проект года» премияса жюриӧ пырысьяс – EcoStandart group компания да «Зелёная кисточка» фонд – сетісны тайӧ проектыслы торъя сертификат.